Psom 91 - Kreol Morisyen OT Portions

Segner Bondie, nou protekter

¹ Ninport kisannla ki ena proteksion Bondie Pli Lao, ninport kisannla ki res dan lonbraz Bondie Toupwisan,

² li kapav dir LESEGNER, “Tomem mo labri ek mo fortres. Tomem mo Bondie ki mo fer konfians.”

³ Li pou protez twa kont latrap bann saser, kont ninport ki epidemi mortel.

⁴ Ar so lezel li pou kasiet twa; anba so lezel to pou ansekirite; so fidelite parey enn boukliye ek enn zarm protekter.

⁵ To nepli pou bizin per danze aswar ouswa bann latak antret dan lazourne

⁶ ouswa bann lepidemi ki atake dan nwar ouswa lemal ki tom lor nou anplinzour.

⁷ Enn milie kapav tom sek koste ar twa, dis mil lor to drwat me twa to pou sape.

⁸ To pou temwin ar to prop lizie kimanier pinision tom lor bann ki ranpli ar pese.

⁹ Wi, SEGNER, tomem mo refiz ek mo proteksion. Twa ki finn fer Bondie Pli Lao vinn to sitadel

¹⁰ maler pa pou vinn pre ar twa; destriksion pa pou koste ar to lakaz.

¹¹ Bondie pou donn lord bann anz pou bar danze e protez twa partou kote.

¹² Zot pou tini twa lao-lao pou anpes to lipie kogn ar ros.

¹³ San danze to pou mars lor lion ek serpan; kraz latet lion feros e serpan danzere.

¹⁴ Bondie dir, “Mo pou sov bann ki kontan mwa; Mo pou protez bann ki rekonet mo nom.

¹⁵ Kan zot dimann led, zot pou gagne; kan zot dan detres, mo pou soutenir zot. Mo pou sov zot, mo pou onor zot.

¹⁶ Mo pou fer zot viv lontan; e donn zot garanti ki momem zot sover. “