Let Zid 1 - Nouvo Testaman Kreol Morisien Harmonisation NTPS KM

Salitasion

¹ Zid, serviter Zezi Kris ek so frer Zak, pe ekrir sa let-la tou bann dimounn ki finn apele par Bondie e ki viv dan lamour Bondie Papa ek anba proteksion Zezi Kris.

² Ki zot resevwar boukou mizerikord, lape ek lamour.

Fos profeser

³ Mo bann kamarad, mo ti pe fer tou pou ekrir zot lor size ladelivrans ki nou ena an-komin, me mo finn trouv li neseser pou adres zot sa let-la, pou ankouraz zot pou lite dan lafwa ki Bondie finn donn so pep sin.

⁴ Ofet ena sertin dimounn malonet ki finn infiltre parmi zot. Zot finn abiz bonte Bondie pou zistifie zot aksion imoral e zot finn osi rezet Zezi Kris nou sel Met ek Segner. Depi lontan Lekritir finn anons sa kondanasion ki pe ariv zot la.

⁵ Mem si zot konn tousala, mo anvi rapel zot kouma Lesegner finn sov so pep depi later Lezip enn fwa pourtou, me pli tar li ti detrir bann ki pa ti krwar.

⁶ Zot rapel bann anz ki pa ti gard zot pozision, zot ti kit zot lakaz, e zot finn res touletan ansene dan prizon teneb ziska gran zour zizman Bondie.

⁷ Zot rapel Sodom ek Gomor ek lezot lavil dan lezanviron; kot bann abitan ti pe amenn enn lavi dezord e zot ti pe swiv zot prop dezir imoral. Sa se enn lexanp ki zot touletan anba pinision.

⁸ Dan mem fason, sa bann dimounn ki fer vizion la, zot sali zot lekor, rezet lotorite ek insilte bann kreatir ki viv dan laglwar eternel Bondie.

⁹ Mem larkanz Mikael, letan li ti pe lager avek diab pou gagn lekor Moiz, li pa ti oze kondann e insilte diab; me li ti zis kapav dir: “Ki Bondie pini twa!”

¹⁰ Me sa bann dimounn-la denigre seki zot pa konpran, e sa bann kiksoz ki zot kone par linstin, kouma bann zanimo sovaz, samem ki fini zot.

¹¹ Maler lor zot parski zot finn swiv sime Kain. Akoz larzan, zot finn egare kouma Balam e zot finn mor dan zot revolt kouma rebelion Kore.

¹² Zot prezans li enn skandal dan zot bann repa fraternel, kot zot fer fet san okenn laont e zot nek okip zotmem. Zot parey bann niaz ki pena lapli e ki divan pe pouse. Zot parey bann zarb ki mem dan lotonn pa donn fri, enn fwa derasinn zot, zot mor pou touletan.

¹³ Zot parey bann vag feros lamer, so lekim pe kras zot bann aksion laont. Zot parey bann zetwal ki Bondie finn rezerv enn plas pou touzour dan lanwit.

¹⁴ Enok, setiem desandan Adam ti profetize, li ti dir: “Gete, Lesegner pe vini avek dis mil anz,

¹⁵ pou exekit zizman lor tou dimounn, pou kondann zot pou zot move aksion ek bann zafer terib ki bann peser finn dir kont li.”

¹⁶ Sa bann dimounn-la, zot touletan plengne, zot pa kontan zot sor; zot swiv zot prop dezir; zot dir bann parol ranpli ar lorgey e zot flat dimounn par intere.

Avertisman ek rekomandasion

¹⁷ Me zot, mo bann kamarad, rapel bien predikasion bann zapot Zezi Kris nou Segner.

¹⁸ Bann-la finn dir zot: “Dan bann dernie letan, pou ena bann dimounn ki pou mok zot e pou swiv zot move dezir”

¹⁹ Samem bann dimounn ki fer divizion. Zot swiv zot linstin natirel, zot pena Lespri Sin.

²⁰ Me zot, mo bann kamarad, zot bizin kontigne ed zot kamarad pou konstrir lor mesaz ki Bondie finn donn zot. Zot bizin priye avek led Lespri Sin;

²¹ gard zot touzour dan lamour Bondie; atann nou Segner Zezi Kris ki pou donn zot lavi eternel.

²² Pran pitie pou bann ki ezite.

²³ Sov zot, tir zot dan dife; pitie lezot me fer atansion, evit tou kontak avek mem zot linz tase par zot move dezir.

²⁴ Pou Sa Enn ki anpes zot tonbe e fer zot tenir san okenn fot dan prezans so laglwar avek rezwisans,

²⁵ pou sel Bondie ek Sover, atraver Zezi Kris nou Segner, laglwar, mazeste, pwisans ek lotorite aster-la e pou touzour. Amen.