Zenez 11 - Kreol Morisyen OT Portions

Latour Babel

¹ Dans sa lepok la, tou dimoun lor later koz mem langaz.

² Zot sorti dan les e zot trouv enn gran laplenn dan Mezopotami. Zot desid pou res laba.

³ Zot dir ant zotmem: “Anou fer blok e anou sof zot dan four.” Zot servi blok kouma ros, e koltar kouma mortie.

⁴ Lerla zot dir: “Anou aranz enn lavil ek enn latour ki tous lesiel. Koumsa, nou pou vinn renome e nou pa pou disperse lor later.”

⁵ Lerla, LESEGNER desann pou get lavil ek latour ki bann imin pe konstrir.

⁶ LESEGNER dir: “Get enn kou! Zot form enn sel pep, e zot koz mem langaz. Si asterlamem zot pe fer koumsa, plitar zot pou kapav fer tou seki zot anvi.

⁷ Anou desann pou met konfizion dan zot langaz. Koumsa personn pa pou konpran so kamarad.”

⁸ Alor, LESEGNER dispers zot partou lor later, e zot aret batir zot lavil.

⁹ Sa lavil la apel Babel, akoz labamem LESEGNER finn met konfizion dan langaz bann dimoun. LESEGNER finn dispers zot partou lor later.

Bann desandan Sem

¹⁰ Ala lalis bann desandan Sem. Dezan apre deliz, Sem ena 100 an. Li gagn enn garson ki apel Arpaksad.

¹¹ Apre nesans Arpaksad, Sem viv ankor 500 an e li gagn ankor lezot zanfan.

¹² Arpaksad ena 35 an kan li gagn enn garson ki apel Sela.

¹³ Apre nesans Sela, Arpaksad viv ankor 403 an e li gagn ankor lezot zanfan.

¹⁴ Sela ena 30 an kan li gagn enn garson ki apel Eber.

¹⁵ Apre nesans Eber, Sela viv ankor 403 an e li gagn ankor lezot zanfan.

¹⁶ Eber ena 34 an kan li gagn enn garson ki apel Peleg.

¹⁷ Apre nesans Peleg, Eber viv ankor 430 an e li gagn ankor lezot zanfan.

¹⁸ Peleg ena 30 an kan li gagn enn garson ki apel Reou.

¹⁹ Apre nesans Reou, Peleg viv ankor 209 an e li gagn ankor lezot zanfan.

²⁰ Reou ena 32 an kan li gagn enn garson ki apel Seroug.

²¹ Apre nesans Seroug, Reou viv ankor 207 an. Li gagn ankor lezot zanfan.

²² Seroug ena 30 an kan li gagn enn garson ki apel Nahor.

²³ Apre nesans Nahor, Seroug viv ankor 200 an e li gagn ankor lezot zanfan.

²⁴ Lor so 29 an, Nahor gagn enn garson ki apel Tera.

²⁵ Apre nesans Tera, Nahor viv ankor 119 an e li gagn ankor lezot zanfan.

²⁶ Tera ena 70 an e li deza ena trwa garson: Abram, Nahor, ek Arann.

Bann desandan Tera

²⁷ Ala lalis bann desandan Tera: Tera gagn Abram, Nahor ek Arann. Arann gagn Lot.

²⁸ Arann mor dan so pei natal, Our, kot bann Kaldeen. Kan Arann mor, so papa Tera ankor vivan.

^29-30 Abram marye avek Sarai. Me Sarai pa kapav gagn zanfan, parski li steril. Nahor marye avek Milka, tifi Arann. Milka ena enn ser ki apel Iska.

³¹ Enn zour, Tera desid pou kit Our pou al res dan Kanaan. Li amenn avek li so garson Abram, so belfi Sarai, ek so tizanfan Lot. Me kan zot ariv Arann, zot desid pou res labamem.

³² Tera mor dan Arann laz 205 an.