Psom 35 - Kreol Morisyen OT Portions

Osekour Segner Bondie

Enn Psom David.

¹ SEGNER, atak bann ki pe atak mwa; lager ar seki lager ar mwa.

² Met to larmir e pran to lepe pou vinn ed mwa.

³ Servi to lans ek to lars kont ennmi ki pe pourswiv mwa. Dir mwa, “Momem ki pou sov twa. “

⁴ Fer bann ki rod touy mwa zwenn defet ek laont; fer bann ki konplote kont mwa oblize sove dan konfizion;

⁵ fer ki divan balye zot kouma lapay ler mesaze LESEGNER tay deryer zot;

⁶ fer zot sime vinn nwar ek glisan ler mesaze LESEGNER tay deryer zot.

⁷ San okenn rezon zot finn met latrap pou may mwa; San okenn rezon zot finn fouy trou profon pou piez mwa.

⁸ Me larwinn pou kraz zot avan zot realize; zot pou may dan zot prop piez e fini dan trou ki zot finn fouye.

⁹ Lerla mo pou dan lazwa akoz LESEGNER, e dan gran boner, parski LESEGNER finn sov mwa.

¹⁰ Ar lazwa dan leker mo pou dir for-for, “SEGNER, peyna to segon! To anpes seki for fer dominer ar seki feb; To anpes bann ris kraz seki pov.”

¹¹ Bann fos temwin leve kont mwa; zot interoz mwa lor zafer ki zame mo finn fer.

¹² Pou dibien ki mo fer, zot rann mwa lemal; zot tou abandonn mwa.

¹³ Me kan zot ti dan douler, mo ti met linz dey; mo ti zene ek priye. Mo ti azenou pou priye,

¹⁴ kouma mo ti pou fer pou enn kamarad ouswa enn frer. Mo ti kourbe ar sagrin koumadir mo mama ti mor.

¹⁵ Me kan mwa mo kogne mo tonbe, zot bien riy mwa, dan lazwa zot rasanble kont mwa; bann vwayou ki mo mem pa rekonet maltret mwa san pitie.

¹⁶ San pitie zot boufonn mwa kouma bann tilespri; zot grins zot ledan pou montre zot laenn.

¹⁷ Komie letan ankor to pou les zot fer mwa mizer? Defann mwa e sov mo lavi; aras mo lavi dan grif lion.

¹⁸ Mo pou remersie twa dan gran lasanble; mo pou dir to louanz omilie lafoul.

¹⁹ Pa les mo ennmi selebre laviktwar lor mwa, Pa les bann ki ena zis laenn dan leker gagn lamizman dan mo maler.

²⁰ Zot pa ena okenn koze lor lape, zot pas zot letan fer fos akizasion lor dimoun ki viv trankil dan pei.

²¹ Zot ouver zot labous angran, zot dir, “Nou kone ki to ti fer!”

²² O SEGNER, to finn bien trouv tousala; pa gard silans. Pa res lwin ar mwa, Segner!

²³ Lev twa, Bondie, pou fer zistis pou mwa; Revey twa, Segner, pou defann mwa mo drwa!

²⁴ Twa ki vre drwatir, SEGNER, mo Bondie, proklam mo inosans; pa les mo lennmi pran plezir dan mo soufrans.

²⁵ Pa donn zot porte pou dir, “Aster nou finn avoy li manze pou toultan. Samem nou ti‘le. “

²⁶ Bann ki kontan kan mwa mo soufer ki zot konn laont ek konfizion; Bann ki reklam viktwar lor mwa ki zot antoure ar laont ek dezoner.

²⁷ Bann ki dezir trouv lazistis dan mo faver ki zot kriye ar boner ek lazwa; zot pou dir ek redir, “LESEGNER, limem pli gran. Li trouv plezir dan boner so serviter! “

²⁸ E mwa mo pou proklam to drwatir e sant to louanz toutlazourne.