شُله رسولا 9 - Пәймана Ну (Инщил)

Чаԝа Шаԝул ль Иса вәдьгәрʼә

¹ Шаԝул жи һʼәта һьнге һе гәф ль шагьртед Хӧдан дьхԝар кӧ ԝан бьдә кӧштьне. Әԝ чу щәм сәрәккʼаһин,

² дәстурнәʼмә сәр кʼьништед Шаме жь ԝи хԝәстьн, ԝәки һʼӧкӧме ԝи һәбә жьн у меред кӧ ль пәй ве Рʼе дьчьн һәгәр бьбинә, ԝан бьгьрә гьредайи бинә Оршәлиме.

³ Гава дьчу незики Шаме бу, ньшкева жь әʼзмен рʼонайике дора ԝи шәԝԛ да.

⁴ Әԝ кʼәтә әʼрде у дәнгәк бьһист кӧ ԝирʼа дьгот: «Шаԝул, Шаԝул! Тӧ чьма Мьн дьзерини?»

⁵ Әԝи жи гот: «Тӧ кʼи йи, Хӧдан?» Ԝи дәнги готе: «Әз әԝ Иса мә, Йе кӧ тӧ дьзерини.

⁶ Дә ньһа рʼабә һәрʼә бажер, ԝе тәрʼа бе готьне те чь бьки».

⁷ Әԝ мәрьвед кӧ тʼәви ԝи дьчун сар бун сәкьнин у зар-зьман кʼәтьн. Ԝан әԝ дәнг дьбьһист, ле кәсәк нәдьдитьн.

⁸ Шаԝул жь әʼрде рʼабу, чʼәʼвед ԝи вәкьри бун, ле тьшт нәдьдит. Һьнге дәсте ԝи гьртьн бьрьнә Шаме.

⁹ Әԝ се рʼожа кор ма, нә хԝар у нә жи вәхԝар.

¹⁰ Шамеда шагьртәки наве ԝи Һананийа һәбу, Хӧдан дитьнокеда һатә бәр чʼәʼва у ԝирʼа гот: «Һананийа!» Әԝи гот: «Әз вьра мә, Хӧдан».

¹¹ Хӧдан ԝирʼа гот: «Рʼабә һәрʼә ԝе кʼуча кӧ жерʼа Рʼаст дьбежьн, мала Щьһудада бона йәки жь Тарсусе наве ԝи Шаԝул бьпьрсә, чьмки ва йә әԝ дӧа дькә,

¹² дина хԝә дайе, ва мәрик дитьнокеда һатә бәр чʼәʼва, наве ԝи Һананийа, әԝ һат дәстед хԝә данинә сәр ԝи, кӧ әԝ диса бьбинә».

¹³ Һананийа ле вәгәрʼанд у гот: «Хӧдан, бона ви мәрьви мьн жь гәләка бьһистийә, ԝәки Оршәлимеда ԝи чьԛас хьраби ль щьмәʼта Тә кьрийә.

¹⁴ Вьр жи алийе сәрәкед кʼаһинада һʼӧкӧме ԝи һәйә, һʼәмуйед кӧ гази наве Тә дькьн бьгьрә».

¹⁵ Ле Хӧдан жерʼа гот: «Тӧ һәрʼә, чьмки Мьн әԝ чаԝа һащәтәк бьжартийә, ԝәки наве Мьн нәщьһуйа, пʼадша у зарʼед Исраелева бьдә наскьрьне.

¹⁶ Әзе Хԝәха нишани ԝи кьм, кӧ чьԛаси гәрәке бона наве Мьн щәфе бькʼьшинә».

¹⁷ Һананийа жи чу кʼәтә ԝе мале, дәсте хԝә дани сәр ԝи у готе: «Шаԝул бьра! Хӧдан әз шандьмә, әԝ Исайе рʼева рʼасти тә һат, ԝәки тӧ диса бьбини у бь Рʼӧһʼе Пироз тʼьжи би».

¹⁸ Дәстхԝәда жь чʼәʼвед ԝи мина капәке тьшт же ԝарийан, дит, рʼабу пе аве һатә ньхӧмандьне,

¹⁹ хԝарьн хԝар у ԛәԝата ԝи һатә щи. Чәнд рʼожа Шаԝул щәм шагьртед Шамеда ма.

Шаԝул бажаре Шамеда Мьзгинийе дьдә

²⁰ Дәстхԝәда Шаԝул дәстпекьр кʼьништада бона Иса даннасин кьр у гот кӧ: «Әԝ Кӧрʼе Хԝәде йә».

²¹ Һʼәмуйед кӧ дьбьһистьн, әʼщебмайи дьман у дьготьн: «Әва әԝ нинә, кӧ Оршәлимеда йед кӧ гази Ви Нави дькьрьн дькӧштьн? У бона ԝе йәке һатийә вьр жи, ԝәки ԝан бьгьрә у бьбә бьдә дәсте сәрәкед кʼаһина?»

