Zenez 15 - Kreol Morisyen OT Portions

Bondie fer enn lalians ek Abram

¹ Enn zour, LESEGNER koz avek Abram dan enn vizion e dir li: “Abram, pa bizin per! Momem to Protekter. Mo pou donn twa enn gran rekonpans.”

² Abram reponn: “A Segner BONDIE, ki to pou donn mwa? To konn bien ki mo pena zanfan. Eliezer ki sorti Damas pou vinn mo eritie.

³ To pa finn donn mwa zanfan. Akoz sa, mo domestik Eliezer ki finn ne dan mo lakaz, limem pou vinn mo eritie.”

⁴ LESEGNER dir Abram: “Non, pa sa zom la ki pou vinn to eritie, me to prop disan. To prop garson ki pou vinn to eritie.”

⁵ Li fer Abram sorti deor e li dir li: “Lev to lizie lao, e get lesiel. Kont bann zetwal si to kapav. To bann desandan pou vinn boukou kouma bann zetwal dan lesiel.”

⁶ Abram met so konfians dan LESEGNER. Akoz sa LESEGNER rekonet li kouma enn zom zis.

⁷ Li dir Abram: “Momem LESEGNER ki finn fer twa sorti dan Our, pei bann Kaldeen. Mo pe fer twa vinn propriyeter sa pei la.”

⁸ Abram dir li: “Segner BONDIE, kouma mo pou kone si sa pei la pou vinn pou mwa?”

⁹ LESEGNER reponn li: “Amenn enn zenis, enn sev, ek enn belie 3 an sakenn. Amenn osi enn tourtrel ek enn zenn pizon.”

¹⁰ Abram obeir LESEGNER. Li ouver bann zanimo la ande. Li met sak lamwatie vizavi so lot lamwatie. Me li pa ouver bann zwazo.

¹¹ Bann votour desann pou manz kadav bann zanimo la, me Abram farous zot.

¹² Ler soley kouse, Abram gagn enn somey lour. Enn nwarte ki fer per antour li.

¹³ Lerla, LESEGNER dir li: “Abram, to bann desandan pou al res dan enn pei etranze. Bann abitan sa pei la pou tret zot kouma esklav. Bannla pou fer dominer ar zot pandan 400 an.

¹⁴ Me sa pep ki pou tret zot kouma esklav la pou gagn mo pinision. Lerla to bann desandan pou kit sa pei la avek boukou rises.

¹⁵ Twa, Abram, to pou viv bien lontan, e to pou mor anpe dan to vieyes.

¹⁶ Apre kat zenerasion to bann desandan pou retourn isi. Lerla, mo pou pini bann Amorit. Asterla zot pese pankor vinn ase grav pouki mo pous zot lor zot later.”

¹⁷ Soley finn kouse e fer bien nwar. Enn sel kou, enn resipian lafime ek enn flanbo paret. Zot laflam ek lafime pas ant bann lamwatie zanimo ki Abram finn ouver.

¹⁸ Sa zour la, LESEGNER fer enn lalians avek Abram. Li dir li: “Mo pou donn to bann desandan sa pei la antie, depi larivier Lezip ziska gran larivier Efrat.

¹⁹ Mo pou donn zot teritwar bann Kenit, bann Kenizit, bann Kadmonit,

²⁰ bann Itit, bann Perizit, bann Refait,

²¹ bann Amorit, bann Kananeen, bann Girgasit ek bann Zebizit.”