Zenez 43 - Kreol Morisyen OT Portions

Zakob les Benzamin al Lezip

¹ Sa lepok la, lafaminn pe fer ravaz dan pei Kanaan.

² Zakob ek so fami finn fini manz tou nouritir ki zot ti finn aste dan Lezip. Lerla, Zakob dir so bann garson: “Al aste ankor inpe manze dan Lezip.”

³ Zida reponn: “Gouverner la finn donn nou enn warning. Li pa pou resevwar nou si nou ti-frer pa avek nou.

⁴ Si to les Benzamin al avek nou, nou pou al aste manze pou twa.

⁵ Me si to refize, nou pa pou ale, parski misie la finn met nou angard. Li finn dir: ‘Mo pa pou resevwar zot si zot ti-frer pa avek zot.’”

⁶ Izrael dir: “Zot finn met mwa dan lapenn. Kifer zot ti bizin dir misie la ki zot ena enn lot frer?”

⁷ Zot reponn: “Gouverner la ti poz nou boukou kestion lor noumem ek lor nou fami. Li ti oule kone si nou papa ti ankor vivan. Li ti dimann nou si nou ti ena ankor frer. Nou ti zis reponn so bann kestion. Nou pa ti kone si li ti pou dir nou amenn nou frer.”

⁸ Lerla Zida dir: “Papa, les piti la vinn avek mwa. Nou bizin ale pouki twa, nou bann fami ek noumem viv. Nou pa anvi mordefin!

⁹ Mo pou responsab li. Si mo pa retourn li, mo pou koupab divan twa toutlong mo lavi.

¹⁰ Si nou pa ti perdi letan koumsa, nou ti pou fini ale-vini de fwa.”

¹¹ Lerla, zot papa, Izrael dir zot: “Si pou koumsa, ala seki zot bizin fer: Pran avek zot bann meyer prodwi nou pei: parfin, zepis, dimiel, larezinn, pistas, ek zamann. Zot ava donn gouverner la tousala kouma enn kado.

¹² Amenn de fwa plis larzan avek zot. Zot ava retourn sa larzan ki zot ti trouv dan zot sak la. Kitfwa kikenn ti fer enn erer.

¹³ Amenn zot frer Benzamin avek zot e al get sa misie la.

¹⁴ Mo priye ki Bondie Toupwisan tous so leker. Li ava gagn pitie pou zot, e li ava les Benzamin ek Simeon revinn avek zot. Mwa, mo ava res tousel, koumadir zame mo ti ena zanfan.”

Zozef zwenn so bann frer enn deziem fwa

¹⁵ Bann garson Izrael pran avek zot bann kado. Zot pran osi de fwa plis larzan, e Zot desann Lezip avek Benzamin. Zot al prezant zot divan Zozef.

¹⁶ Kan Zozef trouv Benzamin avek zot, li dir so sef-serviter: “Amenn sa bann dimoun la kot mwa. Fer touy enn zanimo e prepar manze. Sa bann dimoun la pou manz avek mwa midi.”

¹⁷ Sef-serviter la fer seki Zozef finn dir. Li amenn bann la kot so met.

¹⁸ Kan fer zot rant kot Zozef, zot gagn per. Zot dir ant zot: “Finn amenn nou isi akoz larzan ki ti remet dan nou sak lot fwa la. Sirman zot pou aret nou. Zot pou pran nou bann bourik e zot pou fer nou vinn esklav.”

¹⁹ Alor, zot desid pou koz avek sef-serviter Zozef divan laport.

²⁰ Zot dir li: “Exkize Misie, nou finn deza vinn aste manze lot-fwa.

²¹ Lor sime, nou ti arete pou pas lanwit. Kan nou ti ouver nou sak, sakenn ti trouv so larzan dan so sak. Ti ena mem som ki nou ti peye. Me zordi, nou finn retourn sa kas la.

²² Nou finn amenn kas anplis pou aste ankor inpe manze. Nou pa kone kisannla ti remet nou larzan dan nou sak.”

²³ Lerla, zom la dir zot: “Tou korek! Pa bizin per! Zot Bondie, Bondie zot papa ki finn met enn trezor dan zot sak. Mwa mo kone mo ti ankes zot larzan.” Lerla, li fer larg Simeon.

²⁴ Zom la fer zot rant dan lakaz Zozef. Li donn zot dilo pou lav zot lipie. Li fer donn zot bann bourik lerb pou manze.

²⁵ Bann frer la tann dir ki zot pou manz avek Zozef midi. Alor, zot prepar zot bann kado pou donn li.

²⁶ Kouma Zozef rant kot li, zot donn li bann kado la. Apre sa, zot prostern divan li avek respe.

²⁷ Zozef pran zot nouvel. Lerla li dimann zot: “Zot vie papa ki manier? Eski li ankor vivan?”

²⁸ Zot reponn: “Wi met! To serviter bien. Li ankor vivan.” Zot prostern ankor enn fwa divan li avek respe.

²⁹ Zozef remark Benzamin, so vre frer. Li dir zot: “Limem zot ti-frer ki zot ti koz avek mwa la? Bondie beni twa mo garson!”

³⁰ Zozef ranpli ar lemosion kan li trouv Benzamin. Larm vinn dan so lizie. Lerla li degaze al dan so lasam pou plore.

³¹ Apre sa, li lav so figir e li revini. Li fer zefor pou kontrol so lemosion. Lerla, li donn lord pou servi manze.

³² Zot servi Zozef apar lor enn latab. So bann frer manz lor enn lot latab. Bann Ezipsien ki la osi manz apar. Zot pa kapav manz avek bann Ebre parski sa konsidere kouma enn ofans dan zot relizion.

³³ Bann frer la asiz anfas Zozef. Fer zot asiz an-ran dapre zot laz, depi pli gran ziska pli zenn. Zot get zot kamarad avek etonnman.

³⁴ Zozef fer servi zot manze ki lor so latab. Benzamin gagn sink fwa plis ki lezot. Zot bwar divin ansam ar zozef, e zot dan lazwa.