Zenez 19 - Kreol Morisyen OT Portions

Pese bann abitan Sodom

¹ Ler pre pou aswar, de anz la ariv Sodom. Lot pe asize pre kot lantre lavil. Kouma li trouv zot, li leve e li al zwenn zot. Li prostern divan zot ziska so figir tous later.

² Lerla li dir zot: “Mo sipliy zot, fer mwa loner vinn kot mwa, zot serviter. Zot ava lav zot lipie e dormi dan mo lakaz zordi. Dime gramatin zot ava lev boner pou kontign zot larout.” Zot reponn: “Non, nou pou pas lanwit lamem, lor laplas piblik.”

³ Me telman Lot insiste, zot fini par aksepte so linvitasion. Li kwi dipin san levin e li prepar enn bon repa. Lerla zot manze.

⁴ Zot pankor al dormi, kan bann zom lavil Sodom vinn antour lakaz Lot. Zot tou vini, depi pli zenn ziska pli vie.

⁵ Zot kriye Lot e zot dir: “Kot sa bann zom ki finn vinn kot twa la? Amenn zot isi pou nou viol zot.”

⁶ Lot sorti deor, e li ferm laport deryer li.

⁷ Li dir zot: “Mo sipliy zot, mo bann frer, pa fer sa pese orib la.

⁸ Mo ena de tifi ki ankor vierz. Mo pou amenn zot isi. Zot ava fer seki zot anvi avek zot. Me pa tous sa bann zom la. Mo bann invite sa, mo bizin protez zot.”

⁹ Bannla reponn: “Sorti la ale do! Tomem to enn etranze isi e to oule fer lalwa? Taler twa ki pou pey lepokase.” Zot pous Lot avek violans, e zot vini pou defons laport.

¹⁰ Me sa de invite la ris Lot dan lakaz, e zot ferm laport.

¹¹ Lerla zot fer tou bann zom ki deor vinn aveg; depi pli piti ziska pli gran. Personn pa kapav trouv laport.

Lot ek so fami kit Sodom

¹² De anz la dimann Lot: “Kisannla ki res kot twa ankor? Eski to ena zann, garson, tifi oubien enn lot fami dan lavil? Fer zot tou sove ale.

¹³ LESEGNER finn avoy nou pou detrir lavil. Bann akizasion kont bann abitan Sodom bien grav.”

¹⁴ Lot degaze al get so bann pretan-zann, e li dir zot: “Degaze kit lavil ale, LESEGNER pou detrir li.” Me bannla pran sa an badinaz.

¹⁵ Kan pre pou lizour, de anz la pres Lot pou ale. Zot dir li: “Leve, pran to fam ek to de tifi ale, sinon zot pou mor ansam ek bann abitan lavil.”

¹⁶ Lot ankor pe ezite, me LESEGNER finn deside pou sov zot lavi. Alor de anz la ris zot par lame, e kondir zot andeor lavil.

¹⁷ Kan zot ariv andeor lavil, de anz la dir zot: “Ale, sov zot lavi. Pa vir deryer e pa aret okennpar. Al kasiet dan montagn, sinon zot pou mor.”

^18-19 Lot reponn: “Segner, mo rekonet ki zot finn azir bien avek mwa, zot serviter. Zot finn fer mwa enn gran faver e zot finn sap mo lavi. Me nou pa pou gagn letan ariv lor montagn avan ki sa maler la tape. Nou pou riske mor.

²⁰ Get laba ena enn ti lavil. Li pa lwin e nou pou kapav sove al laba. Mo pa dimann zot gransoz: Permet nou al laba pou sap nou lavi.”

²¹ Enn parmi dir li: “Dakor, mo fer twa sa faver la osi. Mo pa pou detrir sa ti lavil la.

²² Degaze al kasiet laba. Mo pa pou kapav fer nanye tanki zot pa ansekirite laba.” Pou sa rezon la, finn apel sa lavil la Soar, ki vedir tipti.

Bondie detrir Sodom ek Gomor

²³ Soley pe leve kan Lot ek so fami ariv Soar.

²⁴ LESEGNER fer enn lapli souf ek dife tom lor Sodom ek Gomor.

²⁵ Li detrir sa bann lavil la ek zot bann abitan. Li detrir osi tou bann plantasion dan sa rezion la.

²⁶ Fam Lot get deryer e li vinn enn stati disel.

²⁷ Boner gramatin, Abraam al dan landrwa kot li ti koz avek LESEGNER.

²⁸ Li zet enn regar dan direksion Sodom, Gomor ek bann landrwa dan lezanviron. Li trouv zis lafime ki pe monte depi dan laplenn, parey kouma kan lerb sek finn pran dife.

²⁹ Kan Bondie desid pou detrir bann lavil dan sa rezion la, Lot ti pe res laba. Me Bondie pa finn bliye promes ki li ti fer Abraam. Akoz sa, li sov Lot dan sa maler la; li epargn so lavi.

Lorizinn bann Moabit ek bann Amonit

³⁰ Lot gagn per pou res dan Soar. Li kit lavil la e li al dan montagn ek so de tifi. Zot res dan enn lagrot laba.

³¹ Enn zour, pli gran tifi la dir ek so ti-ser: “Nou papa pe vinn vie, e pena enn zom par isi pou marye avek nou dapre koutim.

³² Anou soul nou papa ar divin. Lerla, nou ava dormi avek li. Koumsa, nou ava gagn enn desandan atraver nou papa.”

³³ Sa swar la, zot fer zot papa bwar divin ziska li sou. Lerla, premie tifi la dormi avek li. Lot pa konn nanye ki pe pase.

³⁴ Landime, premie tifi la dir so ti-ser: “Yerswar mo ti dormi avek nou papa. Anou donn li divin ankor aswar. Lerla, to ava al dormi avek li. Koumsa, nou toulede kapav gagn enn desandan pou nou papa.”

³⁵ Sa swar la ankor, zot fer zot papa bwar divin ziska li sou. Lerla, pli zenn tifi la al dormi avek li. Lot pa konn nanye ki pe pase.

³⁶ Alor, toulede tifi tom ansint pou zot papa.

³⁷ Pli gran tifi la gagn enn garson, e li apel li Moab. Limem anset bann Moabit.

³⁸ Pli zenn tifi la osi gagn enn garson, e li apel li Ben-Ami. Limem anset bann Amonit.