Metta 18 - Пәймана Ну (Инщил)

Кʼи йә йе һәри мәзьн?

¹ Ԝи чахи шагьрт һатьнә щәм Иса у готьне: «Ль нав Пʼадшатийа Әʼзманада кʼи йә йе һәри мәзьн?»

² Иса зарʼокәк гази щәм Хԝә кьр, әԝ нав ԝанда да сәкьнандьне

³ у гот: «Әз рʼаст ԝәрʼа дьбежьм, һәгәр һун вәнәгәрʼьн у нәбьнә мина зарʼока, һун тʼӧ щар накʼәвьнә Пʼадшатийа Әʼзмана.

⁴ Аԝа кʼи кӧ мина ве зарʼоке хԝә бьчʼук кә, әԝ ә йе һәри мәзьн Пʼадшатийа Әʼзманада.

⁵ У кʼи кӧ зарʼокәкә аһа бь наве Мьн ԛәбул кә, әԝ Мьн ԛәбул дькә.

Жьрʼедәрхьстьн

⁶ Ле кʼи кӧ жь ван бьчʼука йәки, йе кӧ баԝәрийа хԝә Мьн тинә жь рʼе дәрхә, ԝирʼа һе ԛәнщ ә, ԝәки бәрашәк стуйе ԝива бе гьредане у бьне бәʼреда бьхәньԛә.

⁷ Ԝәй ль дьнйайе, бона әԝед кӧ мәрьва жь рʼе дәрдьхьн. Набә кӧ әԝ тьшт нәбьн, ле ԝәй ль ԝи кӧ мәрьв бь ԝи жь рʼе дькʼәвьн.

⁸ Һәгәр дәсте тә йан ньге тә, тә жь рʼе дәрхә, ԝи жекә у жь хԝә бавежә. Бона тә һе ԛәнщ ә кӧ тӧ ԛоп йан сәԛәт бькʼәви жийине, нә кӧ дӧ дәст йан дӧ ньгед тә һәбьн у бейи авитьне нава агьре һʼәта-һʼәтайе.

⁹ У һәгәр чʼәʼве тә, тә жь рʼе дәрдьхә, ԝи дәрхә у бавежә. Бона тә һе ԛәнщ ә кӧ тӧ бь чʼәʼвәки бькʼәви жийине, нә кӧ бь дӧ чʼәʼва бейи авитьне нава агьре доже.

Мәсәла пәза ӧндабуйи

¹⁰ Һаш жь хԝә һәбьн кӧ һун жь ван бьчʼука йәки беһӧрмәт нәкьн, чьмки Әз ԝәрʼа дьбежьм, кӧ мьлйакʼәтед ԝан ль әʼзмана тʼьме рʼуйе Баве Мьни әʼзмана дьбиньн.

¹¹ Кӧрʼе Мерьв һат кӧ йе ӧндабуйи бьгәрʼә у хьлаз кә.

¹² Һун чаԝа тʼәхмин дькьн? Һәгәр сәд пәзед мәрьвәки һәбьн у йәк жь ԝан ӧнда бә, әԝе нод нәһа нәһелә чʼийа-банийа у нәчә кӧ йа ӧндабуйи бьгәрʼә?

¹³ Ле гава бьбинә, әз рʼаст ԝәрʼа дьбежьм, әԝе бона ԝе һе гәләки ша бә, нә кӧ бона нод нәһед дьнә кӧ ӧнда нәбунә.

¹⁴ Ӧса жи Баве ԝәйи әʼзмана нахԝазә кӧ жь ван бьчʼука йәк ӧнда бә.

Бьре кӧ гӧнә дькә

¹⁵ Һәгәр бьре тә нәһәԛийе ль тә бькә, гава тӧ у әԝ тʼәне нә, ԝи ширәт кә. Һәгәр әԝи гӧһдарийа тә кьр, иди тә бьре хԝә ԛазьнщ кьр.

¹⁶ Ле һәгәр гӧһдарийа тә нәкьр, йәки йан дӧдӧйед дьн жи тʼәви хԝә һьлдә, ԝәки: ‹Бь дәве дӧ йан се шәʼда һәр тьшт избат бә›.

