Îbranî 5 - Пәймана Ну (Инщил)

¹ Һәр сәрәккʼаһинәк жь нав мәрьва те бьжартьне у кʼьфшкьрьне, кӧ бона мәрьва ль бәр Хԝәде бьсәкьнә, ԝәки һʼәди у ԛӧрбана бәр гӧна бьдә.

² Әԝ чаԝа инсан дькарә бь дьле шәԝат кʼомәка ԝанрʼа бә, йед кӧ нәзан у хальфи нә, чьмки әԝ хԝәха жи нава бетʼаԛәтийада йә.

³ Ләма гәрәке әԝ чаԝа бона щьмәʼте, ӧса жи бона хԝә ԛӧрбана бона гӧна бьдә.

⁴ Кәсәк хԝәсәрихԝә ви ԛәдьри настинә, ле тʼәне әԝе кӧ жь Хԝәдеда те газикьрьне, чаԝа Һарун бу.

⁵ Ӧса жи Мәсиһ, нә кӧ Хԝәха Хԝә бьльнд кьр кӧ бьбә сәрәккʼаһин, ле Хԝәде Әԝ бьльнд кьр у Ԝирʼа гот: «Тӧ Кӧрʼе Мьн и, Тӧ иро Мьнрʼа буйи».

⁶ Чаԝа щики дьн жи дьбежә: «Тӧ һʼәта-һʼәтайе Кʼаһин и, мина Мәлкʼи-Садьԛ».

⁷ Иса жийина Хԝәйә ве дьнйайеда гәләки кʼәсәр у бь һесьра лава у рʼәща жь Ԝи дькьрьн, Йе кӧ дькарьбу Әԝ жь мьрьне хьлаз бькьра у бона мьлукти у ельмийа Ԝи һатә бьһистьне.

⁸ Рʼаст ә Әԝ Кӧрʼе Хԝәде бу, ле диса бь ԝан щәфайед Хԝә гӧһдарийе һин бу.

⁹ Гава ԝе йәкеда һатә кʼамьлкьрьне, бона һʼәмуйед кӧ гӧһдарийа Ԝи дькьн, Әԝ бу канийа хьлазбуна һʼәта-һʼәтайе

¹⁰ у жь Хԝәде һатә навкьрьне «Сәрәккʼаһине мина Мәлкʼи-Садьԛ».

Һаш жь хԝә һәбьн кӧ жь баԝәрийе нәкʼәвьн

¹¹ Бона ве йәке гәләк тьштед мәйә готьне һәнә, ле шьровәкьрьна ван зәʼмәт ә, чьмки гӧһада һун гьран бунә.

¹² Рʼастийе кʼәвә һʼәта ньһа гәрәке һун дәрсдар буна, ле һун һе һʼәԝщә нә кӧ жь готьнед Хԝәде дәрсед пешьнә садә һин бьн. Һун һәла һе һʼәԝще шир ьн, нә кӧ хԝарьна гьран.

¹³ Әԝе кӧ ширхӧр ә, әԝ нькарә һинкьрьна һәԛийе бьмәһʼинә, чьмки дәргуш ә.

¹⁴ Ле хԝарьна гьран бона мәрьвед гьһишти йә, йед кӧ сәԝдайе хԝәда кʼәти-рʼабуйи нә, ԛәнщи у хьрабийе жь һәв дәрдьхьн.