Proverb 20 - Kreol Morisyen OT Portions1 Divin fer twa vinn tapazer, lalkol fer twa rod lager; dimoun ki dan soulezon zame vinn saz. 2 Kan lerwa ankoler li kouma enn lion ki pe grogne; pa ogmant so koler, to pou fini sis pie anba later. 3 Ninport ki fezer kapav lev lager; me li enn loner pou dimoun ki konn evit lager. 4 Fermie pares pa prepar karo dan bon sezon; ler rekolt vini, zero plonbaz. 5 Panse dan leker enn dimoun, li profon kouma dilo kler anba later; bizin enn lespri fite pou fer li monte. 6 Tou dimoun lor later dir ki zot sinser; anverite, pena boukou ki to kapav vremem fer konfians. 7 Bienere bann zanfan, si zot paran amenn enn lavi san repros. 8 Enn vre dirizan, li enn bon ziz; li konn detekte seki move. 9 Personn pa kapav dir ki so konsians kler; personn pa kapav pretann ki li pena pese. 10 Kan pwa ek mizir trike, LESEGNER deteste. 11 Mem enn zanfan montre ki li ete par so konportman; fasil pou kone si li bon, si li onet. 12 LESEGNER finn donn nou lizie pou gete, ek zorey pou ekoute. 13 Si to pas letan dormi to pou lor lapay, me to katora pou plin si to leve, to al travay. 14 Kan pri tro ser, kliyan plengne; kan li aste mwin ser, li blage e li dir ki li konn marsande. 15 Bann parol konesans pli presie ki boukou lor ek pierpresie. 16 Si kikenn ase bet pou garanti det enn etranze, li merite kan ipotek so dibien kouma garanti. 17 Manze kokin, li bien dou dan labous, me bien vit li vinn ros anba ledan. 18 Swiv bon konsey si to anvi to proze reisi; reflesi bien avan to azir. 19 Palabrer pa konn gard sekre. Pa frekant dimoun ki nek blage. 20 Si to modi to paran, to lavi pou tengn avan ler, kouma enn lalanp dan lanwit. 21 Lamone fasil, mal gagne; li pa pou profit twa plitar. 22 Pa pran lalwa dan to lame; met dan lame LESEGNER, limem Ziz. 23 LESEGNER pa kontan kan trik balans; li malonet kan fos mizir. 24 LESEGNER, limem ki diriz nou pa; akoz sa, souvan nou pa konpran kot nou pe ale. 25 Pans bien avan to promet LESEGNER enn lofrand. Pa fer enn serman ki to pou regrete! Li bien danzere! 26 Enn bon dirizan kone kisannla ki move; li pou pini zot san pitie. 27 LESEGNER finn donn nou enn konsians kouma enn lalanp; li explor nou leker. 28 Enn lerwa res opouvwar kan li bon ek onet; so fidelite rann so tronn pli solid. 29 Fierte zenes dan zot lafors; me seve blan fer bote gran-dimoun. 30 Parfwa bizin gagn bate pou nou manier sanze; souvan bizin gagn dimal pou leker transforme. |
Kreol Morisien OT Portions © Bible Society of Mauritius, 2020.
Bible Society of Mauritius