Zenez 21 - Kreol Morisyen OT Portions

Nesans Izaak

¹ LESEGNER fer seki li ti promet Sara. Sara gagn faver LESEGNER.

² Alor, li tom ansint, e li donn Abraam enn garson dan so vie zour. Sa arive dan letan ki Bondie ti finn anonse.

³ Abraam apel so garson Izaak.

⁴ Abraam sirkonsi Izaak lor so wit zour, parey kouma Bondie finn komann li.

⁵ Abraam ena 100 an kan so garson Izaak ne.

⁶ Sara dir: “Bondie finn fer mwa riye ar lazwa. Tou dimoun ki pou tann sa nouvel la pou riye avek mwa.

⁷ Kisannla ti pou dir Abraam, ki enn zour, Sara ti pou donn zanfan bwar? Pourtan, mo finn donn li enn garson dan so vie zour.”

⁸ Zanfan la grandi. Zour ki Sara sevre li, Abraam fer enn gran fet.

Agar ek Ismael gagn pouse

⁹ Enn zour, Sara trouv Ismael pe zwe avek so garson Izaak. Ismael ti sa garson ki Agar, enn servant Ezipsien, ti donn Abraam.

¹⁰ Lerla Sara dir Abraam: “Pous sa esklav la ek so garson. Fodepa ki so garson vinn to eritie ansam ek mo garson Izaak.”

¹¹ Sa bann parol la boulvers Abraam akoz so garson.

¹² Me Bondie dir li: “Abraam, pa pran traka akoz garson la ek to servant. Fer seki Sara finn dir twa. Izaak, limem pou donn twa bann desandan ki mo finn promet twa.

¹³ Konsernan garson to servant, mo pou fer li vinn papa enn nasion, parski li osi to zanfan.”

¹⁴ Abraam leve boner landime gramatin. Li donn Agar dipin ek enn gourd-lapo ranpli ek dilo. Lerla li met zanfan la lor ledo Agar e li fer zot ale. Agar ek so garson ale, e zot tourn an-ron dan dezer Berseba.

¹⁵ Kan finn nepli ena dilo dan so gourd-lapo, Agar abandonn so garson anba enn bwison.

¹⁶ Apre sa, li al asiz enn bon distans. Li dir: “Mo pa anvi trouv mo garson mor.” Lerla li plore for-for.

¹⁷ Bondie tann lagoni Ismael e anz Bondie apel Agar depi dan lesiel: “Agar, ki to gagne? Pa bizin per! Bondie finn tann lavwa to garson.

¹⁸ Lev twa! Al pran to garson e ser li for dan to lebra. Mo pou fer li vinn papa enn gran nasion.”

¹⁹ Lerla Bondie ouver lizie Agar e li trouv enn pwi. Li al ranpli so gourd-lapo ek dilo e li fer so garson bwar.

^20-21 Bondie protez Ismael e li grandi. Li res dan dezer Parann kot li vinn enn gran saser. So mama marye li avek enn Ezipsienn.

Abraam fer enn lalians avek Abimelek

²² Sa lepok la, Abimelek ek Pikol, sef so larme, vinn get Abraam e dir li: “Bondie avek twa dan tou seki to fer.

²³ Promet mwa divan Bondie, ki zame to pa pou fer fos avek mwa e avek mo bann desandan. Parey kouma mo finn azir bien avek twa, twa osi to pou azir bien avek mwa e avek sa pei kot to pe reste kouma enn etranze la.”

²⁴ Lerla Abraam dir li: “Mo promet twa.”

²⁵ Abraam fer enn konplint avek Abimelek. Bann zom Abimelek ti finn pran enn so bann pwi par lafors.

²⁶ Abimelek dir li: “Premie fwa mo pe tann koz sa. Kifer to pa ti dir mwa sa depi avan. La, mo pena okenn lide kisannla finn fer sa.”

²⁷ Abraam donn Abimelek mouton, kabri ek bef. Lerla toulede fer enn lalians.

²⁸ Apre sa, Abraam met set mouton apar dan so troupo.

²⁹ Abimelek dimann li: “Kifer to finn met sa set mouton la apar?”

³⁰ Abraam reponn: “Aksepte sa set mouton la kouma enn prev ki sa pwi la pou mwa.”

³¹ Sa landrwa la apel Berseba akoz lalians ki toulede finn fer laba.

³² Abraam ek Abimelek fer sa lalians la dan Berseba. Apre sa, Abimelek ek Pikol, sef so larme, retourn dan pei bann Filistin.

³³ Abraam plant enn pie tamaris dan Berseba. Laba, li invok nom LESEGNER, Bondie Eternel.

³⁴ Abraam res ankor enn long letan kouma enn etranze dan pei bann Filistin.