Rit 4 - Kreol Morisyen OT Portions

Boaz marye ar Rit

¹ Boaz al asiz lor laplas piblik, kot laport lavil. Anmemtan, sa lot fami pros avek Elimelek la pase. Limem ki Boaz ti koz avek Rit. Boaz dir li: “Bonzour kamarad! Vinn asiz inpe!” Vremem, li vinn asize.

² Boaz invit osi dis Ansien dan lavil pou vinn asize, e zot aksepte.

³ Lerla, li dir ar fami pros Elimelek: “To kone ki Naomi finn retourne depi pei Moab. Li pe vann terin ki ti pou nou kouzin, Elimelek.

⁴ Mo pe dir twa sa parski tomem fami pli pros. To ena drwa aste li divan tou bann Ansien ek tou seki pe asize ansam avek nou la. Si to pou aste li, al fer li. Me si to pa pou aste li, fer mwa kone, parski momem deziem fami pli pros.” Fami pros la dir: “Mo dakor pou aste terin la.”

⁵ Lerla, Boaz dir li: “Si to aste sa terin la ar Naomi, to pou bizin osi marye avek Rit, sa vev Moabit la. Koumsa, leritaz la pou res dan fami so defin mari.”

⁶ Letan fami pros la tann sa, li dir: “Si sa pou koumsa, mo pa pou aste terin la. Sa pou al kre problem avek mo prop leritaz. Azir dan mo plas twa parski mo pa pou kapav pran sa responsabilite la.”

⁷ Ena enn koutim dan Izrael sa lepok la: Kan bann dimoun fer enn lavant ouswa sanz zot drwa proprieter, enn la tir enn kote savat e donn li lot dimoun la. Sa prouve ki lavant la, ouswa lesanz la, legal.

⁸ Akoz samem letan fami pros la dir Boaz aste terin la, li tir enn kote savat e li donn li.

⁹ Apre sa, Boaz dir bann Ansien ek tou dimoun ki la sa zour la: “Zordi zot tou temwin ki mo finn aste, avek Naomi, tou seki ti pou Elimelek ek so de garson Malonn ek Kilionn.

¹⁰ Mo finn osi aksepte pou marye ar Rit, vev Malonn ki sorti Moab. Koumsa, leritaz pou res dan fami defin la. Pou ena bann zanfan ki pou gard so nom vivan parmi so fami e dan lavil. Zot tou temwin pou sa osi.”

¹¹ Ler Boaz fini koze, tou bann ki la dir: “Wi, nou tou temwin. LESEGNER ava beni sa fam ki pe rant dan to lakaz la. Li ava kouma Rasel ek Lea, bann fam Zakob, ki finn donn nesans pep Izrael. To rises ava ogmante dan klan Efrata, e to nom ava vinn renome dan Betleem.

¹² LESEGNER ava donn twa boukou zanfan avek sa zenn fam la. To fami ava vinn kouma fami Perez, garson Tamar ek Zida.”

Zenealozi David

¹³ Alor, Boaz marye avek Rit e gagn relasion avek li. LESEGNER beni Rit e donn li enn garson.

¹⁴ Ler zanfan la ne, bann fam dan Betleem dir Naomi: “Anou remersi LESEGNER. Zordi, li finn donn twa enn desandan. Ki so nom vinn renome partou dan Izrael!

¹⁵ Sa zanfan la pou transform to lavi. Li pou ed twa dan to vie-zour. To belfi vo plis ki set garson pou twa, parski li kontan twa e li finn donn twa sa ti-zanfan la.”

¹⁶ Lerla, Naomi pran zanfan la e ser li dan so lebra. Limem pran responsabilite pou grandi zanfan la.

¹⁷ Bann fam dan vwazinaz pe krie: “Naomi finn gagn enn garson.” Zot apel li Obed. Plitar Obed vinn papa Zese, papa David.

¹⁸ Ala lalis bann zanset David depi Perez: Perez papa Ezronn.

¹⁹ Ezronn papa Ram, e Ram papa Aminadab.

²⁰ Aminadab papa Nasonn e Nasonn papa Salomon.

²¹ Salomon papa Boaz, e Boaz papa Obed.

²² Obed papa Zese, e Zese papa David.