Zenez 37 - Kreol Morisyen OT Portions

Zistwar Zozef (37—50) Zozef rakont so bann rev

¹ Zakob res Kanaan, pei kot so papa ti finn imigre.

² Ala zistwar bann garson Zakob. Sa lepok la, Zozef ena 17 an. Li vey troupo avek so bann frer, bann garson Bila ek Zilpa, bann fam so papa. Zozef abitie vinn raport so bann frer ar so papa.

³ Izrael kontan Zozef plis ki so bann lezot garson, parski li finn gagn Zozef dan so vie zour. Li fer koud enn zoli manto pou Zozef.

⁴ So bann frer remarke ki zot papa kontan li plis ki zot. Akoz sa, zot ayir li, e zot nepli kapav koz bien ar li.

⁵ Enn zour, Zozef fer enn rev. Kan li rakont so bann frer sa rev la, zot pli pa kontan li.

⁶ Li dir zot: “Ekout mo rev!

⁷ Nou tou ti dan karo pou rekolt. Nou ti pe atas bann lapay dible ansam. Enn sel kou, mo ta lapay ti dres anler. Lerla, seki pou zot ti vinn otour li, e ti prostern divan li.”

⁸ So bann frer dir li: “Eski to ena lintansion pou vinn nou lerwa? Eski to oule dominn lor nou?” Zot deteste li plis ankor, akoz manier ki li rakont zot so rev.

⁹ Enn lot zour, Zozef fer enn lot rev. Li rakont rev la so bann frer: “Mo finn fer enn lot rev. Dan mo rev, soley, lalinn ek 11 zetwal ti pe prostern divan mwa.”

¹⁰ Lerla, li rakont sa rev la so papa osi. Me so papa repros li. Li dir li: “Ki sa rev la vedir? Eski vremem mwa, to mama ek to bann frer pou bizin vinn prostern divan twa?”

¹¹ Alor, so bann frer zalou li, me so papa repans sa rev la souvan.

Bann frer Zozef vann li

¹² Bann frer Zozef finn amenn bann troupo zot papa dan patiraz, pre ar Sikem.

¹³ Izrael dir Zozef: “To bann frer pe vey troupo pre Sikem. Prepar twa pou al get zot.” Zozef reponn: “Wi papa!”

¹⁴ Zakob dir li: “Al gete si to bann frer bien, e si tou zanimo korek. Apre, to vinn fer mwa kone.” Lerla, Zakob fer li ale. Zozef kit vale Ebron pou pran larout.

¹⁵ Kan li ariv dan Sikem, li rod so bann frer dan bann patiraz. Enn zom trouv li e dimann li: “Ki to pe rode?”

¹⁶ Li reponn: “Mo pe rod mo bann frer ki pe vey troupo. Silteple, dir mwa kot zot ete.”

¹⁷ Zom la dir li: “Zot finn deplase. Mo ti tann zot dir ki zot ti pe al Dotann.” Alor, Zozef al rod so bann frer, e li trouv zot dan Dotann.

¹⁸ Zot trouv li pe vini delwin. Me avan ki Zozef zwenn zot, zot konplote pou touy li.

¹⁹ Zot dir ant zotmem: “Ala rever la pe vini.

²⁰ Anou touy li, e anou zet so lekor dan enn pwi. Nou ava dir ki enn zanimo sovaz finn devor li. Lerla, nou ava gete si so rev vinn realite.”

²¹ Kan Riben tann sa, li rod enn fason pou sap lavi Zozef. Li dir zot: “Pa bizin tir so lavi.

²² Pa bizin vers so disan. Zet li dan enn pwi par la, dan dezer. Me pa lev lame lor li.” Riben dir sa parski li ena lintansion pou liber Zozef e fer li retourn kot so papa.

²³ Alor, kan Zozef ariv avek zot, zot trap li e zot tir so zoli manto lor li.

²⁴ Lerla, zot zet li dan enn pwi sek.

²⁵ Apre sa, zot asize pou zot manze. Pandan ki zot pe manze, zot trouv enn group marsan Ismaelit pe pase. Bannla sorti Galaad e zot pe al Lezip. Zot bann samo pe sarye bann prodwi parfime, lagom ek lamir.

²⁶ Lerlamem, Zida dir so bann frer: “Ki profi nou pou gagne si nou touy nou frer e kasiet so lamor?

²⁷ Pa bizin nou lev lame lor li. Malgre tou, li nou frer ek nou disan. Anou vann li plito avek bann Ismaelit.” Tou so bann frer dakor.

²⁸ Enn bann marsan Madianit pas par la. Zot tir Zozef dan pwi e zot vann li avek bann Ismaelit pou 20 pies larzan. Bann marsan la amenn Zozef dan Lezip.

²⁹ Plitar, kan Riben al get Zozef dan pwi, li nepli la. Riben dezespere e li desir so linz.

³⁰ Lerla, li real zwenn so bann frer, e li dir zot: “Piti la nepli la; ki mo pou fer aster?”

³¹ Alor, zot pran manto Zozef, zot egorz enn kabri, e zot tranp manto la dan so disan.

³² Lerla, zot fer amenn manto la kot zot papa, e zot fer dir li: “Ala seki nou finn trouve. Gete si manto to garson sa, oubien non.”

³³ Zakob rekonet manto Zozef e li dir: “Samem manto mo garson. Enn zanimo sovaz finn devor li.”

³⁴ Lerla, Zakob desir so linz e atas enn sak dan so lerin. Li plor lamor so garson pandan lontan.

³⁵ Tou so bann zanfan vinn konsol li, me li pa konsole. Okontrer, li dir: “Mo pou mor dan mo dey e mo pou al zwenn mo garson dan landrwa kot bann mor ale.” Alor, li kontign plore.

³⁶ Pandan sa letan la, bann Madianit finn amenn Zozef dan Lezip. Zot vann li avek Potifar, enn gran ofisie Faraon. Potifar mem komandan gard rwayal.