Romayî 6 - Пәймана Ну (Инщил)

Бона гӧна мьри, ле бона Мәсиһ сах

¹ Ле әм ньһа чь бежьн? Әм нава гӧнада бьминьн, кӧ кʼәрәма Хԝәде сәр мәда зедә бә?

² Тʼӧ щар! Әм кӧ һьндава гӧнада мьрьн, чаԝа дькарьн һе нава ԝанда бьжин?

³ Һун ньзаньн әм кӧ йәктийа Мәсиһ Исада һатьнә ньхӧмандьне, мьрьна Ԝида һатьнә ньхӧмандьне?

⁴ Бь ньхӧмандьне әм иди тʼәви мьрьна Ԝи бунә у тʼәви Ԝи һатьнә дәфьнкьрьне, ԝәки чаԝа Мәсиһ бь рʼумәта Баве жь мьрьне рʼабу, ӧса жи әме бькарьбьн жийина нуда бьжин.

⁵ Чьмки һәгәр әм мина мьрьна Ԝи мьрьн тʼәви Ԝи бун, әме ӧса жи мина рʼабуна Ԝи жь мьрьне рʼабьн.

⁶ Әм ве йәке заньн кӧ бьнйатʼа мәйә кәвьн тʼәви Ԝи хач бу, ԝәки ԛальбе гӧнәкʼар сәри һьлнәдә, кӧ жь вьр шунда әм нәбьнә хӧламед гӧнә.

⁷ Чьмки әԝе кӧ мьрийә, әԝ жь гӧнә азабуйи йә.

⁸ Аԝа һәгәр әм тʼәви Мәсиһ мьрьнә, әм баԝәр дькьн, кӧ әме тʼәви Ԝи бьжин жи.

⁹ Чьмки әм заньн Мәсиһ кӧ жь мьрьне рʼабуйә, иди намьрә, мьрьн сәр Ԝи иди һʼӧкӧм накә.

¹⁰ Мьрьна Әԝ мьр, һьндава гӧнәда щарәке бона һәр тʼьм мьр, ле жийина кӧ ньһа дьжи, һьндава Хԝәдеда дьжи.

¹¹ Ӧса жи һун хԝә һьндава гӧнәда мьри һʼәсаб кьн, ле һьндава Хԝәдеда сах, бь сайа Мәсиһ Иса.

¹² Аԝа бьра иди гӧнә һʼӧкӧми сәр ԛальбе ԝәйи пʼучʼи-мьри нәкә, кӧ һун гӧрʼа хԝәстьнед ԝи бькьн.

¹³ У әндәмед ԛальбе хԝә нәдьнә гӧнә кӧ бьбьнә һащәтед нәһәԛийе, ле бәле хԝә бьдьнә дәсте Хԝәде, чаԝа йәки жь мьрьне рʼабуйи, бьра әндәмед ԝә бьбьнә һащәтед һәԛийе, бона Хԝәде.

¹⁴ У гӧнә ԝе сәрԝертийе ль ԝә нәкә, чьмки һун нә бьн ԛанунеда нә, ле бьн кʼәрәмеда.

Хӧламед һәԛийе

¹⁵ Иди чь? Әм гӧна бькьн, чьмки нә бьн ԛанунеда нә, ле бьн кʼәрәме? Тʼӧ щар!

¹⁶ Һун һаԛас тьшт ньзаньн кӧ һун бона хӧламтийе дәсте кʼева дьчьн у гӧрʼа кʼе дькьн, дьбьнә хӧламед ԝи? Һәгәр һун хӧламед гӧнә бьн, дьчьнә бәрбь мьрьне, ле һәгәр һун хӧламед Хԝәде бьн, гӧрʼа Ԝида бьн, дьчьнә бәрбь рʼастһʼәсаббуне.

¹⁷ Ле шькьр жь Хԝәде, һун кӧ ԝәхтәке хӧламед гӧнә бун, ле ԝә бь дьл у щан гӧра тʼәрзе ԝе һинкьрьне кьр, йа кӧ ԝә хԝә спарте.

¹⁸ Һун жь гӧнә аза бун у бунә хӧламед һәԛийе.

¹⁹ (Әз мина әʼдәте мәрьвайе дьбежьм, бона бьнйатʼа ԝәйә мәрьвайийә бетʼаԛәт.) Ԝә чаԝа ԝәхтәке әндәмед хԝә данә нәһәԛийе кӧ бьбьнә хӧламед һʼәрамийе у нәһәԛийе, ӧса жи ньһа әндәмед хԝә бьдьнә һʼәлалийе кӧ бьбьнә хӧламед һәԛийе.

²⁰ Гава һун хӧламед гӧнә бун, жь һәԛийе аза бун.

²¹ Һьнге ԝә жь кьрьнед хԝә чь бәр чьнин, бона кʼижана ньһа һун шәрм дькьн? Әԝ ахьрийе мерьв дьбьнә бәрбь мьрьне.

²² Ле ньһа һун жь гӧнә кӧ аза бун у бунә хӧламед Хԝәде, бәре һʼәлалийе дьчьньн у ахьрийа ԝан жи жийина һʼәта-һʼәтайе йә.

²³ Чьмки маше гӧнә мьрьн ә, ле пʼешкʼеша Хԝәде жийина һʼәта-һʼәтайе йә, бь сайа Хӧдане мә Мәсиһ Иса.