Ester 3 - Kreol Morisyen OT Portions

Amann fer plan pou detrir bann Zwif

¹ Amann garson Amedata, enn Agazit. Apre bann levennman ki finn pase, lerwa Zerses nomm Amann pli gran fonksioner lakour rwayal. Lerwa fer li vinn premie minis parmi tou bann ofisie.

² Tou bann serviter ki travay ar lerwa fer tou seki Amann dir. Zot tou kourbe divan li parski lerwa finn donn lord tou dimoun pou swiv seki li komann zot. Me Mardose refiz kourbe divan li.

³ Letan bann lezot serviter trouv sa, zot dimann Mardose: “Kifer to pa obeir lord lerwa?”

⁴ Bann serviter la koz ar Mardose toulezour pou li sanz so latitid. Zot raport sa ar Amann, me sa pa servi nanye. Mardose dir zot ki li enn Zwif.

⁵ Ler Amann trouve ki Mardose pa kourbe divan li e ki li pa obeir so bann lord, sa fer li extra ankoler.

⁶ Me Amann pa anvi atak Mardose tousel, parski li finn aprann ki Mardose enn Zwif. Li desid pou fer enn konplo pou detrir tou bann Zwif ki dan rwayom lerwa Zerses antie.

⁷ Dan komansman douziem lane regn lerwa Zerses, dan premie mwa ki ti apel mwa Nisann, Amann fer gete ki pli bon dat ek mwa pou realiz so plan. Sa apel “Pourim”. Sor ti tom lor treziem zour dan douziem mwa ki apel mwa Adar.

⁸ Amann al dir ar lerwa Zerses: “Ena enn parti lepep ki disperse, zot pa oule melanz zot ar bann dimoun ki dan bann provins to rwayom. Zot lalwa diferan ar lalwa bann lezot dimoun e zot pa oule obeir bann lord lerwa. Sa pa korek ditou. Lerwa bizin pa toler zot.

⁹ Si lerwa zize ki li bon, fer enn dekre ki pou donn lord detrir zot. Mo sir mo pou kapav gagn ziska trwasan tonn larzan ki mo pou donn bann ofisie ki ansarz bann biznes Lerwa. Zot pou kapav met sa larzan la dan lakes lerwa.”

¹⁰ Lerla, lerwa tir so bag li donn Amann, garson Amedata ki enn Agazit. Amann, limem lennmi bann Zwif.

¹¹ Lerwa dir Amann: “Mo larg pep la dan to lame. Gete ki to oule fer ar zot e to kapav gard larzan la pou twa.”

¹² Lor treziem zour dan premie mwa, konvok tou bann sekreter lakour rwayal. Amann donn zot lord pou ekrir bann let e pou avoy kot bann reprezantan lerwa ek bann gouverner dan tou bann provins. Ekrir osi bann sef tribi dan sak provins. Ekrir zot dan zot prop lekritir ek zot prop langaz. Zot ekrir let la lor nom lerwa Zerses e stanp li ar so bag.

¹³ Lerla, avoy let la dan tou bann provins lerwa Zerses. Donn lord pou detrir, pou touy ek exterminn, dan enn zour, tou bann Zwif; zenn ek vie, fam ek zanfan. Sa tom treziem zour dan douziem mwa, ki apel mwa Adar. Finn osi gagn lord pou fer piyaz ar zot bann dibien.

¹⁴ Zot avoy enn kopi sa let la dan sak provins kouma enn dekre ki proklame ki tou bann pep bizin prepar zot pou sa zour la.

¹⁵ Bann let la ale vit-vit par lord lerwa ek dekre la pase dan kapital Siz. Amann ek lerwa pe amize, manze-bwar, me bann zabitan Siz dan traka, nepli kone ki pou fer.