Zenez 25 - Kreol Morisyen OT Portions

Lezot desandan Abraam

¹ Abraam pran enn lot fam ki apel Ketoura.

² Li donn li sis zanfan: Zimrann, Yoksann, Medann, Madian, Isbak ek Soua.

³ Yoksann papa Seba ek Dedann. Plitar, Dedann vinn anset bann Asourit, bann Letousit ek bann Leoumit.

⁴ Bann zanfan Madian apel Efa, Efer, Anok, Abida ek Elda. Tousala bann desandan Ketoura.

⁵ Abraam fer Izaak vinn so eritie.

⁶ Li donn bann zanfan Agar ek Ketoura bann kado. Apre sa, li fer zot al res dan bann pei les, lwin ek so garson Izaak.

Lamor Abraam

⁷ Abraam viv ziska laz 175 an.

⁸ Li rann so dernie soupir e li mor apre enn vieyes ere.

⁹ So bann garson, Izaak ek Ismael, anter li dan kavern Makpela. Sa kavern la trouv dan les Mamre. Li lor terin Efron, garson Soar, enn Itit.

¹⁰ Abraam ti aste sa terin la avek bann Itit kan li ti ankor vivan. Bannla anter Abraam akote so fam Sara.

¹¹ Bondie beni Izaak apre lamor so papa Abraam. Izaak al res pre kot pwi Lahai-Roi.

Bann desandan Ismael

¹² Ala lalis bann desandan Ismael, garson Abraam. So mama apel Agar, enn Ezipsienn, servant Sara.

¹³ Ala nom bann garson Ismael depi pli gran ziska pli tipti: Nebayot, Kedar, Adbeel, Mibsam,

¹⁴ Misma, Douma, Masa,

¹⁵ Hadad, Tema, Yetour, Nafis, ek Kedma.

¹⁶ Sa douz lamem bann garson Ismael. Zot vinn bann sef dan zot tribi. Zot donn zot vilaz zot prop nom.

¹⁷ Ismael ena 137 an kan li rann so dernie soupir e li mor.

¹⁸ So bann zanfan res dan bann rezion ant Avila ek Sour. Sa bann rezion la pre ar Lezip, dan direksion Asiri. Zot res lwin ar bann lezot desandan Abraam.

Zakob 25 - 36 Nesans Ezai ek Zakob

¹⁹ Ala zistwar Izaak, garson Abraam.

²⁰ Izaak ena 40 an kan li marye avek Rebeka. Papa Rebeka apel Betouel, enn abitan Padann-Aram. Frer Rebeka apel Laban. Betouel ek so garson Laban enn bann Arameen.

²¹ Rebeka pa kapav gagn zanfan. Alor, Izaak priye LESEGNER pou li. LESEGNER ekzos so lapriyer, e Rebeka tom ansint.

²² Bann zanfan Rebeka lager dan so vant. Sa fer Rebeka dekouraze, e li dir: “Si sa pou koumsa, kifer mo ti bizin tom ansint?” Lerla li al priye LESEGNER pou li gagn enn repons.

²³ LESEGNER reponn li: “Ena de nasion dan to vant, To pou donn nesans de pep diferan. Enn ladan pou pli for. Seki pli gran pou servi seki pli zenn.”

²⁴ Kan ler arive pou Rebeka akouse, li gagn zimo.

²⁵ Premie tibaba la rouz e so lekor kouver ar pwal. Alor zot apel li Ezai.

²⁶ Letan so frer ne, so lame pe trap talon Ezai. Alor zot apel li Zakob. Izaak ena 60 an kan zot ne.

²⁷ De garson la grandi. Ezai vinn enn gran saser. Li pas so letan dan bwa. Zakob enn zom trankil. Li prefer res dan latant.

²⁸ Izaak ena enn preferans pou Ezai. Li kontan manz zanimo ki Ezai lasas. Me Rebeka prefer Zakob.

Ezai vann so drwa premie garson

²⁹ Enn zour, Zakob pe kwi enn bon lasoup. Anmemtan, Ezai sorti lasas e li bien fatige.

³⁰ Li dir Zakob: “Les mo manz inpe to lasoup rouz. Mo pe gagn extra fin.” Ala ki manier Ezai gagn nom Edom, setadir rouz.

³¹ Zakob dir li: “Vann to drwa premie garson avek mwa avan.”

³² Ezai reponn: “Mo pre pou mordefin. Ki mo pou fer ek mo drwa premie garson?”

³³ Zakob dir li: “Fer enn serman avan.” Alor, Ezai fer serman e li donn Zakob so drwa premie garson.

³⁴ Lerla, Zakob donn Ezai dipin ek lasoup lanti. Ezai manze-bwar, apre li ale. Li pa kas latet ek so drwa premie garson.