Matthew 27 - Sa Ugud Apudyus

Sa Nipuḻangan Jesus Ḵan Pilate

¹ Bigbigat ḵad, nan-uugudan da papangat da papadi ya da pallakayon da Judyu nu ngai inondae ampagongat ḵan Jesus.

² Pun binaḻudda woḵ inniyoyda ḵan Gobernor Pilate.

Sa Natoyan Judas

³ Aḵ Judas we nangituyuḵ ḵan Jesus, inigammuna ḵade naḵoddongan aḵ Jesus we matoy, nandadauli'tte ḵingwana. Pun ummoyna impauli pilaḵ atta papangat da papadi ya da pallakayon da Judyu.

⁴ Ḵanana, “Naḵabasuḻaḵ te intuyuḵḵu tagu we ippun basuḻna!” Pun ḵanandae summongbat, “Ngai ḵad ain biyangni si sanat? Te biyangnu pos pagay!”

⁵ Pune sadi, impitlaḵ Judas pilaḵ ad daḻom si templo, pun ummoyon woḵ ummoy namposoḻ.

⁶ Yaḵon innaḻan da papangat da papadi sadi ye pilaḵ woḵ ḵananda, “Adimpun ni lintog taḵu iyunude idoga taḵu annae pilaḵ atte pilaḵ ni templo te nibayad si biyag ni tagu.”

⁷ Nan-uugudanda nu ngai ḵoonda'tte pilaḵ. Pun nan-uunudandae sadi inginada'tte lutan ni andidiwin aḵ banga ta usaronda'ḵ lilibbonan da ḵaḵḵaili.

⁸ Pun sa lutae sadi, inggana sinsadi nangadanan aḵ “Lutae Nadimoḵ.”

⁹ Ḵad sadi nituttuwaan ni imbagan Profeta Jeremiah atte awe ye ḵanana, “Innaḻada tuḻumpuḻu we pilaḵ, sa belange nan-uugudan da ganaḵ Israel aḵ ambayadda si biyagna.

¹⁰ Pune sadi ingnginada'tte lutan ni andidiwin aḵ banga, te siya imbilin Apu ḵan saḵon.”

Sa Nanumaḻyaan Pilate Ḵan Jesus

¹¹ Aḵ Jesus ḵad, summiḵad atte sinagung Gobernor Pilate woḵ ḵanan gobernor we nan-imus ḵan siya, “Siḵa ḵamman Arin da Judyu?” Ḵanan Jesus we summongbat, “Siya imbagam.”

¹² Yaḵon taḵon ay nu pabasuḻon da papangat da papadi ya da pallakayon da Judyu, adipun paat summongbat aḵ Jesus.

¹³ Pun ḵanan os Pilate ḵan siya, “Naippun ḵamman dongngom atta losane banage ipabasuḻda ḵan siḵa?”

¹⁴ Yaḵon adipun aḵ Jesus summongbat, taḵon ay ossaan atta ipabasuḻda ḵan siya. Pun amo nataag aḵ gobernor.

Sa Naḵoddongan Jesus Aḵ Matoy

¹⁵ Sa ugalin Pilate atte Gayagayae ngannonda Nallausan, puḵayana osa'tta baḻude sa ḵodawon da adu we tagu.

¹⁶ Sa sadi ye timpu, inninggaw osae baḻude nandinongoḻ ḵinaḻawengnae nangngadan aḵ Jesus Barabbas.

¹⁷ Nandatdatong ḵad da tagu, ḵanan Pilate ḵan dida, “Ngai pionyu we puḵayaḵ? Aḵ Jesus Barabbas baḵon nu aḵ Jesus we awaganda'ḵ Kristu?”

¹⁸ Inimusna anna te inigammunae impuḻangda'ḵ Jesus ḵan siya gapu'tte aposda.

¹⁹ Sissiya ḵade tutuḵdu'ḵ Pilate si tutuḵduwan ni ḵuwis, nambuun aḵ asawana'ḵ umoy angibaga ḵan siya ḵanane, “Adim dusaon sanate naun-unane tagu. Te sa labi, inin-inopḵu mipanggob ḵan siya ya nampaḵaḻamonaḵ gapu ḵan siya.”

²⁰ Pune sadi inawis da papangat da papadi ya da pallakayon da Judyu da tagu ta ḵodawonda ḵan Pilate ta puḵayana'ḵ Barabbas ya impagongatna'ḵ Jesus.

²¹ Pun ḵanan Gobernor Pilate ḵasine nan-imus atta tagu, “Ngai'tta annae duwa pionyu we puḵayaḵ?” Ḵananda, “Aḵ Barabbas.”

