Ester 5 - Kreol Morisyen OT Portions

Festin Ester

¹ Apre trwa zour karem, Ester met so rob rwayal. Li rant dan lakour ki trouv andan pale. Lakour la vizavi ar lasal kot ena tronn. Lerwa pe asiz lor so tronn ki vizavi lantre pale.

² Kouma lerwa trouv Ester pe diboute dan lakour, lerwa donn li so faver. Deswit, li tir so baton rwayal e li prezant li dan direksion Ester. Ester aprose e li tous baton rwayal la dan so bout.

³ Lerwa dimann li: “Ki finn arive, larenn Ester? Ki mo kapav fer pou twa? Seki to dimande mo pou donn twa, mem si sa kout mwa lamwatie mo rwayom.”

⁴ Ester reponn li : “Si sa fer lerwa plezir, les li vinn avek Amann dan festin ki mo finn prepare pou lerwa zordi.”

⁵ Lerwa dir: “Degaze al sers Amann pou ki nou realiz dezir Ester.” Lerla, zot toulede, lerwa ek Amann, al dan festin ki Ester finn prepare.

⁶ Letan ki zot pe amize, manze-bwar, lerwa dimann Ester: “Ki to ti anvi dimann mwa? Mo pou donn twa tou seki to oule, seki to dimande to pou gagne. Mem si sa kout mwa lamwatie mo rwayom, mo pou fer li pou twa.”

⁷ Ester dir: “Ala seki mo oule:

⁸ Si mo finn gagn lestim lerwa e si sa fer li plezir pou donn mwa seki mo dimande, mo ti pou kontan si lerwa ek Amann vinn dan festin ki mo pou organize pou zot dime. Lerla, mo pou dir lerwa mo dezir.”

Amann fer plan pou pandi Mardose

⁹ Sa zour la, Amann ale leker kontan. Li trouv Mardose dan lakour pale. Mardose pa ni leve ni gagn per divan li. Sa fer so koler monte.

¹⁰ Me Amann kontrol so koler e li al so lakaz. Letan li rant kot li, Amann apel so fam, Zeres, ek so bann kamarad.

¹¹ Li koumans flat limem ar zot. Li dir zot ki kantite rises ek komie garson li ena. Li osi dir zot ki manier lerwa finn nomm li pli gran fonksioner lakour rwayal. Sa donn li enn gran loner.

¹² Amann dir ankor: “Mem larenn Ester pa finn les personn, apart mwa, akonpagn lerwa dan festin ki li ti prepare. Dime osi mo invite pou al dan so festin ansam avek lerwa.

¹³ Me tousala pa fer mwa plezir, tanki mo pou trouv sa Zwif la, Mardose, pe travay dan lakour pale.”

¹⁴ So fam, Zeres, ek so bann kamarad ki la, dir li: “Dime gramatin, fer aranz enn safodaz. Kan to pou al dan festin avek lerwa, dir li fer pandi Mardose. Koumsa, to ava amize lespri trankil apre.” Sa konsey la fer Amann plezir e li fer aranz safodaz la.