Ester 1 - Kreol Morisyen OT Portions

Lerwa Zerses organiz enn gran festin

¹ Sa pase dan lepok Zerses, ki regn lor 127 provins depi Lenn ziska Kous.

² Sa lepok la, lerwa Zerses pe siez lor tronn rwayal dan lavil Siz.

³ Dan trwaziem lane so regn, li organiz enn gran festin pou tou so bann ofisie ek minis. Larme Pers ek Medi, bann nob ek gouverner bann provins, tou prezan.

⁴ Lerwa la montre bann gran rises ki fer loner so rwayom ek bann kiksoz gran valer ki montre so grander. Fet la deroule 180 zour.

⁵ Apre sa, lerwa fer enn lot fet dan zardin pale. Tou bann dimoun ki res dan lavil Siz invite; depi pli ris ziska pli pov. Sa fet la dire pandan enn semenn antie.

⁶ Ena rido blan avek bann rozet ble ki atase ar bann riban mov an-lin. Sa bann riban la, atase dan bann bag larzan ki fixe lor bann kolonn marb. Ena bann lez lor ek larzan ki kouver enn sali mozaik; marb, perl ek ros kouler.

⁷ Servi labwason dan tou sort kalite goble an-or. Ena divin par kantite, e zot servi li anabondans.

⁸ Sak dimoun kapav bwar kantite ki li anvi. Lerwa finn donn lord bann serviter dan so pale pou fer tou seki so bann invite anvi.

⁹ Larenn Vasti osi organiz enn festin dan sato lerwa Zerses pou tou bann fam.

¹⁰ Lor setiem zour, lerwa ena lazwa apre ki li finn bwar divin. Li apel so set serviter personel: Meoumann, Bizta, Arbona, Bigta, Abagta, Zetar ek Karkas.

¹¹ Li donn zot lord pou amenn larenn Vasti, avek so kouronn rwayal, divan li. Larenn Vasti ena enn bote extraordiner. Lerwa anvi montre tou bann pep ek bann ofisie kouma larenn zoli.

¹² Me larenn Vasti refiz ekout lord ki lerwa finn donn li atraver bann serviter la. Sa fer lerwa bwi ar koler.

¹³ Lerwa desid pou al koz avek bann konseye ki konn lalwa, pou kone seki zot panse. Lerwa abitie pran so bann desizion avek led bann konseye ki bien konn lalwa ek koutim.

¹⁴ Ala nom bann dimoun ki li fer vini: Karsena, Setar, Admata, Tarsis, Meres, Marsena ek Memoukann. Zot set minis Pers ek Medi ki gagn akse ar lerwa anpremie dan rwayom.

¹⁵ Lerwa dimann zot: “Dapre lalwa, ki bizin fer ar larenn Vasti? Li pa finn obeir lord ki lerwa ti donn li atraver bann minis.”

¹⁶ Lerla, Memoukann dir divan lerwa ek bann ofisie: “Larenn Vasti pa finn fer fos zis ar lerwa, me osi ar tou bann ofisie ek tou dimoun ki dan bann provins lerwa Zerses.

¹⁷ Seki larenn finn fer la, tou fam pou konn sa e zot pou defie lotorite zot mari. Bann fam la pou dir: ‘Larenn Vasti, limem li pa finn obeir kan lerwa Zerses ti donn li lord pou vinn divan li!’

¹⁸ Zordimem, bann fam tou bann minis dan Pers ek Medi pou kone ki larenn Vasti finn fer. Lerla, zot osi zot pou koumans dezobeir zot mari e sa pou kre enn gran dezord!

¹⁹ Si lerwa zize ki sa bon, fer enn lord rwayal sorti. Ekrir li dan bann lalwa Pers ek Medi pou ki pa kapav sanz li; fer ki Vasti nepli gagn okenn drwa pou vinn divan lerwa Zerses ankor. Lerla, lerwa ava donn tit larenn enn lot dimoun ki pli respektab.

²⁰ Letan sa lalwa la pou proklame partou dan so gran rwayom, tou bann fam, gran dimoun kouma ti dimoun, pou bizin onor zot mari.”

²¹ Sa konsey la fer lerwa ek so bann ofisie plezir. Lerwa fer parey kouma Memoukann finn propoze.

²² Li avoy bann let dan tou provins rwayal. Sak provins gagn let la dan so prop lekritir ek sak tribi dan so prop langaz. Lord la deklare ki sak zom bizin sef dan so prop lakaz.