Psom 106 - Kreol Morisyen OT Portions

Bonte Lesegner Bondie pou so pep

¹ Loue LESEGNER! Nou dir mersi LESEGNER parski li bon e so lamour infini li eternel.

² Kisannla kapav rakont tou bann explwa LESEGNER? Kisannla kapav exprim tou so louanz partou?

³ Bienere dimoun ki obzerv lazistis, ki pratik drwatir touletan.

⁴ Pa bliye mwa SEGNER, ler to montre faver to pep; pa bliye mwa ler to pe sov to pep.

⁵ Mo ti‘a kontan trouv prosperite to pep e partaz lazwa ek boner lepep Bondie, e partaz fierte lepep ki apartenir a twa.

⁶ Parey kouma nou bann anset nou‘si nou finn fer pese; nou finn partisip dan lemal ek dan pese.

⁷ Nou bann anset dan Lezip pa ti konpran bien to bann explwa extraordiner; zot ti souvan bliye to gran lamour infini e kot Lamer Rouz zot ti revolte kont twa.

⁸ Me li ti sov zot pou loner so nom, pou fer zot rapel so gran pouvwar.

⁹ Li ti donn lord Lamer Rouz e toutswit dilo ti sek; li ti gid so pep ki travers lamer lor later ferm;

¹⁰ Li ti protez so pep kont bann ki ti ayir zot; li ti sap zot lavi ler ennmi ti atake.

¹¹ Ler lamer retourne ennmi ti mor nwaye; pena enn ki ti sape.

¹² Lerla lepep rapel promes Bondie e zot sant so louanz.

¹³ Me zot memwar kourt; zot bliye vit tou seki li ti fer; zot azir san atann so konsey.

¹⁴ Dan dezer zot ti anmank e zot ti teste Bondie, zot ti provok li dan sa later arid la;

¹⁵ e li ti donn zot seki zot ti pe rode me anplis li ti donn zot enn maladi ki fer deperi.

¹⁶ Dan dezer kot ti kanpe, zot koumans zalou Moiz ek Aaron, serviter lwayal LESEGNER.

¹⁷ Lerla later ouver e aval Datan e li anter Abiram ek so bann konplis;

¹⁸ dife desann depi lesiel e bril bann dimoun ki pratik lemal.

¹⁹ Lor montagn Oreb zot fer enn vodor e koumans ador enn idol;

²⁰ zot ranplas laglwar ki Bondie ti donn zot, par zimaz enn ti toro, enn manzer lerb.

²¹ Zot nepli rapel Bondie, zot Sover, ki ti fer bann gran mirak dan Lezip,

²² bann aksion etonan lor later Ezipsien, bann mervey terib pre ar Lamer Rouz.

²³ Kan Bondie menas pou detrir so pep so prop serviter ki li ti swazire, Moiz, ti plas li devan Bondie pou detourn so lakoler e pa detrir zot.

²⁴ Lerla zot rezet enn pei merveye parski zot nepli fer konfians promes Bondie.

²⁵ Zot ti mirmire anba latant, e zot ti refiz ekout LESEGNER.

²⁶ LESEGNER lev so lame pou fer enn serman ki li pou les zot mor dan dezer;

²⁷ li pou fann zot desandan parmi bann infidel e les zot mor dan bann pei etranze.

²⁸ Dan Peor, lepep Bondie angaz zot dan adorasion Baal; zot manz ofrand ki ti ofer bondie mor.

²⁹ Sa manier la ti anflam lakoler LESEGNER e li avoy enn maladi mortel lor zot.

³⁰ Me Fineas ti leve pou intervenir, e fleo la ti arete.

³¹ Sa aksion la ti rekonet dan so faver kouma drwatir, ti res dan memwar bann zenerasion pou touzour.

³² Kot lasours Meriba dimoun ti fer LESEGNER ankoler e akoz zot Moiz ti gagn bien traka,

³³ parski zot ti fer li exaspere e li ti pe koze san panse.

³⁴ Zot pa ti eliminn bann infidel kouma LESEGNER ti dimann zot

³⁵ me zot ti marye ar bann nasion ki pa konn Bondie e ti adopte zot koutim ek zot pratik.

³⁶ Lepep Bondie ti ador idol bannla e samem ki ti amenn zot ver destriksion.

³⁷ Zot ofer bann idol Kanaan zot prop tifi ek garson kouma sakrifis;

³⁸ zot ti touy zanfan inosan e disan inosan ti polie later.

³⁹ Zot konportman ti fer zot vinn inpir, zot pratik ti infidel parey kouma prostitision.

⁴⁰ LESEGNER ti bien ankoler ar so pep e li ti degoute ar zot, so prop pep.

⁴¹ Li ti les zot dan lame infidel e zot ti pe dirize par zot ennmi.

⁴² Zot ennmi ti kontrol zot; zot ti kouma esklav.

⁴³ Boukou fwa LESEGNER ti sov so pep me sak fwa zot ti revolte kont li e zot koul dan fon pese.

⁴⁴ Malgre sa li tann zot ler zot kriy osekour e li pran kont zot detres.

⁴⁵ Akoz li kontan zot li rapel so lalians; akoz so lamour infini li ti montre konpasion.

⁴⁶ Li ti adousi leker bann ki ti pe tini zot ankaptivite, e bannla ti ena pitie pou zot.

⁴⁷ Sov nou O SEGNER, nou Bondie, tir nou parmi bann nasion e rasanble nou, pou ki nou kapav remersie twa e loue to gran nom sakre.

⁴⁸ Nou loue LESEGNER, Bondie Izrael; Nou loue li aster ek toultan! Nou tou, anou dir “Amenn!” Alelouya, nou loue LESEGNER!