شُله رسولا 1 - Пәймана Ну (Инщил)

Бона Рʼӧһʼе Пирози создайи

¹ Тʼейофилойе хԝәйиԛәдьр, мьн кʼьтеба хԝәйә пешьнда дәрһәԛа ԝан һʼәму тьштада ньвиси, чь кӧ Иса кьр у һин кьр, жь серида

² һʼәта ԝе рʼожа кӧ бәрбь әʼзмен һатә һьлатьне. Ле һе бәри әʼзмен һьлатьне Әԝи бь Рʼӧһʼе Пироз тʼәми ль шандийед Хԝәйә бьжарти кьр.

³ Пәй ԝан щәфайед Хԝәрʼа Әԝи гәләк щара Хԝә нишани ԝан дьда, рʼаст дьда избаткьрьне кӧ Әԝ сах ә. Навбәра чьл рʼожида ԝанва хӧйа дьбу у дәрһәԛа Пʼадшатийа Хԝәдеда ԝанарʼа хәбәр дьда.

⁴ Щарәке гава Әԝи тʼәви ԝан нан дьхԝар, тʼәми да ԝан у гот: «Жь Оршәлиме дәрнәкʼәвьн, ле бәле һивийа созе Баве бьсәкьньн, бона кʼижани ԝә жь Мьн бьһист.

⁵ Йуһʼәнна бь аве ньхӧманд, ле һуне чәнд рʼожа шунда бь Рʼӧһʼе Пироз бенә ньхӧмандьне».

Жорһьлатьна Иса

⁶ Гава шагьрт һәврʼа щики бун, жь Иса пьрсин у готьне: «Хӧдан, ви зәманида Те Пʼадшатийа Исраеле ль ԝан вәгәрʼини?»

⁷ Әԝи ль ԝан вәгәрʼанд у гот: «Әԝ нә ише ԝә йә кӧ һун ԝан ԝәхт у зәмана бьзаньбьн йед кӧ Баве бь һʼӧкӧме Хԝә кʼьфш кьрьнә.

⁸ Ле гава Рʼӧһʼе Пироз бе сәр ԝә, һуне ԛәԝате бьстиньн у жь Оршәлимеда гьрти тʼәмамийа Щьһустане, Самәрйайе у һʼәта сәре дьне жи бьбьнә шәʼдед Мьн».

⁹ Гава әв йәк гот, бәр чʼәʼве ԝан бәрбь әʼзмен һатә һьлатьне у әʼԝрәки жь бәр чʼәʼве ԝан Әԝ вәшарт.

¹⁰ Әԝ һе зурʼ бьбун ль чуйина Ԝийә әʼзмен дьньһерʼин, ва дӧ мәрьвед кʼьнщсьпи щәм ԝан сәкьнин

¹¹ у готьн: «Гәли щәлилийа! Һун чьма ӧса сәкьни нә у ль әʼзмен дьньһерʼьн? Әԝ Исайе кӧ жь нав ԝә һатә һьлатьне, ԝе ӧса жи бе, чаԝа ԝә дит Әԝ чу әʼзмен».

Бьжартьна Матийо дәԝса Щьһудайе Исхәрйоти

¹² Һьнге әԝана жь чʼийайе Зәйтʼуне вәгәрʼийанә Оршәлиме, кӧ рʼийа рʼожәкә шәмийе дури Оршәлиме бу.

¹³ Гава һатьнә бажер, чунә ода мәзьнә жорьн, әԝ щийе кӧ Пәтрус у Йуһʼәнна, Аԛуб, Әндраԝьс, Филипо, Тʼума, Бәртоломәйо, Мәтта, Аԛубе Һалфаԝо, Шьмһʼуне ԝәлатпʼарьст у Щьһудайе Аԛуб теда дьман.

¹⁴ Ван һʼәмуйа һәр гав һәврʼа тʼәви кʼӧлфәта у Мәрйәма дийа Иса у бьрайед Ԝи дӧа дькьрьн.

¹⁵ Ԝан рʼожада Пәтрус нава баԝәрмәндада рʼабу, (кӧ ль ԝьр ԛаси сәд бист мәрьви бун) у гот:

¹⁶ «Гәли бьра! Гәрәке әв ньвисара бьһата сери, чаԝа кӧ бәри ве йәке Рʼӧһʼе Пироз бь дәве Даԝьд бона Щьһуда готьбу, кӧ әԝ бу рʼебәре ԝан, йед кӧ Иса гьртьн.

¹⁷ Әԝ тʼәви мә нав һʼәсабе мәда бу у пʼара ԝи жи нава ви ԛӧльхида бу».

¹⁸ (Әԝи бь һәԛе кьре хԝәйи нәһәԛ әʼрдәк станд у ль ԝьр сәр сери кʼәт, зьк ле ԛәльши дьл-һʼьнаве ԝи һʼәму рʼьжийан.

¹⁹ Әва йәка һʼәму бьнәлийед Оршәлимева әʼйан бу, һʼәта бь зьмане хԝә жи ԝи әʼрдирʼа Һәԛьлдьма готьн, аԝа готи «Әʼрде хуне».)

²⁰ Пәтрус думайи кьр гот: «Чаԝа кʼьтеба Зәбурада жи ньвисар ә: ‹Дә бьра мала ԝи хьрабә бә, кәсәк теда нәминә› у: ‹Дә бьра ԛӧльхе ԝийи сәрԝертийе йәки дьн бьстинә›.

²¹ Аԝа гәрәке йәк жь ԝан мера бә, кʼижан кӧ тʼәмамийа ԝи ԝәхти тʼәви мә бунә гава Хӧдан Иса тʼәви мә дьчу дьһат,

²² жь ньхӧмандьна Йуһʼәннада гьрти һʼәта ԝе рʼожа кӧ Әԝ жь нав мә бәрбь әʼзмен һатә һьлатьне. Әԝ гәрәке тʼәви мә бьбә шәʼде рʼабуна Ԝийә жь мьрьне».

²³ Дӧ мәри данә сәкьнандьне, йәк Усьве кӧ жерʼа Барсабо дьготьн (кӧ наве ԝи данибун Йусто) у йе дьн Матийо.

²⁴ Дӧа кьрьн у готьн: «Хӧдан, Тӧ кӧ дьле һәр кәси зани, жь ван һәр дӧйа кʼижани кӧ Тӧ дьбьжери бьдә кʼьфше,

²⁵ ԝәки әви ԛӧльхе шандитийе бьстинә, жь кʼижани Щьһуда же кʼәт кӧ һәрʼә щийе хԝә».

²⁶ Пʼәшк сәр ԝан авитьн, пʼара Матийо кʼәт у әԝ сәр һʼәсабе йанздәһ шандийада зедә бу.