Revelation 2 - Sa Ugud Apudyus

Sa Suḻat Atte Gimung Da Namati'd Ephesus

¹ Ḵanana, “Annaya isuḻatnu'tte anghel we angayyuwan atta namati ye magimugimung ad Ephesus, ‘Saḵon aangdon atta pitu we bituwon atte madawinane imaḵ ya anadtaddaḻan si gawan da pitu we buḻawane sasap-aḻan da silaw. Annaya ibagaḵ ḵan diḵayu.

² Igammuḵ da losane ḵooḵoonyu, sa ansigabe ḵewaaḻyu ya ḵinaanusyu we angiyattom atta ampaḵaḻaman. Igammuḵe adiyupun maanusan da lawwenge tagu. Ḵad pinadasyu da ngannonda da long-agda apostol taḵon ay nu daḵandapun woḵ inigammuyu we tuliyanda.

³ Igammuḵ ḵinaanusyu we angiyattom atta ampaḵaḻamanyu gapu ḵan saḵon ya adiḵayupun maayong.

⁴ “ ‘Yaḵon awad de adiḵpun pion ḵan diḵayu, adiyupun ogon saḵon ay-ayaton ya da buḻunyu we isun ni damu.

⁵ Pun ḵasapuḻan oḵyane iḵagasmoḵyu ampigsae ayatyu si damu. Ambabawi ḵayu'tta basuḻyu ya agayyu we angwa ya ḵoonyu ḵasin da ḵingwayu si damu. Te nu adi ḵayu ambabawi, umaliyaḵ sinat ta ḵaanoḵ sasap-aḻan da silawyu'tta ustu we igawda.

⁶ Yaḵon awad de maḻyadaḵ si mipanggob ḵan diḵayu, sasangngaanyu ḵoon da angunud atte tuttudun Nicolaus we sa sasangngaaḵ os.

⁷ “ ‘Diḵayu we naingaan, andongoḻ ḵayu si ibagan ni Ispiritu Santu atta gimung da namati. Da tagu we angngog atta losane kalasin di lawweng, ittoḵ ḵan dida ḵaḻabbongane angan atte bungan ni ḵayu we angitod si biyage awad si igaw Apudyus ad langit.’ ”

Sa Suḻat Atte Gimung Da Namati'd Smyrna

⁸ Ḵanana bos, “Annaya isuḻatnu'tte anghel we angayyuwan atta namati ye magimugimung ad Smyrna, ‘Saḵon ummuna ḵan anguddidi. Saḵon os natoy woḵ ummuli. Annaya ibagaḵ ḵan diḵayu.

⁹ Igammuḵe nampaḵaḻam ḵayu ya ḵapus ḵayu yaḵon sa ḵatuttuwaan, baḵnang ḵayu! Igammuḵ ose awad da Judyu we anginsultu ḵan diḵayu yaḵon daḵandapun aḵ tagun Apudyus nu adi dida da tagun Satan.

¹⁰ Adi ḵayu maḵimut atte madam-an umali ye ampaḵaḻaman. Impaibaḻud Satan da udum ḵan diḵayu ta mapadas ḵayu ḵad ampaḵaḻamon diḵayu'ḵ simpuḻu we aḻgaw. Yaḵon mataḻgodan ḵayu oḵyane ipapuutyu we amati ḵan saḵon taḵon ay nu siya gapun ni matoyanyu ta ittoḵ ḵan diḵayu koronae siya biyag aḵ inggana.

¹¹ “ ‘Diḵayu we naingaan, andongoḻ ḵayu si ibagan ni Ispiritu Santu atta gimung da namati. Da tagu we angngog si lawweng, adidapun midoga'tte dusa'ḵ inggana'tte ḵumagwae matoyan da tagu.’ ”

Sa Suḻat Atte Gimung Da Namati'd Pergamum

¹² Ḵanana bos, “Annaya isuḻatnu'tte anghel we angayyuwan atta namati ye magimugimung ad Pergamum, ‘Saḵon aangdon si antadome ispadae nansupang ngaḻabna. Annaya ibagaḵ ḵan diḵayu.

¹³ Igammuḵe sa iliyu, siya ampangatan Satan yaḵon taḵon ay nu ḵatti, adiyupun nan-awidan pammatiyu ḵan saḵon. Igammuḵ os naḵwa ḵan Antipas we mataḻgodane nangitaḵdoḻ si mipanggob ḵan saḵon. Taḵon ay nu gingngatda sinat atte ili ye ampangatan Satan, sissiyae pinagapagatupanyu we amati ḵan saḵon.