²² Inimus Gobernor Pilate ḵan dida ḵanane, “Ḵad ngai ḵooḵ ḵan Jesus we awaganda'ḵ Kristu?” Losanda ḵanan, “Paipattoḻnu'tte kros!”

²³ Ḵanan Gobernor Pilate, “Ngaipa? Ngai ḵad ain ḵingwana?” Yaḵon amo ḵanandae nanugtug-uy, “Paipattoḻnu'tte kros!”

²⁴ Innilan ḵad Gobernor Pilate we ippun lamogna ḵoon yaḵon isaḻaddae magulu, nangaḻa'tte danum woḵ nambuḻuna'tta imana si sinagung da tagu. Ḵanana, “Ippun biyangḵu si magongatan ni annae tagu, ḵigadyu pagay.”

²⁵ Losan da tagu ḵanane summongbat, “Ḵigadni ya da abengni ye asi sumongbat si matoyan ni annae tagu!”

²⁶ Pune sadi, pinuḵayan Gobernor Pilate aḵ Barabbas woḵ impaap-aplitna'ḵ Jesus, pun impuḻangna'tta suḻdadu ta umoyda ipattoḻ atte kros.

Sa Nangang-angyagan Da Suḻdadu Ḵan Jesus

²⁷ Naabus ḵad, innaḻan da suḻdadu'ḵ Jesus woḵ illonoḵda'tte boḻoy Gobernor Pilate, pun inaligummun da losane suḻdadu'ḵ Jesus.

²⁸ Ḵinaanda silupna woḵ sinilupanda si dilaage langgoyode isun ni silup ni ari.

²⁹ Pummaliḵugda'tte naḻasiyane waḵaḻ woḵ imbaḻangatda ḵan siya woḵ paodonda pauḻ si dawinane imana. Naabus ḵad, nanalluḵuda si sinagungna woḵ ḵanandae nangang-angyag, “Matataguḵae Arin da Judyu!”

³⁰ Tinuppatuppaanda ya innaḻada pauḻe oonnana woḵ iyyaplitda si uḻuna.

³¹ Inabusda ḵad inang-angyag, ḵinaanda dilaage langgoyode insilupda woḵ iggada ḵuwana pagaye silup. Pun innaḻada ta umoyda ipattoḻ atte kros.

Sa Nipattoḻan Jesus Atte Kros

³² Inninggawda ḵad atte daḻane naḻpu'tte siyudad, inabotda tagu we nangngadan aḵ Simon we iCyrene. Pun impatut da suḻdadu impabuḵud ḵan siya de kros Jesus.

³³ Dummatongda ḵad atte lugar we ngannonda Golgotha, sa piona ḵanan “Lugar ni Battuḵag.”

³⁴ Innattanda'ḵ Jesus si bayase naḵamsan atte apku ta inumona. Yaḵon sinimsimana ḵad, adinapun ogon pion inumon.

³⁵ Pune sadi, impattoḻda'tte kros. Pun nambubbunutda woḵ nambisbisaḵanda silupna.

³⁶ Naabus ḵad, tummuḵdudae anguwaḻda ḵan Jesus.

³⁷ Sa ngatun ni uḻuna, nigili impabasuḻda ḵan siyae ḵanana, “Annaya'ḵ Jesus we Arin da Judyu.”

³⁸ Pun inninggaw os da duwae tulisane impattoḻda dida'tta krosda, sa osa'tte madawinanna ya sa osa'tte madawigina.

³⁹ Ḵad da tagu we lummaus, siwwiwigiwigdae nangang-angyag ḵan Jesus,

⁴⁰ ḵananda, “Siḵa nangibagae dadailom templo ya taḵadom si unog di tuḻun aḻgaw, taguwom long-agnu! Ḵad nu tuttuwae siḵa Abeng Apudyus, dumoḻaḵa oḵyan si sanate kros!”

⁴¹ Pun da papangat ḵad da papadi ya da mimistulun ni lintog ya da pallakayon da Judyu, ḵanandae nangang-angyag,

⁴² “Tinaguna da udume tagu yaḵon adinapun lamog taguwon long-agna. Siya Arin da ganaḵ Israel, dumoḻa ud oḵyan sinsadi si sanate kros ta amati ḵani ḵan siya.

⁴³ Antaḻgod ḵan Apudyus woḵ ḵanana, ‘Saḵon Abeng Apudyus.’ Pun ilan taḵu nu iligsin Apudyus sinsadi.”

⁴⁴ Taḵon ay da tulisane nipattoḻ si daḻnig Jesus, isuna bose ininsultuda'ḵ Jesus.

