Psom 144 - Kreol Morisyen OT Portions

Lerwa dir twa mersi

Enn Psom David.

¹ Mo loue LESEGNER, mo protekter! Limem ki prepar mwa pou bann batay, antrenn mwa pou gagn lager.

² Limem mo protekter ek mo boukliye, mo sitadel ek mo liberater, mo boukliye, mo abrit mwa deryer li. Limem ki soumet bann pep sou mo kontrol.

³ SEGNER, kifer to pran kont bann imin? Kifer to donn dimoun ordiner enn plas inportan?

⁴ Enn dimoun ordiner li kouma enn ti labriz; bann zour so lavi nek enn lonbraz ki pase.

⁵ O SEGNER, desir kannva lesiel e vinn kot nou; tous bann montagn e fer zot larg lafime.

⁶ Avoy zekler partou e dispers to ennmi; avoy to bann fles e fer zot al kasiet.

⁷ Depi lao avoy to lame pou sekour mwa, delivre mwa dan toran ki bwi ar laraz, tir mwa dan grif bann anvaiser,

⁸ ki zame pa koz laverite, ki lev lame fer serman, me koz manti mem.

⁹ Mo pou sant enn nouvo sante pou twa, O Bondie; mo pou akonpagn mo sante ar sitar pou zwe pou twa,

¹⁰ twa ki donn laviktwar bann lerwa, twa ki sov David, to serviter.

¹¹ Protez mwa kont mo bann ennmi san pitie; tir mwa dan grif bann pep etranze, ki zame pa koz laverite, ki lev lame fer serman, me koz manti mem.

¹² Fer nou bann garson dan zot zenes grandi kouma bann pie solid; fer nou bann tifi vinn bann kolonn ki ar elegans tini nou sato.

¹³ Ranpli nou grenie ar tou sort kalite manze; fer nou zanimo dan patiraz peple par milie.

¹⁴ Fer nou vas met ba san problem, san pert, san foskous. Fer lape ek trankilite regne dan nou lavil.

¹⁵ Bienere pep ki gagn sa kalite benediksion la; bienere pep ki ena LESEGNER pou Bondie.