Psom 56 - Kreol Morisyen OT Portions

Segner Bondie, mo fer twa konfians

Pou sef koral. Lor ler “Enn kolonb lor pie lwin laba. “Enn poem David letan bann Filistin ti kaptir Gat.

¹ Pran pitie, O mo Bondie, dimoun pe pourswiv mwa; toulezour mo ennmi pe atake, pe kraz mwa;

² bann ki kont mwa persekit mwa touletan; zot enn kantite sa bann arogan ki pe atake la.

³ Kan mo gagn per, mo met mo konfians dan twa.

⁴ Mo sant louanz Bondie parski li gard so parol; mo met mo konfians dan Bondie; mo peyna okenn freyer. Ki enn imin ordiner kapav fer kont mwa?

⁵ Gramatin-tanto zot parol bles mwa; zot nek panse kouma pou fer mwa ditor.

⁶ Zot vinn ansam, dan kasiet zot louk mwa, zot vey mo bann mouvman, e zot atann pou touy mwa.

⁷ Bondie, pa les zot sape pou zot krim, ar to lakoler zet zot anba.

⁸ Twa to kone komie mo finn soufer; To finn gard enn kont mo sagrin ek mo larm. Dan to gran liv to pa finn gard enn kont?

⁹ Zour mo dimann to led mo ennmi oblize kile. Mo kone ki LESEGNER li ar mwa, li lor mo kote.

¹⁰ Dan Bondie - mo loue so parol - dan LESEGNER - mo loue so parol -

¹¹ dan Bondie mo met konfians; mo peyna lafreyer. Ki enn imin ordiner kapav fer kont mwa?

¹² Bondie, mo pou ofer twa seki mo ti promet; mo pou ofer mo sakrifis remersiman

¹³ parski to finn anpes lamor kokin mwa ale e to finn anpes mwa tonbe, pou ki mo kontign mars divan Bondie dan so lalimier ki donn lavi.