Zenez 40 - Kreol Morisyen OT Portions

^1-2 Inpe letan apre, serviter ki servi lerwa so labwason, ek sef boulanze lerwa, komet enn fot. Faraon ankoler ar zot.

³ Li fer met zot dan prizon kot so komandan gard rwayal. Dan sa prizon lamem Zozef ti ete.

⁴ Komandan gard rwayal konfie Zozef sa de prizonie la. Zozef vey lor zot bienet. Zot res dan prizon pou inpe letan.

Zozef explik rev de prizonie Faraon

⁵ Enn swar, serviter ki servi lerwa so labwason ek sef boulanze Faraon, toulede fer enn rev. Sak rev ena enn sinifikasion.

⁶ Gramatin, kan Zozef vinn get zot, li trouv zot dan traka.

⁷ Li dimann zot: “Kifer zot paret trakase koumsa zordi?”

⁸ Zot reponn li: “Nou finn fer sakenn enn rev. Pena personn isi ki kapav explik nou sa bann rev la.” Zozef dir zot: “Bondie ki donn konesans pou interpret rev. Pa per! Rakont mwa zot rev.”

⁹ Alor, serviter ki servi lerwa so labwason rakont Zozef so rev: “Dan mo rev, ti ena enn pie rezin divan mwa.

¹⁰ Pie rezin la ti ena trwa brans. Kouma li ti koumans bourzone li ti anfler. Bann fler la finn raport bann grap rezin mir.

¹¹ Koup Faraon ti dan mo lame. Mo ti kas bann grap rezin e mo ti pers zot zi dan koup la. Lerla, mo finn met koup la dan lame Faraon.”

¹² Alor, Zozef dir li: “Ala seki to rev vedir: Trwa brans la reprezant trwa zour.

¹³ Dan trwa zour Faraon pou relev to latet. Li pou redonn twa to travay. Lerla, to pou kapav servi li so divin, parey kouma to ti pe fer avan.

¹⁴ Silteple, pa bliye mwa kan to pou dan bien. Koz mwa avek Faraon, pouki mo sorti dan sa prizon la.

¹⁵ Bann dimoun finn anlev mwa lor later bann Ebre. Zot finn amenn mwa isi par lafors. Mem isi mo pa finn fer nanye ki merit prizon.”

¹⁶ Kan sef boulanze trouve ki Zozef finn interpret rev la bien, li dir li: “Mwa osi mo finn fer enn rev. Dan mo rev, mo ti pe sarye trwa panie gato lor mo latet.

¹⁷ Dan panie ki ti pli lao la, ti ena bann bon gato ki Faraon kontan. Me bann zwazo ti pe manz zot lor mo latet.”

¹⁸ Zozef dir li: “Ala seki to rev vedir: Trwa panie la reprezant trwa zour.

¹⁹ Dan trwa zour Faraon pou fer lev twa anler. Li pou fer pandi twa lor enn pie. Bann votour pou vinn manz to laser.”

²⁰ Trwa zour plitar, Faraon fet so laniverser. Li organiz enn gran repa pou tou so bann ofisie. Dan zot prezans, li fer amenn so de serviter e li donn sakenn enn pozision diferan.

²¹ Serviter ki responsab pou servi li so labwason regagn so travay. Li rekoumans donn lerwa so koup divin.

²² Me lerwa fer pandi so sef boulanze. Tou arive parey kouma Zozef ti dir.

²³ Pourtan, serviter ki responsab pou servi labwason lerwa la finn bliye Zozef.