Zenez 46 - Kreol Morisyen OT Portions

Zakob al Lezip avek so fami

¹ Zakob pran tou seki li ena, e li koumans so vwayaz pou al Lezip. Li ariv dan Berseba. Laba, li ofer bann sakrifis anloner Bondie ki so papa Izaak ti adore.

² Aswar, Bondie koz avek Izrael dan enn rev e dir li: “Zakob! Zakob!” Li reponn: “Wi, mo pe ekout twa.”

³ Bondie dir li: “Momem Bondie, Bondie to papa. Pa bizin per pou al Lezip. Mo pou fer to bann desandan vinn enn gran pep laba.

⁴ Mo pou al avek twa dan Lezip, e enn zour, mo pou fer twa retourn isi. Kan to pou mor, Zozef pou ferm to lizie ar so prop lame.”

⁵ Zakob kit Berseba. So bann garson met li, zot fam ek zot zanfan, dan bann kales ki Faraon ti done pou zot vwayaz.

^6-7 Zot amenn tou zot bann troupo avek zot. Zot amenn osi tou bann dibien ki zot ena dan Kanaan. Zakob ariv Lezip avek tou so fami: so bann garson, so bann tifi, ek tou so bann tizanfan.

Lalis fami Zakob ki finn al Lezip

⁸ Ala lalis bann Izraelit ki finn al dan Lezip avek Zakob: Riben, so premiene,

⁹ ek so bann garson Enok, Palou, Esronn, ek Karmi.

¹⁰ Simeon ek so bann garson, Yemouel, Yamin, Ohad, Yakin, Soar, ek Saoul. Mama Saoul enn Kananeenn.

¹¹ Levi ek so bann garson Gersonn, Keat, ek Merari.

¹² Zida ek so bann garson Sela, Peres, ek Zera. Zida ti ena de lot garson, Er ek Onann. Me zot ti mor dan pei Kanaan. Peres ena de garson, Esronn ek Amoul.

¹³ Isakar ek so bann garson Tola, Pouva, Yasoub, ek Simronn.

¹⁴ Zabilon ek so bann garson Sered, Elon, ek Yaleel.

¹⁵ Sa bannla bann garson Lea ek Zakob. Zot finn ne dan Padann-Aram. Ena osi zot tifi Dina. Avek zot bann zanfan, zot ti 33 antou.

¹⁶ Gad ek so bann garson Sifionn, Agi, Souni, Esbon, Eri, Arodi, ek Areli.

¹⁷ Aser ek so bann garson Imna, Isva, Isvi, ek Beria. Ena osi zot ser Sera. Beria ena de garson: Eber ek Malkiel.

¹⁸ Sa bannla 16 desandan Zilpa ek Zakob. Zilpa mem ki Laban ti donn so tifi Lea kouma servant.

¹⁹ Rasel, fam Zakob, finn donn li de garson: Zozef ek Benzamin.

²⁰ Zozef finn gagn Manase ek Efraim avek so fam Asnat dan Lezip. Papa Asnat apel Potifera, enn pret dan Onn.

²¹ Benzamin ena dis garson: Bela, Beker, Asbel, Gera, Naaman, Ei, Ros, Moupim, Houpim, ek Ard.

²² Sa bannla 14 desandan Zakob ek Rasel.

²³ Dann ek so garson Housim.

²⁴ Neftali ek so bann garson Yasiel, Gouni, Yetzer, ek Silem.

²⁵ Sa bannla set desandan Bila ek Zakob. Bila mem ki Laban ti donn so tifi Rasel kouma servant.

²⁶ Bann desandan Zakob ki finn al Lezip avek li, zot antou 66. Ladan, pa kont so bann belfi.

²⁷ Zozef ena de garson ki finn ne dan Lezip. Alor, ena antou 70 desandan Zakob ki finn al Lezip.

Zakob ek so fami dan Lezip

²⁸ Izrael avoy Zida par devan kot Zozef pou prepar so vwayaz dan Gosenn. Kan zot ariv laba,

²⁹ Zozef prepar so kales, e li al akeyir so papa dan Gosenn. Kouma li zwenn so papa, li may so likou e li plore enn bon letan.

³⁰ Izrael dir Zozef: “Asterla mo kapav mor trankil, parski mo finn retrouv twa vivan.”

³¹ Zozef dir so bann frer e tou lafami so papa: “Mo pe al dir Faraon ki mo bann frer ek tou lafami mo papa ki sorti Kanaan, finn vini.

³² Mo pou fer li kone ki zot bann elver, e ki zot okip bann troupo. Mo pou osi fer li kone ki zot finn vinn avek zot bann troupo mouton, kabri, bef, ek tou zot dibien.

³³ Faraon pou apel zot e pou dimann zot ki travay zot fer.

³⁴ Zot bizin reponn: ‘Nou, to bann serviter, finn okip zanimo depi nou zenes ziska asterla. Parey kouma nou bann anset ti fer avan nou.’ Lerla, li pou permet zot res dan rezion Gosenn, parski bann Ezipsien pa kontan bann elver mouton ek kabri.”