Zenez 7 - Kreol Morisyen OT Portions

Noe rant dan bato

¹ LESEGNER dir Noe: “Rant dan bato, twa ek tou to fami. Mo finn trouve ki parmi sa zenerasion la, to tousel enn zom zis ek fidel divan mwa.

² Pran avek twa set mal ek set femel parmi sak lespes zanimo ki pir. Me pran enn sel mal ek enn femel dan sak ras zanimo ki inpir.

³ Pran osi set per parmi sak lespes zwazo, pou ki zot ras prezerve lor later.

⁴ Dan set zour, mo pou fer lapli tonbe e li pou dire 40 zour ek 40 nwit. Mo pou balye tou bann kreatir vivan ki mo finn kre lor later.”

⁵ Noe fer tou seki LESEGNER komann li.

⁶ Noe ena 600 an kan deliz koumanse lor later.

⁷ Li rant dan bato avek so bann garson, so fam, ek so bann belfi, pou sov zot lavi akoz deliz.

^8-9 Bann zanimo pir ek inpir, bann zwazo ek bann lezot bebet ki mars lor later rant dan bato avek Noe. Li fer zot rant de par de, enn mal ek enn femel, parey kouma Bondie finn komann li.

¹⁰ Set zour plitar, deliz koumanse lor later.

Deliz kouver later

^11-12 Zour ki Noe gagn 600 an, de mwa ek 17 zour, dilo souterin koumans sourse partou. Bann lafnet dan lesiel ouver e devers lapli lor later pandan 40 zour ek 40 nwit.

¹³ Sa zour la, Noe rant dan bato avek so fam, so 3 garson, Sem, Kam ek Zafet, ek so 3 belfi.

¹⁴ Zot pran avek zot, tou bann lespes zanimo sovaz, zanimo domestik ek reptil ki ranpe lor later. Zot pran osi tou bann lespes zwazo ek bann lezot bebet ki ena lezel.

¹⁵ Tou bann kreatir vivan rant dan bato avek Noe, de par de.

¹⁶ Zot tou rantre, enn mal ek enn femel dan sak lespes, parey kouma Bondie finn komann Noe. Apre sa LESEGNER ferm laport deryer li.

¹⁷ Deliz kontigne pandan 40 zour lor later. Dilo mont bien ot e bato la flote.

¹⁸ Nivo dilo kontign ogmante boukou. Bato la derive lor dilo.

¹⁹ Nivo dilo kontign monte ziska tou bann pli ot montagn kouver.

²⁰ Dilo mont 7 met pli ot ki bann pwint montagn.

²¹ Tou kreatir vivan lor later mor: bann zwazo, zanimo, ti bebet ek dimoun.

²² Tou seki ena lavi lor later mor.

²³ Ala ki manier LESEGNER balye tou seki vivan lor later. Tou mor: dimoun, zanimo, ti bebet ek zwazo. Zis Noe ek seki avek li dan bato reysi sape.

²⁴ Nivo dilo res ot lor later pandan 150 zour.