²² Ле Шаԝул һинкьрьнеда һе ԛәԝат дьбу, избат дькьр кӧ Мәсиһ һәма Иса йә у дәнге һʼәму щьһуйед Шамеда дьда бьрʼине.

²³ Гава гәләк рʼож дәрбаз бун, щьһу шеԝьрин кӧ ԝи бькӧжьн,

²⁴ ле Шаԝул нета ԝанә хьраб һʼәсийа. Әԝ шәв у рʼож бәр дәргәһед бажер бун кӧ ԝи бькӧжьн,

²⁵ ле шагьртед ԝи жи шәв әԝ бь зәмбиле диԝерва дахьстьн.

Шаԝул Оршәлимеда

²⁶ Гава Шаԝул һатә Оршәлиме, ԝи дькьр кӧ тʼәви шагьрта бә, ле һʼәму жь ԝи дьтьрсийан, ԝан баԝәр нәдькьрьн кӧ әԝ жи буйә шагьрт.

²⁷ Һьнге Барнабас әԝ һьлда бьрә щәм шандийа у ԝанрʼа гьли кьр, кӧ әԝи рʼеда чаԝа Хӧдан дитийә у тʼәви ԝи хәбәр дайә, Шамеда жи чаԝа меркʼими наве Иса даннасин кьрийә.

²⁸ Шаԝул Оршәлимеда тʼәви ԝан рʼадьбу-рʼудьньшт у бь наве Иса Хӧдан меркʼими даннасин дькьр.

²⁹ Ӧса жи тʼәви щьһуйед кӧ бь йунани хәбәр дьдан бь хәбәрдане дькʼәтә дәʼԝе, ԝана жи дькьр кӧ әԝ бькӧшта.

³⁰ Гава бьра ве йәке һʼәсийан, әԝ бәржер бьрьнә Ԛәйсәрийе у дәрбази Тарсусе кьрьн.

³¹ Аԝа щьвин ль тʼәмамийа Щьһустане, Щәлиле у Самәрйайе дәмәке әʼдьлайийеда бу, рʼӧһʼанийеда ава дьбу, бь хофа Хӧдан у бь дьлдайина Рʼӧһʼе Пироз пешда дьчу, баԝәрмәнд зедә дьбун.

Ԛәнщбуна Әйнейас

³² Пәтрус жи һʼәму щийа дьгәрʼийа у бәржери щәм щьмәʼта Хԝәдейә Лидайе жи бу.

³³ Ԝьр мәрьвәк дит наве ԝи Әйнейас, кӧ һʼәйшт салед ԝи бун, шьлушәʼт щи-ньвинада пʼалдайи бу.

³⁴ Пәтрус ԝирʼа гот: «Әйнейас! Иса Мәсиһ тә ԛәнщ дькә. Рʼабә у ньвина хԝә бьдә һәв». Әԝ перʼа-перʼа рʼабу сәр хԝә.

³⁵ Һʼәму бьнәлийед Лидайе у дәшта Шароне әԝ дитьн у бәрбь Хӧдан вәгәрʼийан.

Сахбуна Табитʼайе

³⁶ Йафайеда кʼӧлфәтәкә шагьрт һәбу, наве ԝе Табитʼа, кӧ «Хәзал» те ԝәлгәрʼандьне. Әва нава һʼәму ԛәнщи у херкьрьнада мабу.

³⁷ Ԝан рʼожада әԝа нәхԝәш кʼәт мьр у әԝ шуштьн ода жорьнда данин.

³⁸ Йафа незики Лидайе бу. Гава шагьрта бьһист кӧ Пәтрус ль ԝьр ә, дӧ мәри шандьн һиви кьрьн у готьн: «Дәрәнги нәбә зу ԝәрә щәм мә».

³⁹ Пәтрус жи рʼабу тʼәви ԝан һат. Гава гьһиштә ԝьр, әԝ бьрьнә ода жорьн, һʼәму жьнәбийа дора ԝи гьрт у бь гьри әԝ кʼьнщ у кьрасед кӧ сахийа хԝәда Хәзале бона ԝан дьрутьбун, нишани ԝи дьдан.

⁴⁰ Һьнге Пәтрус һʼәму дәрхьстьнә дәрва, чок да дӧа кьр у сәр щьнйазда вәгәрʼийа гот: «Табитʼа! Рʼабә сәр хԝә». Әԝе чʼәʼвед хԝә вәкьрьн, ль Пәтрус ньһерʼи, рʼабу рʼуньшт.

⁴¹ Әԝи дәсте хԝә да ԝе рʼакьрә пʼийа, паше гази щьмәʼта Хԝәде у жьнәбийа кьр, әԝ сах бәр ԝан да сәкьнандьне.

⁴² Әва йәка тʼәмамийа Йафайеда бәла бу у гәләка баԝәрийа хԝә Хӧдан анин.

⁴³ Пәтрус гәләк рʼожа ль Йафайе мала Шьмһʼуне чʼәрмкәрда ма.