Romans 12 - Sa Ugud Apudyus

Sa Ustu We Antatagun Da Namati

¹ Pun susunud ḵan Kristu, ḵodawoḵ ḵan diḵayu we gapu'tte ḵadagun Apudyus idatunyu da long-agyu ḵan siya'ḵ matattagu we datun ya mitotoḵḵon ḵan Apudyus ya mas-omana. Sana ustu we inonyu we andayaw ḵan siya.

² Adiyu unudon da ugalin da tagu we adipun namati yaḵon iyunudyu we baliwan Apudyus da somsomoḵyu ta pabaruwona. Te nu ḵoonyu ḵaḵna, igammuwonyu nu ngai pinion Apudyus, ngai ambaḻu, ngai mas-omana ya naippun angkurangana.

³ Sinsadi, gapu ta innatod Apudyus ḵaḻabbongaḵe an-apostol gapu'tte ḵinabaḻuna, bagbagaaḵ sin-ossaossa ḵan diḵayu ta adiyu somsomḵone nangatu long-agyu yaḵon ḵasapuḻane usigon ni sin-ossaossa long-agna mibatay si pammatinae innatod Apudyus.

⁴ Ipaniḵ ditaḵu si long-ag ni tagu. Te sa ossaane long-ag, adu ḵamangayna ya nansabasabali ḵausaranda.

⁵ Isuna bos ditaḵu we namati, taḵon ay nu adu taḵu, mipani taḵu si ossaane long-ag Kristu ḵad nan-os-ossaan taḵu.

⁶ Da ḵabooḻane innatod Apudyus nansabasabali ye mibatay si ḵinabaḻu we innatodna ḵan ditaḵu. Pun da naittan aḵ ḵabooḻane angibaga'tta paibagan Apudyus usaronda oḵyane mibatay si pammatida.

⁷ Ḵad da naittan aḵ ḵabooḻane anserbi'tta udum, anserbida oḵyan. Ḵad da naittan aḵ ḵabooḻane angituttudu si ḵatuttuwaan, antuttududa oḵyan.

⁸ Da innattan Apudyus aḵ ḵabooḻane ansoḻgag aḵ pumigsaan da pammatin da udum, ansoḻgagda oḵyan. Ḵad da innattan Apudyus aḵ ḵabooḻane angitod, angitodda oḵyane naḻpu'tta pusuda. Ḵad da naittan aḵ ḵabooḻane angipangpangu, ipapuutda oḵyane angwa. Ḵad da naittan aḵ ḵabooḻane ḵumadagu'tta ampaḵaḻam, allaylayadda oḵyane angwa.

⁹ Tuttuwa oḵyan ayatyu'tta buḻunyu we namati. Ḵad ḵasapuḻane sasangngaanyu oḵyan da ngaimane lawweng ta siya pagapagatupanyu unudon da ngaimane ambaḻu.

¹⁰ An-asiayat ḵayu we isun ni an-aayat da mismu we ansusunud. Ḵad ibelangyu da bubuḻunyu'ḵ napatpatog nu diḵayu.

¹¹ Adi ḵayu andadauy yaḵon pumangog ḵayu we anserbi ḵan Apu Jesu Kristu.

¹² Gangganasonyu namnamayu, anuanusanyu da ampaḵaḻamanyu ya ipapatiyu we alluwaḻu.

¹³ Ḵad badanganyu da tagun Apudyus we anḵasapuḻ ya mangiliyonyu dida.

¹⁴ Nu awad amaḵaḻam ḵan diḵayu, adiyu aḻawagan dida yaḵon iluwaḻuwanyu ta bindisyunan Apudyus dida.

¹⁵ Maḵalaylayad ḵayu'tta allaylayad ya maḵadomdom ḵayu'tta andomdom.

¹⁶ Ḵasapuḻane antitimpuyug ḵayu ya adi ḵayu ampasindayaw yaḵon maḵabuḻbuḻun ḵayu'tta ḵapus. Ḵad adiyu isḵaḻe igammuyu da losan.

¹⁷ Nu awad angwa'ḵ lawweng ḵan diḵayu, adiyu subalitan aḵ lawweng. Yaḵon siya oḵyan ḵuttuḵuttumonyu ḵoon da ḵabaḻuwan si antotollong da losane tagu.

¹⁸ Igga taḵu ḵabooḻan taḵu ta allin-awa ambubuḻunan taḵu'tta losane tagu.

¹⁹ Susunudḵu we ay-ayatoḵ, nu awad angwa'ḵ lawweng ḵan diḵayu, adi ḵayu bumaḻos yaḵon itaḻgodyu ḵan Apudyus ta siya asi ḵigade angibaḻos. Te ḵanan ni nigili ye Ugud Apudyus, “Saḵone Apudyus ḵambiyang si baḻos te dusaoḵ da maḵabasuḻ.”

²⁰ Yaḵon unudonyu nigili ye Ugud Apudyus we ḵanana, “Nu nauḻat ḵabusuḻyu, paḵananyu ḵad nu nauwaw, ittanyu'ḵ inumona. Te nu ḵatti ḵoonyu, mabainan si ḵingwana.”

²¹ Ḵad adi ḵayu paḵḵog atte lawweng yaḵon oḻgonyu lawweng si angwaanyu'tta ambaḻu.