Zenez 9 - Kreol Morisyen OT Portions

Bondie fer enn lalians ek Noe

¹ Bondie beni Noe ek so bann garson, e li dir zot: “Fer zanfan, ogmante e ranpli later.

² Tou bann zanimo lor later, bann zwazo, bann ti-bebet ek bann pwason dan lamer pou per zot e pou soumet divan zot. Mo met tousala dan zot lame.

³ Mo donn zot tou bann kreatir vivan kouma nouritir. Avan, mo ti donn zot bann plant pou manze. Asterla, mo donn zot tou.

⁴ Me fode pa zot manz laser avek so lavi, setadir so disan.

⁵ Pou zot disan osi mo pou dimann kont. Si enn zanimo touy enn dimoun, mo pou dimann li kont. Si enn dimoun touy enn lot dimoun, mo pou dimann li kont.

⁶ Si kikenn vers disan enn dimoun, so disan osi pou verse parey. Parski Bondie finn kre dimoun dan so prop resanblans.

⁷ Kanta zot, fer boukou zanfan, ogmante e ranpli later.”

⁸ Lerla, Bondie dir Noe ek so bann garson:

⁹ “Mo pe fer enn lalians avek zot, ek zot bann desandan apre zot.

¹⁰ Sa lalians la konsern osi bann zwazo, bann zanimo domestik ek bann zanimo sovaz. Setadir, tou seki finn sorti dan bato avek zot.

¹¹ Mo fer enn lalians ar zot tou: zame mo pou fer enn lot deliz detrir later ek bann kreatir vivan.”

¹² Bondie dir: “Ala sign lalians ki mo pe fer ant mwa ek zot, ek tou bann kreatir vivan pou touzour:

¹³ Mo met mo larkansiel dan niaz. Samem pou sign mo lalians ant mwa ek bann abitan later.

¹⁴ Sak fwa mo fer niaz kouver lesiel, e ki larkansiel paret,

¹⁵ mo pou rapel lalians ki mo finn fer avek zot ek tou bann kreatir vivan. Zame pa pou ena ankor deliz pou detrir lavi lor later.

¹⁶ Kan mo trouv larkansiel dan niaz, mo pou rapel lalians eternel ki mo finn fer avek tou bann kreatir vivan lor later.”

¹⁷ Bondie dir Noe: “Samem sign mo lalians ki mo fer avek tou seki vivan lor later.”

Noe ek so bann garson

¹⁸ Bann garson Noe ki finn sorti dan bato apel Sem, Kam ek Zafet. Plitar, Kam gagn enn garson ki li apel Kanaan.

¹⁹ Bann desandan sa trwa garson Noe lamem ki finn peple later.

²⁰ Noe enn planter e limem premie dimoun ki fer plantasion rezin.

²¹ Enn zour li bwar divin e li sou. Lerla li alonz touni dan so latant.

²² Kam, papa Kanaan, trouv so papa touni, e li al dir sa so de frer.

²³ Sem ek Zafet met enn latwal lor zot zepol. Zot mars an-aryer e zot kouver zot papa. Zot figir tourn lot kote, e zot pa trouv zot papa touni.

²⁴ Kan Noe desoule, li aprann seki so deziem garson finn fer.

²⁵ Li dir: “Malediksion lor Kanaan; li pou enn dernie esklav pou so bann frer.

²⁶ Beni Sem SEGNER mo Bondie. Fer Kanaan vinn so esklav.

²⁷ Donn Zafet boukou later. Fer so desandan viv ansam ar desandan Sem, e fer Kanaan vinn so esklav.”

²⁸ Apre deliz, Noe viv ankor 350 an.

²⁹ Li mor laz 950 an.