Efesî 1 - Пәймана Ну (Инщил)

Сьлавкьрьн

¹ Жь Паԝлосе бь әʼмьре Хԝәде шандийе Мәсиһ Иса, ԝан мәрьвед Хԝәдерʼа, йед кӧ Әфәседа дьминьн у йәктийа Мәсиһ Исада амьн ьн:

² Дә бьра кʼәрәм у әʼдьлайийа Хԝәдейе Баве мә у Хӧдан Иса Мәсиһ ль ԝә бә.

Дӧа-дьрозгед рʼӧһʼанийә бь сайа Иса Мәсиһ бона щьһу у нәщьһуйа

³ Шькьр жь Хԝәдерʼа, Баве Хӧдане мә Иса Мәсиһ, кӧ пе һʼәму дӧа-дьрозгед рʼӧһʼанийә ль дийаре әʼзмана йәктийа Мәсиһда дӧа ль мә кьрьн.

⁴ Бәри әʼфьрандьна дьнйайе Хԝәде йәктийа Ԝида әм бьжартьн, ԝәки әм пироз у беԛӧсур бьн, ль бәр Ԝи һʼьзкьрьнеда бьжин.

⁵ Әԝи әм пешда кʼьфш кьрьбун, чаԝа ль ԛьрара Ԝи хԝәш һат, кӧ мә бь дәсте Иса Мәсиһ бькә лаԝед Хԝә.

⁶ Дә ԝәрьн әм пәсьне Ԝи бьдьн, бона ԝе кʼәрәма Ԝийә хԝәйирʼумәт, пе кʼижане йәктийа Һʼьзкьрийе Хԝәда ԛәнщи ль мә кьр.

⁷ Йәктийа Ԝида әм аза бунә бь хуна Ԝи, аԝа готи афубуна гӧна стандийә. Әва йәка жь дәԝләмәндтийа кʼәрәма Ԝи йә,

⁸ йа кӧ Ԝи бь мәрʼдани сәр мәда баранд, пе һʼәму сәрԝахти у фәʼмдарийе.

⁹ Әԝи сӧрʼа хԝәстьна Хԝә мәва әʼйан кьр, чаԝа ль Ԝи хԝәш һат, йа кӧ һе пешда ԛьрар кьрьбу, ԝәки йәктийа Мәсиһда бинә сери,

¹⁰ кӧ гава ԝәхт перʼа бьгьһижә, әԝ тʼьвдир мийасәр бә, һʼәму тьшт бьн сәрԝертийа Мәсиһда гьредайи бьн, һьн һәр тьштед ль әʼрде, һьн жи ль әʼзмана.

¹¹ Чаԝа Хԝәде ԛьрара Хԝәда пешда кʼьфш кьрьбу, кӧ һәр тьшт ль гора хԝәстьн у әʼмьре Ԝи бә, әм щьһу йәктийа Мәсиһда пʼара Хԝәде кʼәтьнә,

¹² ԝәки әм пәсьне рʼумәта Ԝи бьдьн кӧ мә пешда гӧмана хԝә данийә сәр Мәсиһ.

¹³ Йәктийа Ԝида һун нәщьһу жи бунә пʼара Хԝәде, гава ԝә хәбәра рʼастийе, аԝа готи Мьзгинийа хьлазбуна хԝә бьһист. Ԝә баԝәрийа хԝә Ԝи ани у бь Рʼӧһʼе Пирози создайи һатьнә моркьрьне.

¹⁴ Рʼӧһʼе Пироз чаԝа бьһе һатийә дайине һʼәта әм созе Хԝәде ԝар бьн, чахе Хԝәде щьмәʼта Хԝә лап аза кә, бона пәсьндайина рʼумәта Хԝә.

Дӧайе Паԝлос

¹⁵ Бона ве йәке мьн жь һьнгева кӧ бона баԝәрийа ԝәйә сәр Хӧдан Иса у әԝ һʼьзкьрьна ԝәйә һьндава тʼәмамийа щьмәʼта Хԝәдеда бьһистийә,

¹⁶ бона ԝә мьн дәст жь шькьрдайине нәкʼьшандийә. Әз тʼьме нава дӧайед хԝәда ԝә бир тиньм,

¹⁷ ԝәки Хԝәдейе Хӧдане мә Иса Мәсиһ, Баве хԝәйирʼумәт, Рʼӧһʼе сәрԝахтийе у әʼйантийе бьдә ԝә, кӧ һун Ԝи тʼам нас бькьн.

¹⁸ Бьра чʼәʼвед рʼӧһʼе ԝә вәбьн, ԝәки һун фәʼм бькьн, чь йә әԝ гӧмана кӧ Ԝи гази ԝә кьрийә у чь йә әԝ дәԝләмәндтийа рʼумәта Ԝи, йа кӧ щьмәʼта Ԝи ԝе ԝар бә

¹⁹ у чь йә әԝ ԛәԝата Ԝийә мәзьнә беһьмбәр, йа кӧ нав мә баԝәрмәндада дьхәбьтә. Әв ә әԝ ԛәԝата Ԝийә зор,

²⁰ йа кӧ Хԝәде сәр Мәсиһ да хәбате, гава Әԝ жь нава мьрийа рʼакьр у ль дийаре әʼзмана кʼеләка Хԝәйә рʼасте да рʼуньштандьне,

²¹ Әԝ дани сәр һʼәму сәрԝертийа, һʼӧкӧмәтийа, ԛәԝата, хӧдантийа у ӧса жи сәр һʼәму навед кӧ тенә һьлдане, нә кӧ тʼәне ль ве дьне, ле ԝе дьне жи.

²² У Хԝәде һәр тьшт кьрә бьн пʼийед Ԝи у Әԝ бона щьвине кʼьфш кьр чаԝа сәрԝере һәр тьшти.

²³ Щьвин жи бәдәна Мәсиһ ә, тʼәмамбуна Ԝи йә, кӧ Хԝәха һәр тьшт ә, һәр тьшти тʼәмам дькә.