Proverb 12 - Kreol Morisyen OT Portions

¹ Bann dimoun ki anvi aprann, zot aksepte disiplinn; me bann bet pa aksepte repros.

² LESEGNER donn so faver bann bon dimoun; me li kondann bann ki tir plan pou fer lemal.

³ Pratik lemal pa garanti sekirite; me dimoun drwat ena stabilite.

⁴ Enn bon fam, li kouma enn kouronn lor latet so mari; enn fam infidel, li kouma enn kanser dan lezo so mari.

⁵ Dimoun onet ena touzour bon lintansion; konsey enn malfeter met dimoun dan perdision.

⁶ Parol bann move dimoun kouma bann piez mortel; me parol dimoun drwat amenn delivrans.

⁷ Move dimoun fini mal, li pa les okenn tras; me fami dimoun drwat res bien solid.

⁸ Enn dimoun intelizan gagn ladmirasion; dimoun leker sal zame pou ena rezon.

⁹ Preferab res sinp e travay pou roul lakouzinn; olie met dan zar, me vant pe kriy lafaminn.

¹⁰ Bon dimoun okip bien zot zanimo; me move dimoun maltret seki pou zot.

¹¹ Enn planter ki travay dir, so grenie ranpli; enn inbesil perdi letan ar tou seki initil.

¹² Move dimoun rod rises mal-gagne; me bon dimoun zame mank manze.

¹³ Move dimoun pieze ar zot prop mansonz; dimoun onet konn evit maler.

¹⁴ Kan travay bien, gagn bon lapey; kan koz bon parol, gagn sikse.

¹⁵ Dimoun vantar touletan krwar zot ena rezon; me dimoun saz touletan ekout bon konsey.

¹⁶ Bann inbesil ankoler vit; me bann saz kontrol zot lemosion.

¹⁷ Enn temwin ki koz laverite amenn lazistis; mansonz enn move temwin nouri linzistis.

¹⁸ Parol anler fer dimal kouma lepe; me parol reflesi amenn gerizon ek lape.

¹⁹ Enn parol laverite res pou touzour; me enn parol mansonz res zis pou enn zour.

²⁰ Ena mesanste dan leker bann dimoun ki fer lemal; me ena lazwa dan leker bann dimoun ki fer lape.

²¹ Bann dimoun ki drwat viv dan leboner; me bann malfeter antoure ar maler.

²² LESEGNER deteste dimoun manter; me li apresie dimoun sinser.

²³ Dimoun edike pa fer palab; me bann bet etal zot betiz lor latab.

²⁴ Dimoun ki travay dir pou gagn pouvwar; me bann pares pou vinn esklav.

²⁵ Traka dan leker fer twa dekouraze; me enn bon parol fer twa soulaze.

²⁶ Enn dimoun drwat donn bon konsey so prosin; me sime enn move dimoun amenn li dan petrin.

²⁷ Bann dimoun pares pena nanye pou roti; me dimoun ki travay dir, touletan ena kitsoz pou kwi.

²⁸ Lor sime ladrwatir, to pou viv lontan; me lor sime lemal, to pou mor kouma perdan.