¹⁴ “ ‘Yaḵon awad de adiḵpun pion ḵan diḵayu, awad da udum ḵan diḵayu we angunud si intuttudun Balaam atte awe. Aḵ Balaam ḵad intuttuduna ḵan Balak inonae anulisug atta ganaḵ Israel aḵ bumasuḻ ta awisonda dida'ḵ maḵaḵan atta nidatun atta sinan-apudyus ya angadaḻug atta daḵampun aḵ asawada.

¹⁵ Awad os ḵan diḵayu da angunud si tuttudun Nicolaus.

¹⁶ Pun ambabawi ḵayu'tta basuḻyu ya agayyu we angwa te nu adi ḵayu ambabawi, madanatongaḵ ḵan diḵayu ya usaroḵ ispadae maḻpu'tte sungadḵu we maḵagubat ḵan diḵayu.

¹⁷ “ ‘Diḵayu we naingaan, andongoḻ ḵayu si ibagan ni Ispiritu Santu atta gimung da namati. Da tagu we angngog si lawweng, ittaḵ dida si nitataḻu we maḵane ngannonda manna. Ittaḵ os sin-ossa ḵan dida'tte itaḵe batu we sa nigiliyan ni baru we ngadane naippun osa'ḵ angigammu si sadi ye ngadan nu adi sa tagu we maittana.’ ”

Sa Suḻat Atte Gimung Da Namati'd Thyatira

¹⁸ Ḵanana bos, “Annaya isuḻatnu'tte anghel we angayyuwan atta namati ye magimugimung ad Thyatira, ‘Saḵon Abeng Apudyus we isunan gumilgillayabe apuy atana ya isunan sumelape gambang da suḵina. Annaya ibagaḵ ḵan diḵayu.

¹⁹ Igammuḵ da ḵooḵoonyu, sa ayatyu ḵan pammatiyu ya sa anserbiyanyu ya sa angiyattomanyu'tta ampaḵaḻamanyu. Igammuḵ ose amo nabaḻbaḻu da ḵoonyu sinsana nu sa damu.

²⁰ “ ‘Yaḵon awad de adiḵpun pion ḵan diḵayu, iyyunudyu we midoga sanae bubai ye aḵ Jezebel ḵan diḵayu. Ḵananae siya profeta we angituttudu'tta imbagan Apudyus yaḵon gapu si tuttuduna, awisona da anserbi ḵan saḵon ta adaḻugonda da daḵampun aḵ asawada ḵan anganda'tta maḵane nidatun atta sinan-apudyus.

²¹ Innatodḵu ḵan siya wayanae ambabawi'tta basuḻna ya agaynae angwa yaḵon adinapun agaye miyadaḻug atte daḵampun aḵ asawana.

²² Pun ittoḵ ḵan siya ummamdane saḵit ta uumbog si ḵamanae adipun maḵabangon. Ḵad ittoḵ os umamdane ampaḵaḻaman atta naḵadagdagas ḵan siya nu adida ibabawi da basuḻda ya adida agaye angwa si nidog-anda'tta ḵaissawe ḵingwana.

²³ Gongatoḵ os da angunud ḵan siya. Ḵad siya angigammuwan da losane gimung da namati ḵan saḵone tuttuwae angigammu'tte awad atta somsomoḵ ḵan pusun da tagu. Ḵad gungunaaḵ sin-ossaossa ḵan diḵayu sigun atta ḵingwayu.

²⁴ “ ‘Yaḵon diḵayu we udum ad Thyatira, adiḵayupun nampaidaḻan si annae lawwenge tuttuduna ya naippun inadaḻyu si ḵanandae naadaḻome tuttudun Satan. Pun adiḵpun ogon dog-an biline unudonyu.

²⁵ Sa abuse ibagaḵ ḵan diḵayu, ipapatiyu unudon tuttuwae tuttudu inggana'ḵ umaliyaḵ.

²⁶ Da tagu we angngog atte lawweng ya pagapagatupandae angwa'tta pinioḵ aḵ inggana si anungus ni biyagda, ittoḵ ḵan dida ḵaḻabbongane midoga ḵan saḵone ampangat atta ḵinailin di ili

²⁷ ye isun ni ḵaḻabbongane innatod Amaḵ ḵan saḵon. Ḵad naippun osa'ḵ ḵallabbong angngog ḵan dida yaḵon amo dallu we oḻgonda da adipun amigbig si ḵaḻabbongandae isuna angabuḵan ni ḵagae bastun atte banga.

²⁸ Ittoḵ os ḵan dida'ḵ ambigatton.

²⁹ “ ‘Diḵayu we naingaan, andongoḻ ḵayu si ibagan ni Ispiritu Santu atta gimung da namati.’ ”