Rit 2 - Kreol Morisyen OT Portions

Rit zwenn Boaz

¹ Naomi ena enn fami dekote so mari Elimelek. Li apel Boaz. Li bien ris e dimoun bien respekte li.

² Enn zour, Rit ki enn Moabit, dir so belmer Naomi: “Les mo al dan karo. Kikfwa mo kapav gagn sans zwenn kikenn ki ava permet mwa ramas zepi lorz ki bann travayer kit deryer zot”. Naomi dir li: “Ale mo tifi.”

³ Vremem, Rit al dan enn karo. Li ramas bann zepi ki bann travayer pe kit deryer. Li pa kone si sa karo la pou Boaz, fami Elimelek.

⁴ Plitar dan lazourne, Boaz sorti Betleem e li vinn dan karo. Li dir so bann travayer: “LESEGNER avek zot.” Bannla reponn: “LESEGNER beni twa.”

⁵ Letan Boaz trouv Rit, li dimann formenn ki ansarz bann travayer: “Kisannla sa zenn fam la?”

⁶ Formenn la reponn: “Enn zenn Moabit. Limem ki finn vinn ansam ar Naomi depi pei Moab.

⁷ Li finn dimann permision pou ramas bann zepi ki bann travayer kit deryer zot. Depi gramatin boner li la, lor so lipie. Ziska ler li pa finn pran okenn repo.”

⁸ Lerla Boaz al dir Rit: “Ekoute mo tifi, pa bizin al ramas zepi lorz dan karo enn lot dimoun. Res isi avek bann zenn fam ki travay dan mo karo.

⁹ Get bien ki kote bannla pe rekolte e swiv zot. Mo finn donn lord mo bann zom pou les twa trankil. Si to swaf, al pran dilo dan barik ki mo bann serviter finn ranpli.”

¹⁰ Letan Rit tann sa, li prostern li divan Boaz ziska ki so figir tous later. Lerla li dir: “Kifer to bon koumsa avek mwa alor ki mo enn etranze?”

¹¹ Boaz dir li: “Dimoun finn rakont mwa tou seki to finn fer pou to belmer depi lamor to mari. To finn kit to papa ek to mama ek later kot to finn ne. To finn aksepte pou viv parmi enn pep ki to pa ti kone avan.

¹² LESEGNER ava rekonpans twa pou tousala. To finn vinn rod proteksion LESEGNER, Bondie Izrael. Li ava donn twa so benediksion anabondans.”

¹³ Rit dir Boaz: “To finn ena enn gran bonte pou mwa, Met. To bann bon parol rekonfort mo leker. Dedir mo pa mem enn to bann servant.”

¹⁴ Dan ler dezene, Boaz dir Rit: “Vinn manz avek nou. Pran dipin e tranp li dan lasos.” Rit vinn asiz ansam ar bann travayer. Boaz donn li enn pla pistas griye. Rit manze ziska ki li rasazie. Li pa kapav fini so manze.

¹⁵ Kan Rit retourn dan karo pou ramas zepi lorz, Boaz donn lord tou so bann travayer: “les li ramas lorz mem ant bann pake zepi ki finn fini atase. Pa bizin anpes li.

¹⁶ Kan zot koup bann zepi, pa ezite pou kit inpe anba. Les li ramase. Pa bizin zot kriy ar li.”

¹⁷ Rit ramas lorz dan karo ziska tanto. Lerla, li tap bann zepi la pou grenn tou bann lagrin. Li reysi gagn enn gro sak, anviron 30 kilo lorz.

¹⁸ Lerla li pran so sak lorz e li retourn dan vilaz. Li montre so belmer ki kantite lorz li finn ramase. Apre sa li donn so belmer manze ki ti reste dan so dezene.

¹⁹ Naomi dimann li: “Kot to finn gagn tousala? Dan ki karo to finn ramas tou sa lorz la? Bondie ava beni sa dimoun ki finn bon anver twa la.” Lerla Rit rakont so belmer e li dir li: “Mo finn ramas dible dan karo enn misie ki apel Boaz.”

²⁰ Naomi dir Rit: “LESEGNER ava beni sa dimoun la! LESEGNER pe kontign montre nou so bonte. Pa zis nou, ki vivan, me osi bann ki finn mor.” Lerla Naomi dir Rit: “Boaz enn fami avek nou. Li parmi bann ki sipoze ed nou.”

²¹ Rit, enn Moabit, dir so belmer: “Boaz finn donn mwa permision pou ramas lorz ansam ar bann zenn fam ki travay dan so karo ziska rekolt fini.”

²² Lerla Naomi dir Rit: “Bien bon mo tifi, res avek bann servant Boaz. Si to al dan enn lot karo, to riske al gagn maltrete.”

²³ Alor, Rit kontign ramas lorz deryer bann servant Boaz. Li ramas lorz ek dible ziska rekolt fini. Rit kontigne res kot so belmer Naomi.