Metta 22 - Пәймана Ну (Инщил)

Мәсәла дәʼԝате

¹ Диса Иса бь мәсәла ԝанарʼа хәбәр да у гот:

² «Пʼадшатийа Әʼзмана мина ве йәке йә: Пʼадшаки дәʼԝата кӧрʼе хԝә кьр.

³ Әԝи хӧламед хԝә шандьн кӧ гази хԝәндийед дәʼԝате кьн, ле ԝана нәхԝәстьн бен.

⁴ Хӧламнә дьн шандьн у гот: ‹Хԝәндийарʼа бежьн: Мьн щанәга у һʼәйԝанед хԝәйә дәрмаликьри сәржекьрьнә у нане хԝә һазьр кьрийә, һәр тьшт һазьр ә. Ԝәрьнә дәʼԝате!›

⁵ Ле ԝана пьшт гӧһе хԝәва авит, йәк чу әʼрде хԝә у йе дьн тʼӧщарәтийа хԝә.

⁶ Йед майин жи хӧламед ԝи гьртьн, кʼӧтан у кӧштьн.

⁷ Чахе пʼадше бьһист, һерс кʼәт, ордийа хԝә шанд ԛьрʼа әԝед кӧ хӧлам кӧштьн ани у бажаре ԝан шәԝьтанд.

⁸ Һьнге готә хӧламед хԝә: ‹Дәʼԝат һазьр ә, ле хԝәнди нә һежа бун.

⁹ Рʼабьн һәрʼьнә сәре рʼийа у һун кʼе кӧ бьбиньн, тʼәглифи дәʼԝате кьн›.

¹⁰ У әԝ хӧлам дәркʼәтьнә сәре рʼийа, кʼи кӧ дитьн, ԛәнщ у хьраб, тʼәв щьвандьн у мала дәʼԝате бь хԝәндийава тʼьжи бу.

¹¹ Ле гава пʼадша чу һьндӧрʼ кӧ хԝәндийа бьбинә, мәрьвәк ль ԝьр дит кӧ кʼьнще дәʼԝате ле тʼӧнәбу

¹² у готә ԝи: ‹Һәвал! Тӧ чаԝа бе кʼьнще дәʼԝате кʼәти вьр?› Әԝи дәнг нәкьр.

¹³ Ԝе гаве пʼадше бәрдәстийарʼа гот: ‹Дәст у пʼийе ԝи гьредьн, бьгьрьн бавежьнә тәʼрийа дәрва. Ль ԝьр ԝе бьбә ԛирʼин у чʼьркә-чʼьрка дьрана›.

¹⁴ Аԝа газикьри гәләк ьн, ле бьжарти һьндьк ьн».

Пьрса хәрщдайин у нәдайине

¹⁵ Һьнге ферьси чун шеԝьрин, кӧ Ԝи чаԝа бь хәбәра бьгьрьн.

¹⁶ Ԝана шагьртед хԝә тʼәви пьштгьред Һеродәс шандьнә щәм Ԝи у готьне: «Дәрсдар! Әм заньн кӧ Тӧ йәки рʼаст и у рʼийа Хԝәде рʼаст һин дьки. Мьнәте жь кәси нагьри, чьмки нав мәрьвада фьрԛийе данайни.

¹⁷ Ньһа бежә мә, Тӧ чаԝа тʼәхмин дьки? Гәло рʼаст ә кӧ әм хәрщ бьдьнә Ԛәйсәр йан на?»

¹⁸ Иса ԛәлпийа ԝан заньбу у гот: «Чьма һун Мьн дьщерʼьбиньн, дӧрʼуно?

¹⁹ Пʼәре хәрщдайине нишани Мьн кьн». У ԝана зивәк Ԝирʼа ани.

²⁰ Иса жь ԝан пьрси: «Әв наве ньвисар у сьфәт йе кʼе йә?»

²¹ Ԝана гот: «Йед Ԛәйсәр ьн». Һьнге готә ԝан: «Аԝа чь кӧ йед Ԛәйсәр ьн бьдьнә Ԛәйсәр у чь йед Хԝәде нә бьдьнә Хԝәде».

²² Гава ԝан бьһист зәндәгьрти ман, Әԝ һьштьн у чун.

