Zenez 10 - Kreol Morisyen OT Portions

Bann desandan Noe

¹ Apre deliz, bann garson Noe, Sem, Kam ek Zafet gagn boukou zanfan. Ala lalis zot bann desandan:

² Bann garson Zafet apel Gomer, Magog, Madai, Yavan, Toubal, Mesek ek Tira.

³ Bann garson Gomer: Askenaz, Rifat ek Togarma.

⁴ Bann garson Yavan apel Elisa, Tarsis, Kitim ek Rodanim.

⁵ Zotmem anset bann nasion ki viv lor lakot. Tousala bann desandan Zafet. Zot groupe dan zot pei dapre zot langaz; dan zot nasion dapre zot klan.

⁶ Bann garson Kam apel Kous, Misraim, Pout ek Kanaan.

⁷ Bann garson Kous: Seba, Avila, Sabta, Ragma ek Sabteka. Bann garson Ragma apel Saba ek Dedann.

⁸ Kous osi papa Nemrod, premie gran gerye lor later.

⁹ Nemrod enn gran saser divan LESEGNER. Akoz samem ena enn koze ki dir: “Setel Nemrod, enn gran saser divan LESEGNER.”

¹⁰ Bann premie gran lavil dan so rwayom: Babel, Erek ek Akad, dan pei Sinear.

¹¹ Nemrod sorti dan sa landrwa la e li al dan Asiri. Laba, li batir lavil Niniv, Reobot ek Kela.

¹² Li batir osi lavil Resenn, ant Niniv ek gran lavil Kela.

¹³ Misraim anset bann abitan Loud, Anem, Leab ek Naftou,

¹⁴ Patros, Kaftor, ek Kaslou, kot bann Filistin sorti.

¹⁵ Kanaan papa Sidon, so premie garson, ek Het.

¹⁶ Kanaan, li osi anset bann Zebizit, Amorit, Gigarsit,

¹⁷ bann Ivit, Arkit, Sinit,

¹⁸ bann Arvadit, Semarit ek Amatit. Apre sa, bann desandan Kanaan disperse partou.

¹⁹ Zot teritwar pran depi Sidon, Gerar, ziska Gaza, e depi Sodom, Gomor, Adma ek Seboim, ziska Lesa.

²⁰ Tousala bann desandan Kam. Zot groupe dan zot pei dapre zot langaz; dan zot nasion dapre zot klan.

^21-22 Sem, gran frer Zafet, limem anset Eber ek tou so bann desandan. Bann garson Sem apel Asour, Arpaksad, Loud ek Aram.

²³ Aram papa Ous, Oul, Geter ek Mas.

²⁴ Arpaksad papa Sela, e Sela papa Eber.

²⁵ Eber ena de garson. Premie la apel Peleg, ki vedir divizion. Dan sa lepok la bann abitan later divize. Frer Peleg apel Yoktann.

²⁶ Yoktann papa Almodad, Selef, Azarmavet, Yera,

²⁷ Adoram, Ouzal, Dikla,

²⁸ Obal, Abimael, Saba,

²⁹ Ofir, Avila ek Yobab.

³⁰ Zot teritwar pran depi Mesa, pas par Sefar, ziska bann montagn dan les.

³¹ Tousala bann desandan Sem. Zot groupe dan zot pei dapre zot langaz; dan zot nasion dapre zot klan.

³² Tousala desandan bann garson Noe dapre zot klan ek zot pep. Apre deliz, zot desandan mem ki finn peple partou lor later.