Filîpî 3 - Пәймана Ну (Инщил)

Рʼийа рʼастә бона хьлазбуне

¹ Һәйнәсәр хушк-бьрайед мьн, бь Хӧдан ша бьн! Әз ащьз набьм кӧ диса ԝан тьшта ԝәрʼа дьньвисьм, ле әԝ бона бехофийа ԝә йә.

² Һʼәвза хԝә жь «сә-кучʼька» бькьн, һʼәвза хԝә жь пʼалед хьраб бькьн, һʼәвза хԝә жь ԝан бькьн, йед кӧ ԛальб дьбьрʼьн, сьнәт дькьн.

³ Чьмки сьнәтийа рʼаст йа мә йә, кӧ бь Рʼӧһʼе Хԝәде әм дьһʼәбиньн у бь Мәсиһ Иса дьфьрʼьн. Гӧмана мә нә сәр нав-нишанед ԛальб ә,

⁴ ле рʼаст бежьм әз дькарьм гӧмана хԝә бьдьмә сәр ԝан нав-нишанед ԛальб. Һәгәр йәк дьфькьрә, кӧ гӧмана ԝи сәр ԛальб һәйә, йа мьн һе зедә һәйә.

⁵ Рʼожа һʼәйшта сьнәт бумә, жь рʼькʼьнйата Исраел ьм, жь ԛәбила Бьнйамин, ибрани мә у кӧрʼе ибранийа, алийе Ԛанунеда ферьси,

⁶ мьн кʼәрби хирәте щьвина Хԝәде дьзеранд, һьндава ԝе рʼастбуна кӧ жь Ԛануне те әз беләкʼә бум.

⁷ Ле чь кӧ кʼара мьн бу, мьн бона Мәсиһ зийан һʼәсаб кьрийә.

⁸ У сәрда жи әз һәр тьшти зийан һʼәсаб дькьм у һьмбәри ве йәке накьм, кӧ Хӧдане хԝә Мәсиһ Иса нас бькьм, кӧ кʼара сәр кʼара йә! Бона хатьре Ԝи әз жь һәр тьшти ԛәтийам у чаԝа гәмар һʼәсаб дькьм, ԝәки Мәсиһ ԛазьнщ кьм

⁹ у тʼәви Ԝи бьбьмә йәк. Иди әв рʼастийа мьн, нә кӧ жь ԛанунԛәдандьна мьн те, ле жь Хԝәде йә, йа кӧ һʼиме ԝе жь баԝәрийа сәр Мәсиһ ә.

¹⁰ Әз дьхԝазьм Ԝи у ԛәԝата рʼабуна Ԝийә жь мьрьне нас кьм у тʼәви щәфайед Ԝи бьм, бькʼәвьмә һʼале мьрьна Ԝи,

¹¹ кӧ бь аԝайики бькарьбьм бьгьһижьмә рʼабуна мьрийа.

Рʼәвина бәрбь мәрәме хԝә

¹² Әз набежьм кӧ әз иди гьһиштьмә мәрәме хԝә йан жи иди кʼамьл бумә, ле әз пәй кʼәтьмә, кӧ ԝе хәлате ԛазьнщ кьм, бона кʼижане Мәсиһ Иса әз ԛазьнщ кьрьмә.

¹³ Хушк-бьрано, әз хԝә һʼәсаб накьм, кӧ мьн әԝ йәк ԛазьнщ кьрийә, ле сәри әԝ ә, кӧ әз тьштед пьшт хԝәва һьшти бир бькьм, хԝә бавежьмә йед пешийа хԝә,

¹⁴ дьщәʼдиньм бьгьһижьмә мәрәме хԝә, ԝе ләщхәлата жорчуйине, аԝа готи газийа Хԝәдейә бь сайа Мәсиһ Иса бьстиньм.

¹⁵ Аԝа жь мә һʼәмуйа, иди кʼи «гьһишти» йә, гәрәке аһа бьфькьрә. Ле һәгәр тьштәки дьн жи дьле ԝәда һәбә, әԝе йәке жи Хԝәде ԝе бәр ԝә вәкә.

¹⁶ Ле тʼәне әм гьһиштьнә чь дәрәще, анәгори ԝе йәке бьжин.

¹⁷ Чʼәʼв бьдьнә мьн хушк-бьрано у дина хԝә бьдьнә ԝан, йед кӧ ӧса хԝә хԝәй дькьн, чаԝа кӧ мә бь рʼабун-рʼуньштьна хԝә нишани ԝә кьрийә.

¹⁸ Чьмки гәләк жийина хԝәда дьжмьнед хаче Мәсиһ ьн, бона кʼижана мьн гәләк щара ԝәрʼа готийә, ньһа жи бь гьри дьбежьм.

¹⁹ Ахьрийа ԝан ӧндабун ә, хԝәдейе ԝан зьке ԝан ә у кьред ԝанә шәрми жи рʼумәта ԝан ә. Әԝана тʼәне сәр тьштед ве дьне дьфькьрьн.

²⁰ Ле ԝәлате мә ль әʼзмана йә, жь кʼӧ әм чʼәʼвньһерʼийа Хьлазкьр, Хӧдан Иса Мәсиһ ьн.

²¹ Әԝе ԛальбе мәйә тʼәнгәзар бьгӧһезә у бькә мина ԛальбе Хԝәйи хԝәйирʼумәт, бь ԝе ԛәԝата кӧ дькарә һәр тьшти бькә бьндәсте Хԝә.