Пьрса рʼабуна мьрийа

²³ Садуԛи, кӧ дьбежьн рʼабуна мьрийа тʼӧнә, ԝе рʼоже һьнәкә жь ԝан һатьнә щәм Иса же пьрсин

²⁴ у готьне: «Дәрсдар! Муса гот: ‹Һәгәр йәк безӧрʼәт бьмьрә, бьра бьре ԝи жьна ԝи бьстинә у ԝаре бьре хԝә шин кә›.

²⁵ Аԝа һʼәфт бьра ль щәм мә һәбун. Бьре мәзьн зәԝьщи, безӧрʼәт мьр, жьна ԝи бьре ԝирʼа ма.

²⁶ Ӧса жи һатә сәре бьре дӧда у йе сьсийа, хӧләсә һатә сәре һәр һʼәфта жи.

²⁷ Ль пәй һʼәмуйарʼа әԝ жьна жи мьр.

²⁸ Дә ижар ԝе Рʼожа Рʼабуна мьрийа әԝ кʼӧлфәте бьбә жьна кʼижани жь ԝан һәр һʼәфта? Чьмки һʼәмуйа жи әԝ стандьбу».

²⁹ Иса ль ԝан вәгәрʼанд у гот: «Һун хальфи нә, чьмки нә ньвисара заньн, нә жи ԛәԝата Хԝәде.

³⁰ Рʼожа Рʼабуна мьрийа нә ԝе бьзәԝьщьн, нә жи мер кьн, ле әԝе мина мьлйакʼәтед әʼзмен бьн.

³¹ Ле дәрһәԛа рʼабуна мьрийада, чьма ԝә әԝ хәбәра кӧ Хԝәде ԝәрʼа готьбу нәхԝәндийә?

³² ‹Әз Хԝәдейе Бьраһим, Хԝәдейе Исһаԛ у Хԝәдейе Аԛуб ьм›. Хԝәде нә Хԝәдейе мьрийа йә, ле Хԝәдейе зендийа йә».

³³ Гава әʼлаләте әв тьшт бьһистьн, сәр һинкьрьна Ԝи зәндәгьрти ман.

Тʼәмийа сәр тʼәмийарʼа

³⁴ Ле гава ферьсийа бьһист кӧ Иса садуԛи дәнгбьрʼи кьрьн, һʼәму ль щики щьвийан.

³⁵ Һьнге жь ԝан ԛанунзана йәки пьрс да Иса кӧ Ԝи бьщерʼьбинә у готе:

³⁶ «Дәрсдар. Ԛанунеда кʼижан ә тʼәмийа һәрә мәзьн?»

³⁷ Иса готә ԝи: «‹Хӧдан Хԝәдейе хԝә һʼьз бькә бь тʼәмамийа дьле хԝә, бь тʼәмамийа щанийа хԝә у бь тʼәмамийа һʼьше хԝә›.

³⁸ Әв ә тʼәмийа пешьн у һәрә мәзьн.

³⁹ У йа дӧда жи мина ве йә: ‹Һәвале хԝә ԝәкә хԝә һʼьз бькә›.

⁴⁰ Жь ван һәр дӧ тʼәмийава һʼәму ньвисаред пʼехәмбәра у Ԛануне гьредайи нә».

Мәсиһ кӧрʼе кʼе йә?

⁴¹ Гава ферьси щьвийан, Иса жь ԝан пьрси

⁴² у гот: «Һун бона Мәсиһ чь дьфькьрьн, тʼәхмина ԝә Әԝ кӧрʼе кʼе йә?» Жерʼа готьн: «Кӧрʼе Даԝьд ә».

⁴³ Иса готә ԝан: «Ле чаԝа Даԝьд Ԝи пе Рʼӧһʼ Хӧдане хԝә һʼәсаб дькә? Чьмки ԝи гот:

⁴⁴ ‹Хӧдан готә Хӧдане мьн: Ль мьле Мьни рʼасте рʼуне, һʼәта кӧ Әз дьжмьнед Тә бькьмә бьне пʼийед Тә›.

⁴⁵ Һәгәр Даԝьд Ԝи ‹Хӧдан› һʼәсаб дькә, Әԝ чаԝа дьбә кӧрʼе ԝи?»

⁴⁶ У кәсәки нькарьбу щаба Ԝи бьда у ль пәй ԝе рʼожерʼа кәсәки нәԝерьбу пьрсәк же бькьра.