Ester 8 - Kreol Morisyen OT Portions

Ester sov bann Zwif

¹ Sa mem zour la, lerwa Zerses donn larenn Ester tou dibien ki Amann, lennmi bann Zwif, ti posede. Mardose vinn prezant limem divan lerwa, parski Ester ti finn explik lerwa ki Mardose ete pou li.

² Lerwa donn Mardose so bag ki li ti finn repran ar Amann. Lerla, Ester nomm Mardose responsab pou zer bann dibien Amann.

³ Apre sa, Ester re-al koz avek lerwa. Li tom dan so lipie anlarm. Ester sipliy lerwa pou sov bann Zwif dan sa plan diabolik ki Amann ti finn konplote kont zot la.

⁴ Lerwa tir baton rwayal pou Ester,

⁵ e Ester remet li dibout divan lerwa. Li dir: “Si sa fer lerwa plezir e si mo finn gagn so faver; si li panse ki seki mo pe dir, bon, e ki mo gagn so lakor, fer enn lord ofisiel sorti. Sa lord la pou kennsel tou sa bann let ki Amann, garson Amedata, enn Agazit, ti ekrir pou donn lord touy bann Zwif dan tou so bann provins.

⁶ Kouma eski mo pou kapav get sa katastrof ki pe vinn lor mo pep la? E kouma mo pou kapav siport lamor bann ki parey kouma mwa?”

⁷ Lerla, Lerwa Zerses dir larenn Ester ek Zwif Mardose: “Get sa, mo finn donn Ester pouvwar pou kontrol dibien Amann. Zot finn pandi li akoz li ti konplote pou touy bann Zwif.

⁸ To kapav ekrir seki to oule dan faver bann Zwif, lor nom lerwa. Stanp li avek bag lerwa, parski pa gagn drwa sanz enn lord ki ekrir lor nom lerwa e ki stanpe avek so bag.”

⁹ Zot konvok bann sekreter lerwa dan trwaziem mwa. Sa mwa la apel Sivann, e sa pase lor so venn-trwaziem zour. Zot ekrir enn lord ki Mardose dikte zot, pou tou bann Zwif, bann fonksioner, gouverner ek gran ofisie bann provins depi Lenn ziska Kous. Ena antou 127 provins, e finn ekrir sakenn dapre so manier ekrir ek so langaz. Bann Zwif osi gagn dekre la dan zot prop lekritir ek langaz.

¹⁰ Zot ekrir bann let la lor nom lerwa Zerses. Apre, zot stanp bann let la ar so bag e avoy zot par bann mesaze lor seval ki vinn depi lekiri rwayal. Zot ale lor vites.

¹¹ Dan sa let la, lerwa donn permision bann Zwif pou defann zot lavi. Zot gagn drwa detrir, touye ek exterminn ninport ki dimoun avek zarm dan ninport ki provins ki rod atak zot, zot fam ek zot bann zanfan. Zot gagn drwa osi pou kokin dibien sa bann dimoun la.

¹² Zot gagn drwa fer sa dan enn sel zour dan tou bann provins lerwa Zerses; lor treziem zour, douziem mwa, ki mwa Adar.

¹³ Zot avoy kopi sa let la dan tou provins pou donn tou dimoun. Let la vinn enn dekre kot bann Zwif bizin prepar zot pou vanz kont zot bann lennmi.

¹⁴ Bann mesaze degaze mont lor zot seval pou al kit bann let la kouma lerwa finn komande. Finn tir sa dekre la dan kapital Siz.

¹⁵ Mardose sorti kot lerwa avek linz rwayal kouler ble ek blan. Ena enn kouronn lor so latet. Li finn met osi enn manto an-lin kouler mov. Bann abitan Siz exprim zot lazwa.

¹⁶ Bann Zwif finn retrouv enn lalimier ek lakontantman. Zot ena lazwa ek loner pou Mardose.

¹⁷ Dan sak provins kot lord lerwa ale, ena bel lakontantman parmi bann Zwif. Zot organiz repa ek fet. Anplis, boukou dimoun dan pei dir ki zot Zwif parski zot per ki bannla atak zot.