¹⁷ Ле һәгәр әԝи гӧһдарийа ԝан жи нәкьр, щьвинерʼа бежә. У һәгәр гӧһдарийа щьвине жи нәкьр, бьра әԝ бона тә бьбә мина пʼутпʼарьст у хәрщгьра.

¹⁸ Әз рʼаст ԝәрʼа дьбежьм, чь кӧ һун сәр әʼрде гьредьн, ль әʼзмен жи ԝе гьредайи бә у чь кӧ һун ль сәр әʼрде вәкьн, ль әʼзмен жи ԝе вәкьри бә.

¹⁹ Диса Әз рʼаст ԝәрʼа дьбежьм, һәгәр дӧдӧ жь ԝә ль сәр әʼрде бь тʼьфаԛ бона тьштәки дӧа бькьн у бьхԝазьн, Баве Мьни әʼзмана ԝе бьдә ԝә.

²⁰ Чьмки кʼидәре дӧ йан се мәрьв бь наве Мьн бьщьвьн, Әз ль ԝьр нава ԝанда мә».

Мәсәла бона бахшандьн у нәбахшандьне

²¹ Һьнге Пәтрус незики Ԝи бу у готе: «Хӧдан. Гава бьре мьн нәһәԛийе ль мьн бькә, гәрәке әз чәнд щара бьбахшиньме, һʼәта һʼәфт щара?»

²² Иса готә ԝи: «Әз набежьмә тә һʼәта һʼәфт щара, ле һʼәта һʼәфте щара һʼәфт.

²³ Чьмки Пʼадшатийа Әʼзмана мина ве йәке йә: Пʼадшаки хԝәст тʼәви хӧламед хԝә һәԛ-һʼәсабе хԝә рʼаст кә.

²⁴ Гава дәст бь һʼәсаба кьр, йәк анинә щәм ԝи, кӧ дәһә һʼәзар тәланти дәйндаре ԝи бу.

²⁵ Ле чьмки нькарьбу дәйне хԝә бьда, хԝәйе ԝи әʼмьр кьр, кӧ әԝ, жьна ԝи, зарʼед ԝи у һʼәму һәбука ԝи бенә фьротане, кӧ дәйне ԝи бе дайине.

²⁶ Һьнге хӧлам дәвәрʼуйа чу ньге ԝи, лава же кьр у гот: ‹Ль мьн сәбьр кә. Әзе һʼәму жи ль тә вәгәрʼиньм›.

²⁷ Гӧне хԝәйе ԝи ль ԝи һат, әԝ бәрʼда у дәйне ԝи жи бахшанде.

²⁸ Ле чахе әԝ хӧлам дәркʼәт, рʼасти хӧлам-һәваләки хԝә һат кӧ сәд зиви дәйндаре ԝи бу, дәст кьрә хәнәԛе у готе: ‹Тӧ чьԛаси дәйндаре мьн и бьдә!›

²⁹ Һьнге һәвале хӧлам хԝә авитә ньге ԝи, же лава кьр у готе: ‹Ль мьн сәбьр кә. Әзе ль тә вәгәрʼиньм›.

³⁰ Ле әԝи гӧһ нәда ԝи, чу әԝ авитә кәле, һʼәта кӧ әԝ дәйне хԝә бьдә.

³¹ Чахе хӧлам-һәвалед ԝийә дьн әв йәк дитьн, гәләки бәр хԝә кʼәтьн у чун хԝәйе хԝәрʼа тьштед кӧ ԛәԝьмибу гьли кьрьн.

³² Һьнге ахайе ԝи гази ԝи кьр у готе: ‹Хӧламе хьраб! Мьн һʼәму дәйне тә бахшандә тә, бона ԝе йәке кӧ тә лава жь мьн кьр.

³³ Ле жь тә нәдькʼәт кӧ тӧ жи ль хӧлам-һәвале хԝә бьһатайи рʼәʼме чаԝа кӧ әз тә һатьмә рʼәʼме?›

³⁴ У ахайе ԝи һерс кʼәт, әԝ да дәсте зӧлмдаред кәле, һʼәта кӧ һʼәму дәйне хԝә вәгәрʼинә.

³⁵ Ӧса жи Баве Мьни Әʼзмана ԝе ль сәре ԝә һәр йәки бькә, һәгәр һун бь дьл нәбахшиньнә бьре хԝә».