Ester 4 - Kreol Morisyen OT Portions

Ester ed bann Zwif

¹ Kan Mardose aprann tou seki ti pe maniganse kont bann Zwif, li telman afekte par tousala ki li desir so linz. Li met enn sak goni lor li ek lasann lor so latet. Lerla, li al mars partou dan lavil, e li kriye for-for pou montre so douler.

² Letan li ariv divan laport pale, li res lamem parski personn pa gagn drwa rant dan lakour lerwa avek enn sak goni lor li.

³ Dan sak provins kot lord lerwa ek so dekre arive, ena gran tristes ek dey parmi bann Zwif. Zot gard karem, kriye, plore ar lasagrin. Laplipar met sak goni lor zot ek lasann lor zot latet.

⁴ Bann servant ek ofisie Ester vinn anons li sa nouvel la. Letan Ester tann sa, li extra afekte. Ester fer avoy linz pou Mardose pou ki li kapav tir so sak goni lor li. Mardose pa aksepte bann linz la.

⁵ Lerla, Ester fer apel Atak, enn parmi bann ofisie ki lerwa finn avoye pou servi li. Ester donn li lord pou al pran ransegnman ar Mardose pou kone ki pe arive e kifer li pe azir koumsa.

⁶ Atak al rod Mardose lor laplas konsey divan laport pale lerwa.

⁷ Mardose rakont li tou seki finn pase. Li dir li komie kas Amann finn promet pou met dan lakes rwayal si detrir tou bann Zwif.

⁸ Mardose donn li enn kopi sa dekre ki ordonn destriksion bann Zwif e ki pe sirkile partou dan Siz. Mardose dimann Atak montre sa let la Ester pou ki li kapav al pled koz so pep divan lerwa.

⁹ Ler li fini gagn tou ransegnman, Atak retourne e rakont Ester tou seki Mardose finn dir.

¹⁰ Apre ki Ester finn bien ekout Atak, li avoy li kot Mardose avek sa mesaz la:

¹¹ “Tou dimoun kone ki, si enn serviter oubien ninport kisannla dan bann provins lerwa, al prezant li divan lerwa dan lakour andan pale, san ki finn apel li, sa dimoun la pou gagn lamor. Pena sape, sa lalwa la pou tou dimoun. Pou ki dimoun la ena enn sans viv, fode ki lerwa prezant li so baton rwayal. Momem lerwa pa finn apel mwa depi trant zour.”

¹² Bannla al raport Mardose seki Ester finn dir.

¹³ Letan Mardose tann sa, li dir zot al dir Ester: “Pa panse ki twa to pou sape parmi bann Zwif, zis parski to res dan pale lerwa.

¹⁴ Si dan enn sitiasion koumsa to swazir pou ferm to labous, soulazman ek delivrans bann Zwif pou vinn dan enn lot fason. Me twa ek fami to papa pou mor. Ki kone, kapav to finn vinn larenn pou enn mision koumsa?”

¹⁵ Apre ki li finn tann sa, Ester fer dir Mardose:

¹⁶ “Al rasanble tou bann Zwif ki dan Siz e fer zot tou gard karem lor mo nom. Pa manze ni bwar pandan trwa zour, ki li lanwit ki li lizour. Mo bann servant ek mwa, nou osi nou pou gard karem parey kouma zot. Apre sa mo pou al get lerwa, mem si sa kont lalwa. Si mo bizin mor, mo ava mor.”

¹⁷ Mardose al fer ekzakteman seki Ester ti dimann li fer.