Filêmon 1 - Peymana Nû (Încîl)

Silavkirin

¹ Ji Pawlos, bona Mesîh Îsa girtî û Tîmotʼêyoyê bira, Filîmonê heval-xebat û delalê xwerʼa,

² Afîya xûşkrʼa û Arxîpoyê hevaleskerê xwerʼa û usa jî wê civînêrʼa ku mala teda dicive:

³ De bira kʼerem û eʼdilayîya Xwedêyê Bavê me û Xudan Îsa Mesîh li we be.

Bawerî û hʼizkirina Filîmon

⁴ Ez her gav ji Xwedêyê xwe rʼazî me, gava nava duayêd xweda te bîr tînim birayê Filîmon,

⁵ çimkî bona wê hʼizkirina teye hindava tʼemamîya cimeʼta Xwedêda û bawerîya teye hindava Xudan Îsada dibihêm.

⁶ Ez dua dikim, wekî heleqetîya teye tʼevî me, nava bawerîyêda me bigihîne wê zanebûna kʼûr, ya ku hindava her tiştêd meye qence tʼevî Mesîh e.

⁷ Bona wê hʼizkirina dilê teda birayo, ez gelekî şa bûm û bîna min fire bû, ku dilê cimeʼta Xwedê pê te rʼihʼet bûye.

Hîvîkirina Pawlos bona Onîsîmoyê xulamê Filîmon

⁸ Bona vê yekê bi Mesîh çawa bira, min dikaribû turuş kira, eʼmirî ser te bikira, çi ku cayîz bû,

⁹ lê ji dest hʼizkirinê, hîvî dikim. Ez çawa Pawlosekî kal û niha jî bona Mesîh Îsa girtî,

¹⁰ bona lawê xwe Onîsîmo hîvî ji te dikim, yê ku qeydê minda çawa kurʼek minrʼa dinê kʼet.

¹¹ Ew wextekê kêrî te nedihat, lê niha hin kêrî te tê, hin jî kêrî min.

¹² Ez wî paşda dişînime cem te, ew cegera min e.

¹³ Min dixwest ew cem xwe bihişta, ku dewsa te ber destê min bûya, hʼeta ku ez bona Mizgînîyê qeydada me.

¹⁴ Lê bêyî te min nexwest tiştekî bikim, ku qencîya te usa nebe, çawa borcek kiribine stûyê te, lê bi rʼezedilîya te be.

¹⁵ Belkî bona vê yekê ew wextekê ji te dûr kʼet, ku ew her tʼim bibe pʼara te,

¹⁶ ne ku çawa xulam, lê ji xulamekî zêdetir e, çawa birakî delal! Bona min ew çiqasî delal e, lê bona te ewê hê zêde be, hin alîyê xulamtîyêda, hin jî alîyê Xudanda.

¹⁷ Awa heger tu min çawa hevalê xwe hʼesab dikî, wî usa qebûl ke, çawa min.

¹⁸ Heger ewî neheqîk jî li te kiribe, yan tiştekî deyndarê te be, ser min hʼesab ke.

¹⁹ Ez Pawlos bi destê xwe dinivîsim: Ezê li te vegerʼînim (lê ez bi vê yekê naxwazim bêjime te, ku tu jîyîna xweva deyndarê min î.)

²⁰ Niha, birayê minî ji Xudanda, vê qencîyê bona min bike, bona xatirê Mesîh dilê min rʼihʼet ke.

²¹ Ez guhdarîya teda guman bûm, lema jî min ev yek terʼa nivîsî, çimkî ez zanim tê ji gotina min zêdetir bikî.

Gotinêd axirîyê

²² Pêştirî vê yekê jî, minrʼa cîkî mayînê hazir ke, çimkî gumana min heye, ku Xwedêyê caba duayêd we bide, min paşda bide we.

²³ Êpafrasê bona navê Mesîh Îsayî tʼevî min girtî, te silav dike,

²⁴ usa jî Marqos, Erîstarxo, Dîmas û Lûqa, heval-xebatêd min.

²⁵ Kʼerema Xudan Îsa Mesîh tʼevî rʼuhʼêd we be.