Ester 6 - Kreol Morisyen OT Portions

Lerwa onor Mardose

¹ Sa mem swar la, lerwa pa pe gagn somey. Li donn lord pou amenn liv arsiv kot finn ekrir bann evennman rwayom. Li fer lir liv la pou li ekoute.

² Dan pasaz ki zot pe lir, lerwa tande kouma Mardose ti denons konplo ki Bigtann ek Teres, de ofisie lakour rwayal, ti fer pou asasinn li.

³ Lerla, lerwa dimande: “Ki loner e ki rekonpans finn donn Mardose pou seki li finn fer?” Bann serviter ki la reponn: “Nanye pa finn fer pou li.”

⁴ Lerwa dimande: “Kisannla ki dan lakour pale la?” Amann ti finn fek arive. Li finn vini pou koz ar lerwa lor size Mardose. Amann anvi fer pandi li.

⁵ Bann serviter dir lerwa: “Amann ki dan lakour.” Lerwa dir zot: “Fer li rantre.”

⁶ Amann rantre e lerwa dimann li: “Ki kapav fer pou enn dimoun ki mo anvi onore?” Letan Amann tann sa kestion la, li dir dan limem: “Kisannla lerwa pou anvi onore plis ki mwa?”

⁷ Alor, Amann dir lerwa: “Pou sa dimoun ki lerwa anvi onore la,

⁸ fer amenn linz rwayal ki lerwa finn deza mete. Fer amenn osi enn seval ki lerwa finn deza monte. Met enn kouronn rwayal lor so latet.

⁹ Donn linz rwayal la ek seval la pli gran ofisie lerwa. Fer ofisie la abiy sa dimoun ki lerwa anvi onore la. Fer ofisie la sarye sa dimoun la partou, lor seval, lor laplas piblik e fer li kriye for-for pou ki tou dimoun tande: ‘Ala kouma Lerwa rekonpans enn dimoun ki li anvi donn loner.’”

¹⁰ Lerwa dir Amann: “Degaze, al pran bann linz la ek seval la. Al fer kouma to finn dir pou Mardose, sa Zwif ki travay dan lantre pale la. Pa bliye okenn detay ki to finn dir.”

¹¹ Amann ekzekit lord lerwa. Li pran linz ek seval la. Li abiy Mardose e kondir li lor laplas piblik. Li kriye for-for: “Ala kouma Lerwa rekonpans enn dimoun ki li anvi donn loner.”

¹² Apre sa, Mardose retourn dan so pos travay. Me Amann degaze rant so lakaz avek lasagrin ek so latet kouver.

¹³ Letan Amann rakont so fam, Zeres, ek so bann konseye tou seki finn ariv li, bannla dir li: “Si to finn perdi lafas divan Mardose, ki enn Zwif, abe to pa pou reysi konbat kont li. Pena zes, li pou fini twa.”

¹⁴ Zot ankor pe koze letan ofisie lerwa vinn sers Amann anvites, pou amenn li dan festin ki Ester finn prepare.