Zenez 6 - Kreol Morisyen OT Portions

Zistwar Deliz Pese bann dimoun

¹ Kan dimoun pe ogmante lor later, boukou tifi pe pran nesans.

² Bann abitan lesiel trouv bann tifi la bien zoli. Zot vinn marye avek seki zot swazire.

³ Lerla, LESEGNER dir: “Mo souf lavi pa pou res dan bann imin pou touzour, parski zot zis enn bann mortel. Zot lavi pa pou depas 120 an.”

⁴ Sa lepok la, e mem apre, ena bann zean lor later. Zot desandan bann abitan lesiel ek bann tifi imin. Zot bann gran gerye e zot bien renome.

⁵ LESEGNER trouve ki bann dimoun finn vinn bien move lor later. Zot leker touletan ranpli ar lemal.

⁶ LESEGNER regrete ki li finn met bann imin lor later. Sa fer so leker fermal.

⁷ Li dir: “Mo pou detrir tou dimoun lor later. Mo pou balye zot tou, dimoun, zanimo, bebet, ek zwazo. Mo regrete ki mo finn kre zot.”

⁸ Me Noe gagn lestim LESEGNER.

Bondie desid pou epargne Noe

⁹ Ala zistwar Noe. Parmi bann zenerasion dan so lepok, Noe enn zom zis, san repros, e li mars avek Bondie.

¹⁰ Li ena 3 garson: Sem, Kam ek Zafet.

^11-12 Bondie trouv tou lezot dimoun koronpi, e ena laviolans partou lor later. Zot tou pe swiv sime lemal.

¹³ Lerla, Bondie dir Noe: “Mo finn desid pou eliminn tou dimoun. Akoz zotmem ki later finn ranpli ek violans. Asterla, mo pou detrir zot tou ansam ar later.

¹⁴ Pran bann meyer dibwa e aranz enn bato. Met plizir kabinn ladan. Mastik so plans andan ek deor avek koltar.

¹⁵ Ala ki dimansion to pou fer li: 150 met longer, 25 met larzer, e 15 met oter.

¹⁶ Met so plafon 50 santimet pli lao ki so rebor. Bato la bizin ena 3 letaz e to ava met so laport dan enn flan.

¹⁷ Mwa, mo pou fer enn deliz pas lor later pou detrir tou seki ena lavi anba lesiel. Nanye pa pou sape.

¹⁸ Me ala mo pe fer enn lalians avek twa. Rant dan bato, twa, to fam, to bann garson ek to bann belfi.

¹⁹ Pran enn mal ek enn femel dan sak lespes parmi tou bann kreatir vivan. Met zot dan bato pouki zot res vivan avek twa.

²⁰ Pran de dan sak lespes zwazo, dan sak lespes zanimo ek dan sak lespes ti bebet ki ranpe lor later. Amenn zot dan bato avek twa pou gard zot vivan.

²¹ Stok bann provizion nouritir pou twa ek pou tou seki pou avek twa.”

²² Noe fer tou seki Bondie komann li.