Matthew 9 - Sa Ugud Apudyus

Sa Naparalaese Laḻaḵi

¹ Pune sadi, nambangka da Jesus woḵ dummoḻmangda nipauli'tte ilina.

² Pun indatongda ḵan siya naparalaese binuliganda. Innilan ḵad ay Jesus pammatida, ḵanana'tte naparalaes, “Sunud, papigsaom somsomoḵnu, napakawan da basuḻnu.”

³ Nangwa ḵad da udume mimistulun ni lintog, ḵananda'tta somsomoḵda, “Ngaipana ugudon ḵaḵnat? Itaḻayagna long-agnae miyisu ḵan Apudyus!”

⁴ Yaḵon aḵ Jesus ḵad, inigammuna somsomoḵda woḵ ḵanana, “Ngaipayu somsomḵon lawweng?

⁵ Ngai ḵad ain naḻaslasu we ibagaḵ ḵan siya, ‘Napakawan da basuḻnu,’ baḵon nu ‘Tumaḵdogḵa ya anaddaḻanḵa’?

⁶ Yaḵon ipailaḵ ḵan diḵayu ta igammuwonyu we saḵone Abeng Di Tagu, anna ḵaḻabbongaḵ sina'd lutae amakawan atta basuḻ da tagu.” Ḵanana'tte naparalaes, “Bumangonḵa, aḻam bulignu ta inḵan si boḻoyyu.”

⁷ Pun daguse bummangon woḵ ummoyon.

⁸ Innilan ḵad da losane tagu we ḵinaan Jesus saḵitna, naḵimtanda woḵ indaydayawda'ḵ Apudyus we nangitod si ḵaḻabbongane isun ni sanat atte tagu.

Sa Nangayagan Jesus Ḵan Matthew

⁹ Unipun atte ummoyon aḵ Jesus, innilana osae andadagup atta bugise nangngadan aḵ Matthew we tutuḵdu'tte opisinan da andadagup atta bugis. Ḵanana ḵan siya, “Tun-udonaḵ ta ambalinoḵ siḵa'ḵ disipuluḵ.” Lummibbat ay aḵ Matthew woḵ nitun-ud ḵan siya.

¹⁰ Nanḵaḵaḵan ḵad da Jesus ya da disipuluna'ḵ ḵuwan da Matthew, naḵaḵan ḵan dida da adu we andadagup atta bugis ya da udume ḵabasbassuḻan.

¹¹ Innilan ḵad da Pharisee dida, ḵananda'tta disipulun Jesus, “Ngaipa mistuluyu maḵaḵan atta andadagup atta bugis ya da udume ḵabasbassuḻan?”

¹² Yaḵon dingngoḻ ḵad ay Jesus da inimusda, ḵananae nangipani, “Da anḵosdoḻ, adidapun ḵasapuḻan an-aagas. Yaḵon da masaḵit, ḵasapuḻanda.

¹³ Te adiyaḵpun ummali ta ayagaḵ da naun-unane tagu yaḵon ummaliyaḵ ta ayagaḵ da ḵabasbassuḻan ta ambabawida'tta basuḻda ta ansinagungda ḵan Apudyus. Pun inḵayu adaḻon nigili ye Ugud Apudyus we ḵanana, ‘Ḵan saḵon, napatpatog ḵumadagu ḵayu'tta asintataguyu nu sa angidatun ḵayu'ḵ ayam ya da udume datun ḵan saḵon.’ ”

Sa Mipanggob Atte Allaun

¹⁴ Pune sadi, ummoy da disipulun John we Ambobonyag ḵan Jesus woḵ ḵananda, “Diḵani ya da Pharisee, allaun ḵani ta alluwaḻu ḵani. Yaḵon da disipulum ḵad, ngaipada adi ḵoon?”

¹⁵ Impanin Jesus we summongbat woḵ ḵanana, “Andadauy ḵamman da buḻbuḻun ni angasawae laḻaḵi nu awad ḵan dida? Yaḵon sa umali ye aḻgaw nu miyadayu nangasawae laḻaḵi ḵan dida, sadi timpu we allaunda.”

¹⁶ “Naippun tagu'ḵ ituḵupna baru we lupute adipun yan misaḵsaḵ si dadaane silup te nu mituḵup si dadaane luput ya isaḵsaḵnu, ḵumson baru we mituḵup ya yatyatona dadaane luput ḵad amo dumaḵoḻ pissayna.

¹⁷ Naippun os tagu'ḵ ibilungna inabuyu'tte dadaane geddange bibillungan. Te nu ḵoona ḵaḵna, bumtaḵ sadi ye geddange bibillungan ḵad umabuyang bayas ya madadail geddange bibillungan. Yaḵon ḵasapuḻane ibilung oḵyan inabuyu si baru we geddange bibillungan ta an-isu we dumadaanda.”

