Zenez 34 - Kreol Morisyen OT Portions

Sikem tom amoure ar Dina

¹ Enn zour, Dina, tifi Zakob ek Lea, sorti pou al rann vizit bann zennfi dan lavil.

² Amor, enn sef Ivit dan sa landrwa la, ena enn garson ki apel Sikem. Kan Sikem trouv Dina, li trap li e li viol li.

³ Sikem tom amoure ek Dina e li dir li bann zoli parol pou gagn so leker.

⁴ Lerla, Sikem al koz avek so papa Amor, e dir li: “Fer mwa marye avek sa tifi la.”

⁵ Zakob tande ki Sikem finn dezonor so tifi Dina. Me li pa fer nanye, parski so bann garson pa la. Zot avek bann troupo dan patiraz. Zakob prefer atann zot retourne.

⁶ Amor avek so garson Sikem vinn kot Zakob pou koz avek li.

⁷ Zis dan sa ler la, bann garson Zakob rant lakaz. Kan zot tann sa nouvel la zot bwi ar koler. Seki Sikem finn fer avek Dina finn sali loner bann zanfan Izrael. Li pa ti bizin fer enn zafer koumsa.

⁸ Me Amor koz avek zot e dir zot: “Leker mo garson Sikem finn atase avek sa tifi la. Mo sipliy zot, les li marye avek li.

⁹ Anou tom dakor ansam. Les nou bann tifi ek nou bann garson marye ant zot.

¹⁰ Zot ava res parmi nou. Nou pei pou ouver pou zot. Zot pou kapav reste, fer komers, e vinn propriyeter.”

¹¹ Lerla, Sikem pran laparol e li dir: “Fer mwa sa faver la, e mo pou donn zot tou seki zot dimann mwa.

¹² Dir mwa komie mo bizin peye, e ki kado zot anvi gagne. Mo pou donn zot tou seki zot dimande. Me, silvouple, donn mwa lame Dina.”

¹³ Bann zanfan Zakob desid pou met Sikem ek so papa dan enn piez. Zot pa kontan akoz Sikem finn sali loner zot ser.

¹⁴ Alor, zot reponn: “Nou pa kapav fer sa. Li pa posib fer nou ser marye ar kikenn ki pa sirkonsi. Sa pou enn dezoner pou nou.

¹⁵ Nou pou aksepte zis lor enn sel kondision: Zot bizin fer kouma nou, e tou bann mal kot zot bizin sirkonsi.

¹⁶ Lerla, nou bann zanfan ava marye ant zot. Nou ava res parmi zot, e nou ava form enn sel lepep.

¹⁷ Me, si zot pa aksepte nou propozision, nou pou al repran nou ser.”

¹⁸ Sa bann parol la fer plezir Amor ek so garson Sikem.

¹⁹ Sikem enn dimoun bien respekte dan so klan. Li pa perdi letan pou fer seki bizin, parski li bien amoure avek tifi Zakob.

²⁰ Sikem ek so papa Amor desid pou al koz avek bann zom lor laplas kot laport lavil. Zot dir:

²¹ “Sa bann dimoun la korek avek nou. Les zot res dan nou pei e fer komers. Ena ase plas dan nou pei pou zot. Nou ava kapav marye ar zot bann tifi, e nou ava fer nou bann tifi marye avek zot.

²² Zot dakor pou viv parmi nou e vinn enn sel lepep avek nou. Me zot finn met enn sel kondision: Tou bann mal parmi nou bizin sirkonsi kouma zot.

²³ Si nou donn zot nou lakor, zot pou vinn res parmi nou. Lerla, eski tou zot bann troupo ek tou seki zot posede pa pou vinn pou nou?”

²⁴ Tou seki prezan kot laport lavil aksepte propozision Amor ek so garson Sikem. Tou bann zom dan lavil sirkonsi.

Masak dan Sikem

²⁵ De zour plitar, bann zom lavil Sikem ankor ena douler. De parmi bann garson Zakob, Simeon ek Levi, bann frer Dina, profit lokazion. Zot pran zot lepe e zot rant trankil dan lavil. Lerla, zot masakre tou bann zom.

²⁶ Zot touy osi Amor ek so garson Sikem ar zot lepe. Apre sa, zot pran Dina dan lakaz Sikem e zot ale.

²⁷ Bann lezot garson Zakob vinn pran bann lobze valer ki lor bann kadav. Zot pran tou bann rises dan lavil, parski finn dezonor zot ser.

²⁸ Zot pran tou bann mouton ek bann sev, bann bef ek bann bourik. Zot pran tou seki dan lavil ek dan bann plantasion andeor lavil.

²⁹ Zot amenn tou bann rises, ansam ek bann fam ek bann zanfan. Zot pran tou seki ena dan bann lakaz.

³⁰ Kan bannla retourn kot zot, Zakob dir Simeon ek Levi: “Ki zot finn fer? Zot finn met mwa dan problem. Aster, bann abitan dan sa rezion la, bann Kananeen ek bann Perizit pou deteste mwa. Zot pou fer lalians e zot pou vinn atak mwa. Zot pou fini mwa ek tou mo fami, parski nou pena boukou zom.”

³¹ Lerla, so bann garson reponn: “Eski sa boug la ti gagn drwa tret nou ser kouma enn prostitie?”