Psom 95 - Nouvo Testaman Kreol Morisien Harmonisation NTPS KM

Obeir Lesegner Bondie

¹ Vini tou dimounn, anou sant louanz LESEGNER; Anou kriye for nou lazwa dan Bondie ki nou Sover.

² Anou al divan li ar remersiman ek rekonesans; anou kriye nou lazwa ar kantik louanz!

³ LESEGNER li Bondie ki pwisan; limem pli gran Lerwa ki lao tou ti-bondie.

⁴ Li tini profonder later dan so lame, ek some bann montagn, sa ousi pou li.

⁵ Li regne lor lamer ki so prop kreasion; Li regne lor later osi, so lot kreasion.

⁶ Vini! Anou ador li, anou prostern devan li, anou azenou divan LESEGNER, nou kreater!

⁷ Limem nou Bondie; nou, nou so pep ki li okipe; so troupo ki li pran kont. Ekoute zordi ki li pe dir zot.

⁸ “Pa andirsi zot leker kouma zot anset dan Meriba; pa fer seki bann-la ti fer dan dezer Masa.

⁹ Zot ti desid pou teste mo pouvwar malgre ki zot ti kone tou seki mo ti fer pou zot.

¹⁰ Pandan karant an mo ti degoute ar zot. Mo ti dir, "Get kouma zot ena lespri egare; Zot refiz obeir mo instriksion.”

¹¹ Mo ti bien ankoler e mo ti fer serman, "Zame zot pou rant dan landrwa kot mo ti pou donn zot mo repo.”