Sa Natoyan Jesus

⁴⁵ Anna ḵade mumamatuḵ, gummiḵbot losane ili inggana'ḵ ummag-agaw.

⁴⁶ Pun ummag-agaw ḵad, ḵanan Jesus we nampoḵaw, “Eli, Eli, lema sabachthani?” Sa piona ḵanan, “Apudyusḵu, Apudyusḵu, ngaipam saḵon an-awidan?”

⁴⁷ Dingngoḻ ḵad da udume summisiḵad sidi, ḵananda, “Andi ye ayagana'ḵ Profeta Elijah.”

⁴⁸ Inninggaw osae daguse nanoddaḵ woḵ nangaḻa si isun di ḵapose napnu si ḵilom. Impaḵawna'tte pauḻ woḵ idawdawna'tte sungad Jesus ta susupona.

⁴⁹ Yaḵon ḵanan da udum, “Uwayon taḵu ta ilan taḵu ud nu umoy Profeta Elijah taguwon.”

⁵⁰ Napapḵaaw ḵad ḵasin aḵ Jesus, naḵaan angosna.

⁵¹ Pun baag-en nanḵagwa napissay kortinan ni templo, nisaḻad ad ngatu inggana'd doḻa. Ḵad nallunig lubung woḵ nandoswaḵ da balintuugan.

⁵² Da libon os nabuḵtanda. Pun ummuli da nanḵaḵatoy we tagun Apudyus.

⁵³ Tummoḵwaḻda ḵad atta libonda'tte ummuliyan Jesus, ummoyda losan ad Jerusalem we siyudad Apudyus. Pun nampailada'tta adu we tagu.

⁵⁴ Giniḵnan ḵad ni ḵapitan ya da suḻdadu we nanguguwaḻda ḵan Jesus lunig ya innilada da losane naḵwa, naḵimtanda woḵ ḵananda, “Tuttuwae Abeng Apudyus anna!”

⁵⁵ Inninggaw os da adu we bubai ye nan-oottap. Dida da nibuḻun ḵan Jesus we naḻpu'tte probinsiya'd Galilee ye nanserserbi ḵan siya.

⁵⁶ Da sana ḵad da Mary Magdalene, sa asawan Zebedee ya aḵ Mary ye inan da James ḵan Joseph.

Sa Nilibonan Jesus

⁵⁷ Masdom ḵad, dummatong osae baḵnange iyArimathea we nangngadan aḵ Joseph. Siya osae disipulun os Jesus.

⁵⁸ Ummoy ḵan Gobernor Pilate woḵ ḵodawona ladag Jesus. Pun iyyunud Gobernor Pilate woḵ imbilinna'tta suḻdadunae maatod ladag Jesus ḵan Joseph.

⁵⁹ Pun innaḻan Joseph ladag Jesus woḵ binadabadana'tte ampoḻḵase itaḵe sinnun.

⁶⁰ Naabus ḵad, ummoyna illibon si mismu we libonnae ḵaḵḵopyae liyange natiḵitiḵane batu. Niligadna daḵoḻe batu ta maomban lewangan ni libon woḵ ummoyon.

⁶¹ Inninggaw sidi da Mary Magdalene ya sa osae Mary ye tummutuḵdu si sangun ni libon.

Sa Naguwaḻdaan Ni Libon Jesus

⁶² Ḵasin ḵade bigbigat si nagangput ansaganaan da Judyu para'tte umillongane sa mabigat, ummoy da papangat da papadi ya da Pharisee ḵan Gobernor Pilate.

⁶³ Ḵananda ḵan Gobernor Pilate, “Apu, inḵagasmoḵni ye sa sissiyae matattaguwan ni sanate tuliyan, ḵanana, ‘Umuli nu maḻaḵpus tuḻun aḻgaw.’

⁶⁴ Pun ambaḻu oḵyan nu paguwaḻdam libonna'tta suḻdadu inggana si miḵaḵlu we aḻgaw, umoy ḵappay da disipuluna aḵawon ladagna ya ibagadae ummuli ye natoy. Ḵad amo maḵaallelaw anungus ni maḵwa nu sa ummuna.”

⁶⁵ Ḵanan Gobernor Pilate ḵan dida, “Maḵwa, aḻanyu da udume suḻdadu ya ummoy ḵayu. Iggayu ḵabooḻanyu we anguwaḻdae ustu.”

⁶⁶ Pun ummoyda si libon woḵ sinyalanda onobna ta angimatunanda nu mabuḵtan. Naabus ḵad, tinenanda da suḻdadu we angguwaḻda.