یوحنا 1 1 - Пәймана Ну (Инщил)

Хәбәра жийине

¹ Әм сәр ԝе йәке ԝәрʼа дьбежьн, чь кӧ сәре серида һәбу, мә әԝ йәк бьһист, бь чʼәʼве хԝә дит, ль Ԝи ньһерʼи у дәст данә Ԝи: Әԝ Хәбәра жийине йә.

² Жийин әʼйан бу, мә әԝ дит, әм шәʼдәтийе дьдьн у бона ԝе жийина һʼәта-һʼәтайе ԝәрʼа дьбежьн, йа кӧ щәм Баве бу у мәва әʼйан бу.

³ Әԝ тьште кӧ мә дит у бьһист әм ԝәрʼа жи дьбежьн, ԝәки һун жи мәва тʼәвгьредайи бьн у әв тʼәвгьредана мә жи тʼәви Бав у Кӧрʼе Ԝи Иса Мәсиһ ә.

⁴ Әм ван тьшта ԝәрʼа дьньвисьн, ԝәки шабуна мә тʼәмам бә.

Хԝәде рʼонайи йә: Әм нава рʼонайийа Ԝида һәрʼьн

⁵ Әв ә әԝ готьна кӧ мә жь Ԝи бьһист у әʼлами ԝә дькьн, кӧ Хԝәде рʼонайи йә у тʼӧ тәʼри Ԝида тʼӧнә.

⁶ Һәгәр әм бежьн: «Әм Хԝәдева тʼәвгьредайи нә», ле тәʼрийеда бьгәрʼьн, әм дәрәԝа дькьн у рʼастийе накьн.

⁷ Ле һәгәр әм рʼонайеда бьгәрʼьн, чаԝа кӧ Әԝ рʼонайеда йә, әме һәвва тʼәвгьредайи бьн у хуна Исайе Кӧрʼе Ԝи ԝе мә жь һʼәму гӧна паԛьж кә.

⁸ Һәгәр әм бежьн: «Гӧне мә тʼӧнә», әм хԝәха хԝә дьхапиньн у рʼасти нава мәда тʼӧнә.

⁹ Ле һәгәр әм гӧнед хԝә бьдьнә рʼуйе хԝә, Әԝ хԝәйе созе Хԝә йә у һәԛийе дькә, ԝе гӧнед мә бьбахшинә у мә жь һʼәму нәһәԛийа паԛьж кә.

¹⁰ Һәгәр әм бежьн: «Мә гӧнә нәкьрийә», әм Ԝи дәрәԝин дәрдьхьн у хәбәра Ԝи нава мәда тʼӧнә.