Mk 13 - Nouvo Testaman Kreol Morisien Harmonisation NTPS KM

Zezi predir destriksion Tanp

¹ Letan Zezi sorti andeor Tanp, enn so bann disip dir li, “Met, gete kouma sa bann ros-la zoli, get sa zoli batiman-la, enn mervey!”

² Zezi dir li, “To trouv sa bann gran-gran batiman-la? Pa pou res ros lor ros; tou pou grene.”

³ Letan li finn fini asiz lor Kolinn Pie Zoliv, vizavi Tanp, Pier, Zak, Zan ek Andre ris li dan enn kwin pou poz li enn kestion,

⁴ “Dir nou, kan tousala pou arive? Ki sign pou fer nou konpran ki tousala pre pou akonpli?”

⁵ Lerla Zezi koumans dir zot, “Get bien pou ki personn pa anbet zot;

⁶ Boukou pou vini, zot pou servi mo nom, zot pou dir ‘Momem sa.’ Koumsa mem zot pou anbet boukou dimounn.

⁷ Kan zot pou tann lager ek tapaz lager, pa tranble; fode ki tousala arive, me li pankor lafin.

⁸ Pou ena lager, pei kont pei, gouvernman kont gouvernman, pou ena tranbleman-de-ter dan plizir landrwa, pou ena lafaminn; tousala kouma douler enn fam ki pre pou akouse.

⁹ Me zot, fer atansion; bann-la pou trenn zot devan tribinal ek dan sinagog e zot pou gagn bate; pou amenn zot devan bann gouverner ek bann lerwa akoz mwa, samem pou zot temwaniaz devan bann-la.

¹⁰ Premie dabor, fode ki Bonn Nouvel proklame dan tou bann nasion.

¹¹ Kan bann-la pou aret zot, pou zot pas an zizman, pa trakase pou kone ki zot pou dir; me dan sa ler-la dir seki vinn dan zot labous; parski napa zot ki pou koze me Lespri Sin.

¹² Frer pou trayir frer ziska lamor, papa pou trayir zanfan; zanfan pou revolte kont zot fami e pou fer touy zot.

¹³ Tou dimounn pou ayir zot akoz mwa; me seki tini ferm ziska lafin, Bondie pou sov li.

Gran panik

¹⁴ Kan zot pou trouv enn sakrilez abominab dan landrwa ki pa ti bizin (dimounn ki pe lir, konpran seki mo pe dir), bann ki dan Zide, sove, al dan montagn.

¹⁵ Seki lao lor so lakaz, pa kalkil desann anba, ni rant dan lakaz pou pran kiksoz;

¹⁶ seki dan karo, pa kalkil retourn par deryer pou pran so linz.

¹⁷ Bien malere bann fam ansint ek bann ki pe donn bwar zot ti baba sa lepok-la.

¹⁸ Priye pou ki sa pa arive an-iver.

¹⁹ Parski kan sa pou arive, pou ena enn gran detres, enn detres ki zame finn arive depi koumansman kreasion, depi ki Bondie finn kree lemond ziska aster, e ki zame pou trouve ankor.

²⁰ Si Lesegner pa ti finn rakoursi sa bann zour-la, personn napa ti pou sove; me li finn rakoursi sa bann zour-la, akoz bann dimounn ki li finn swazir.

²¹ Si ninport kisann-la dir zot dan sa ler-la, ‘Gete, ala Lemesi isi! Gete ala li laba!’ Napa krwar li.

²² Fos mesi ek fos profet pou leve; zot pou fer bann mirak pou fer dimounn tom dan lerer, e si posib, mem parmi bann seki finn swazir.

²³ Vey bien; mo finn bien prevenir zot.

Larive Garson Limanite

²⁴ Kan sa pou arive, apre sa detres-la, soley pou vinn som, lalinn pa pou donn so lekleraz,

²⁵ zetwal pou koumans degringole e tou bann pwisans dan lesiel pou sakouye.

²⁶ Lerla zot pou trouv Garson Limanite desann depi dan niaz avek tou so pwisans ek tou so laglwar.

²⁷ Lerla li pou avoy so bann anz e li pou rasanble dimounn ki li finn swazir partou kote, depi enn bout later ziska lot bout lesiel.

Parabol pie fig

²⁸ Konpran parabol pie fig: kan so bann brans vinn tann e ki so bann fey koumans sorti, zot kone ki lete pre pou vini.

²⁹ Parey pou zot osi, kan zot trouv sa bann zafer-la arive; zot kone li pre, li deryer laport.

³⁰ Laverite, laverite mo dir zot, avan ki sa zenerasion-la disparet, tousala pou arive.

³¹ Lesiel ek later pou disparet me mo parol pa pou disparet.

Veye

³² Personn napa kone ki zour, ki ler sa pou arive, ni bann anz, pa mem so Garson, me zis Bondie so Papa.

³³ Get bien, vey bien; parski zot pa kone kan tousala pou arive.

³⁴ Li parey kouma enn dimounn ki pe parti; avan li kit so lakaz, li donn bann serviter lotorite pou azir, sakenn so latas e li donn gardien lord pou veye.

³⁵ Akoz samem zot ousi, veye, parski zot pa kone kan proprieter lakaz pou revini: aswar, dan milie lanwit, letan kok sante, ouswa letan soley pe leve,

³⁶ pangar, enn kout li vini e li trouv zot pe dormi.

³⁷ Seki mo pe dir zot, mo pe dir li pou zot tou: Veye.”