Filêmon 1 - Пәймана Ну (Инщил)

Сьлавкьрьн

¹ Жь Паԝлос, бона Мәсиһ Иса гьрти у Тимотʼейойе бьра, Фьлимоне һәвал-хәбат у дәлале хԝәрʼа,

² Афийа хушкрʼа у Архипойе һәваләскәре хԝәрʼа у ӧса жи ԝе щьвинерʼа кӧ мала тәда дьщьвә:

³ Дә бьра кʼәрәм у әʼдьлайийа Хԝәдейе Баве мә у Хӧдан Иса Мәсиһ ль ԝә бә.

Баԝәри у һʼьзкьрьна Фьлимон

⁴ Әз һәр гав жь Хԝәдейе хԝә рʼази мә, гава нава дӧайед хԝәда тә бир тиньм бьрайе Фьлимон,

⁵ чьмки бона ԝе һʼьзкьрьна тәйә һьндава тʼәмамийа щьмәʼта Хԝәдеда у баԝәрийа тәйә һьндава Хӧдан Исада дьбьһем.

⁶ Әз дӧа дькьм, ԝәки һәләԛәтийа тәйә тʼәви мә, нава баԝәрийеда мә бьгьһинә ԝе занәбуна кʼур, йа кӧ һьндава һәр тьштед мәйә ԛәнщә тʼәви Мәсиһ ә.

⁷ Бона ԝе һʼьзкьрьна дьле тәда бьрайо, әз гәләки ша бум у бина мьн фьрә бу, кӧ дьле щьмәʼта Хԝәде пе тә рʼьһʼәт буйә.

Һивикьрьна Паԝлос бона Онисимойе хӧламе Фьлимон

⁸ Бона ве йәке бь Мәсиһ чаԝа бьра, мьн дькарьбу тӧрӧш кьра, әʼмьри сәр тә бькьра, чь кӧ щайиз бу,

⁹ ле жь дәст һʼьзкьрьне, һиви дькьм. Әз чаԝа Паԝлосәки кал у ньһа жи бона Мәсиһ Иса гьрти,

¹⁰ бона лаԝе хԝә Онисимо һиви жь тә дькьм, йе кӧ ԛәйде мьнда чаԝа кӧрʼәк мьнрʼа дьне кʼәт.

¹¹ Әԝ ԝәхтәке кери тә нәдьһат, ле ньһа һьн кери тә те, һьн жи кери мьн.

¹² Әз ԝи пашда дьшиньмә щәм тә, әԝ щәгәра мьн ә.

¹³ Мьн дьхԝәст әԝ щәм хԝә бьһьшта, кӧ дәԝса тә бәр дәсте мьн буйа, һʼәта кӧ әз бона Мьзгинийе ԛәйдада мә.

¹⁴ Ле бейи тә мьн нәхԝәст тьштәки бькьм, кӧ ԛәнщийа тә ӧса нәбә, чаԝа борщәк кьрьбьнә стуйе тә, ле бь рʼәзәдьлийа тә бә.

¹⁵ Бәлки бона ве йәке әԝ ԝәхтәке жь тә дур кʼәт, кӧ әԝ һәр тʼьм бьбә пʼара тә,

¹⁶ нә кӧ чаԝа хӧлам, ле жь хӧламәки зедәтьр ә, чаԝа бьраки дәлал! Бона мьн әԝ чьԛаси дәлал ә, ле бона тә әԝе һе зедә бә, һьн алийе хӧламтийеда, һьн жи алийе Хӧданда.

¹⁷ Аԝа һәгәр тӧ мьн чаԝа һәвале хԝә һʼәсаб дьки, ԝи ӧса ԛәбул кә, чаԝа мьн.

¹⁸ Һәгәр әԝи нәһәԛик жи ль тә кьрьбә, йан тьштәки дәйндаре тә бә, сәр мьн һʼәсаб кә.

¹⁹ Әз Паԝлос бь дәсте хԝә дьньвисьм: Әзе ль тә вәгәрʼиньм (ле әз бь ве йәке нахԝазьм бежьмә тә, кӧ тӧ жийина хԝәва дәйндаре мьн и.)

²⁰ Ньһа, бьрайе мьни жь Хӧданда, ве ԛәнщийе бона мьн бькә, бона хатьре Мәсиһ дьле мьн рʼьһʼәт кә.

²¹ Әз гӧһдарийа тәда гӧман бум, ләма жи мьн әв йәк тәрʼа ньвиси, чьмки әз заньм те жь готьна мьн зедәтьр бьки.

Готьнед ахьрийе

²² Пештьри ве йәке жи, мьнрʼа щики майине һазьр кә, чьмки гӧмана мьн һәйә, кӧ Хԝәдейе щаба дӧайед ԝә бьдә, мьн пашда бьдә ԝә.

²³ Епафрасе бона наве Мәсиһ Исайи тʼәви мьн гьрти, тә сьлав дькә,

²⁴ ӧса жи Марԛос, Әристархо, Димас у Луԛа, һәвал-хәбатед мьн.

²⁵ Кʼәрәма Хӧдан Иса Мәсиһ тʼәви рʼӧһʼед ԝә бә.