Ester 2 - Kreol Morisyen OT Portions

Ester vinn larenn

¹ Apre bann levennman avek larenn Vasti, koler lerwa Zerses finn pase. Li reflesi lor seki larenn Vasti finn fer ek lor desizion ki finn pran kont larenn.

² Bann serviter ki travay ar lerwa lerla dir: “Anou rod bann zoli tifi vierz pou lerwa.

³ Les lerwa angaz bann dimoun dan tou bann provins so rwayom. Zot ava rasanble bann zenn vierz dan arem ki trouv dan kapital Siz. Fer Egay okip sa, Parski limem ki ena responsabilite bann fam. Li ava donn zot bann prodwi bote.

⁴ Tifi ki pou fer plezir lerwa ava vinn larenn dan plas Vasti.” Sa bann lide la fer lerwa plezir e li fer exakteman samem.

⁵ Ena enn Zwif dan kapital Siz ki apel Mardose. Li garson Zair, garson Simey. Simey garson Kis, enn Benzaminit.

⁶ Kis parmi bann ki ti deporte depi Zerizalem, ansam ar Yekonia, lerwa Zida. Nabikodonozor, lerwa Babilonn, ki ti deport zot.

⁷ Mardose finn grandi Adasa, setadir Ester, so kouzinn, parski li pa ena ni papa ni mama. Tifi la enn bote. Letan so bann paran ti mor, Mardose ti adopte li kouma so prop tifi.

⁸ Kan lord lerwa proklame, enn kantite zennfi rasanble dan sitadel Siz. Zot lor responsabilite Egay e Ester parmi zot.

⁹ Ester pler Egay boukou e li gagn so faver. Egay donn lord pou fer so bann makiyaz e pou donn li bann pli bon manze. Li swazir set servant dan pale lerwa, zis pou Ester. Lerla, Egay avoy li ek so bann servant dan meyer plas dan arem.

¹⁰ Ester pa les personn konn so lorizinn, parski Mardose finn defann li koz sa.

¹¹ Toulezour Mardose mars-marse divan laport lakour arem pou gagn nouvel Ester e kone seki pe ariv li.

¹² Dan arem, bann tifi la bizin swiv enn tretman pou zot bote pandan douz mwa: sis mwa avek delwil oubien lamir ek sis mwa avek parfin ek kosmetik. Lerla, amenn zot, sakenn so tour, divan lerwa Zerses.

¹³ Kan zennfi la al divan lerwa, zot donn li tou seki li dimande pou amenn ar li dan pale.

¹⁴ Amenn li kot lerwa aswar, e gramatin li retourn dan deziem arem lor responsabilite Sasgaz, serviter lerwa. Limem ki ansarz bann konkibinn. Tifi la pa retourn kot lerwa ankor, apart si lerwa apresie li e lerla fer apel li.

¹⁵ Ler arive pou Ester, tifi Abihel, tonton Mardose, pou al kot lerwa. Li pa dimann nanye apart seki Egay, enik lerwa, ti konsey li. Tou dimoun ki zwenn Ester admir li.

¹⁶ Amenn Ester dan pale rwayal divan lerwa Zerses, lor diziem mwa, ki mwa Tebet, dan setiem lane so regn.

¹⁷ Lerwa kontan Ester plis ki tou lezot fam. Parmi tou sa bann vierz la, Ester gagn faver ek tandres lerwa. Lerwa met kouronn rwayal lor latet Ester e fer li vinn larenn dan plas Vasti.

¹⁸ Lerla, lerwa fer enn gran festin anloner Ester pou tou so bann ofisie ek minis. Lerwa donn enn zour konze dan tou provins. Li donn bann kado dign enn lerwa, ek leker kontan.

Mardose dekouver enn konplo

¹⁹ Letan rasanble bann zennfi la enn deziem fwa, Mardose pe okip enn pos dan pale lerwa.

²⁰ Ester, dan so kote, finn swiv konsey Mardose pou pa dir personn so lorizinn. Ester obeir Mardose, parey kouma li ti obeir li kan Mardose ti grandi li.

²¹ Dan lepok kot Mardose pe okip sa pos inportan la dan pale lerwa, Bigtann ek Teres, de ofisie lerwa ki vey lantre pale, ankoler. Zot fer konplo pou touy lerwa Zerses.

²² Me Mardose dekouver zot rol. Li al koz sa ar larenn Ester. Lerla, larenn al dir sa lerwa lor nom Mardose.

²³ Letan al fer lanket, dekouver ki konplo la vre. Lerla, met toulede zom pandi. Zot fer ekrir sa levennman la dan liv arsiv, dan prezans lerwa.