Sa Bubai Ya Sa Abeng Jairus

¹⁸ Sissiya ḵad aḵ Jesus we maḵaug-uggud atta disipulun John, dummatong pangat da Judyu. Nanalluḵu si sinagung Jesus woḵ ḵanana, “Awad de bubai ye abengḵu we ḵaḵḵatoy yaḵon awwaynu ḵappos ta inḵa iyappad imam ḵan siya ta umuli.”

¹⁹ Pun nibuḻun aḵ Jesus ya da disipuluna ḵan siya.

²⁰ Ummoyon ḵad da Jesus, inninggaw bubai ye dumaḻadaḻa'tte nasawaḻan aḵ duwae tawone nitun-ud ḵan Jesus woḵ tokkona gayadan ni silupna.

²¹ Te ḵanana'tte somsomoḵna, “Taḵon ay nu abuse tokkoḵ silupna, lumin-awaaḵ.”

²² Nantawili ḵad aḵ Jesus, innilana bubai woḵ ḵanana, “Abengḵu, papigsaom somsomoḵnu. Gapu'tte pammatim ḵan saḵon, bummaḻuḵa.” Pune sadi, daguse bummaḻu.

²³ Dummatongda ḵad atte boḻoy ni pangat, innilan Jesus da bumabaladong atta bagungon ya da sinḵaḵassi ye tagu,

²⁴ ḵanana, “Inḵayun te sa annate babaḻasang daḵampun aḵ natoy yaḵon nasuyop.” Pun inem-emesda'ḵ Jesus.

²⁵ Yaḵon pinaḻawan ḵad Jesus dida, nillumnoḵ atte kuwartun ni abeng woḵ innonnana imana, pun nabanangon.

²⁶ Ḵatti ḵad naḵwa, niyasaḵ ugud atte mipanggob si ḵingwan Jesus atta nampaliḵwose ili.

Da Duwae Naḵuḻap

²⁷ Nallibbat ḵad da Jesus, tinun-ud da duwae naḵuḻap si anadtaddaḻananda woḵ ḵanandae napapḵaaw, “Siḵae ganaḵ Ari David, ḵadaguwam ḵappos diḵani!”

²⁸ Pinagatupan Jesus we nanaddaḻan inggana'ḵ dummatong si boḻoye ayana woḵ nillumnoḵ. Naḵaḻnoḵ os da duwae naḵuḻap. Pun ḵanana ḵan dida, “Patiyonyu ḵad aine lamogḵu ḵaanon da ḵuḻapyu?” Ḵananda, “On, Apu, patiyonni.”

²⁹ Pun iyyappad Jesus imana'tta atada woḵ ḵanana, “Gapu'tte pammatiyu, maḵwa ḵan diḵayu.”

³⁰ Pun daguse naḵaan da ḵuḻapda. Unipun binilibilin Jesus dida woḵ ḵanana, “Adiyu ibaga'tta ngaiman sadi ye ḵingwaḵ.”

³¹ Yaḵon ummoyonda woḵ taḵon ay nu imbagana ḵatti, niyasaḵ ugud atte mipanggob ḵan siya'tta losane nampaliḵwose ili.

Sa Naumoḻe Naaḻanan

³² Ummoyon ḵad da sadi ye naḵuḻap, indatong os da udum ḵan Jesus naumoḻe naaḻanan.

³³ Pinaḻyaw ḵad Jesus aḻan, insaḻad ni naumoḻe gumminga. Pun sintataag da adu we tagu woḵ ḵananda, “Ippun paat naila'ḵ naḵwa'd Israel aḵ isun ni sana si awe inggana sinsadi!”

³⁴ Yaḵon ḵanan da Pharisee, “Sa pangat da aḻan nangitod atte ḵabooḻanae amaḻyaw atta aḻan.”

Sa Nanggaḵayan Jesus Atta Ili

³⁵ Ginaḵagaḵay Jesus da losane siyudad ḵan losane ili. Nantuttudu'tta sinagogada ya iwwaḻagawagna Ambaḻu we Damag mipanggob si ampangatan Apudyus ḵan ḵinaanna bos da losane kalasin di saḵit ya da ampaḵaḻaman da tagu.

³⁶ Innilan ḵad Jesus da amode tagu, ḵinadaguwana dida te ampaḵaḻamda ya naippun ampabadangandae isudan karnero we ippun anangḵon ḵan dida.

³⁷ Pun ḵanana'tta disipulunae nangipani, “Aduadu maani yaḵon aḵit da an-ani.

³⁸ Pun iluwaḻuyu ḵan Apudyus we sinḵuwa'tta maani ta angibuun aḵ aduadu'ḵ umoy an-ani.”