Matthew 18 - Sa Ugud Apudyus

Sa Ḵangatuwan

¹ Sa sadi ye timpu, ummoy da disipulu ḵan Jesus woḵ ḵananda, “Ngai ḵangatuwan si ampangatan Apudyus?”

² Pun inayagan Jesus abeng woḵ pinasiḵadna si gaggawada

³ woḵ ḵanana, “Ibagaḵ ḵan diḵayu ḵatuttuwaan, nu adi ḵayu ambalbaliwe isun ni annae abeng, adiḵayupun paat midoga si ampangatan Apudyus.

⁴ Te ngaimane ipakumbabana long-agnae isun ni annae abeng, siya ḵangatuwan si ampangatan Apudyus.

⁵ Ḵad ngaimane ammangili'tte nababae tagu we isun ni annae abeng gapu'tte pammatina ḵan saḵon, saḵon minangilina.”

Sa Gapun Ni Maḵabasuḻan

⁶ Pinagatupan Jesus woḵ ḵanana, “Yaḵon ngaimane anulisug ta maḵabasuḻ taḵon ay osa'tta annae ḵamḵamae tagu we amati ḵan saḵon, un-unnoyna nu mitaḵod daḵoḻe binatu we gilingan si bagangna ya maanud atte ḵaadaḻoman ni baybay.

⁷ Ḵaddagu da tagu si annae lubunge ippun adi nansabasabali ye sulisuge maḵabasuḻanda. Gagangaye dumatong sulisug atta namati yaḵon ḵaddagu tagu we gapun da sanae maḵabasuḻan.

⁸ Nu sa imam baḵon nu sa suḵim gapun ni maḵabasuḻam, puttam ya imballum. Te unnoyna paḵing imam ya sa suḵime umoy si biyag aḵ inggana nu sa wadawad duwae imam baḵon nu suḵim ya miballuḵa si gumilgillayabe apuy aḵ inggana.

⁹ Ḵad nu sa atam gapun ni maḵabasuḻam, uḵitom ya imballum. Te unnoyna paḵing atam ya inḵa si biyag aḵ inggana'd langit nu sa wadawad duwae atam ya miballuḵa si gumilgillayabe apuy ad infiernu.”

Sa Nataḻaḵe Karnero

¹⁰ Pinagatupan Jesus woḵ ḵanana, “Ilanyu ta adiyu am-amsewon ngaiman atta sanae amati ḵan saḵon ya ibelang da udum aḵ nababa te da anghel we anguguwaḻda ḵan dida, patilayune awadda ḵan Amaḵ ad langit.

¹¹ Saḵon ḵad ose Abeng Di Tagu, ummaliyaḵ ta iyyaḵ sington da tagu we naḵabasuḻ ya taguwoḵ dida ta adin Apudyus dida dusaon aḵ inggana.”

¹² “Ngai igammuyu we ḵoon ni tagu we singgasut da karnerona ya baag-en nataḻaḵ osa? Aaddi ye tenana da siyampuḻu ya siyame anggaḻagaḻab atte puḻag ya umoyna sington osae nataḻaḵ.

¹³ Ibagaḵ ḵan diḵayu ḵatuttuwaan, amod de layadna si ossaane nataḻaḵe naodasan nu da siyampuḻu ya siyame adipun nataḻaḵ.

¹⁴ Sana bos isun ni ḵoon Ama taḵu'd langite adinapun pione awad ossaan aḵ mataḻaḵ, taḵon ay osa'tta annae abeng.”

Sa Ḵoon Taḵu Atta Naḵabasuḻ

¹⁵ Ḵanan os Jesus, “Nu awad asintatagum aḵ maḵabasuḻ ḵan siḵa, inḵae ossaan ya ummam ipaḵaawat ḵan siya naḵabasuḻana ḵan siḵa. Nu dongngona ibagam, ambaḻu te iḵasinyu ambuḻbuḻun.

¹⁶ Yaḵon nu adinapun dongngon, umayagḵa'ḵ ossaan baḵon nu duwa'ḵ mibuḻun ḵan siḵa'ḵ maḵaugud atte naḵabasuḻ ḵan siḵa ta awad anaḵdoḻ ḵan amanoḵnoḵ atta losane mibaga.

¹⁷ Nu sissiyae adinapun dongngon da ibagada, ipaigammum atta namati ye magimugimung. Ḵad nu adinapun pagay os dongngon ibagan da namati ye magimugimung, ibelangnu'ḵ adinapun igammu'ḵ Apudyus baḵon nu sa osae andadagup atta bugis.”

¹⁸ Ibagaḵ ḵan diḵayu ḵatuttuwaan, ngaimane iyadiyu sina'd luta, iyadin os Apudyus ad langit. Ḵad ngaimane iyunudyu sina'd luta, iyunud os Apudyus ad langit.

¹⁹ “Ibagaḵ os ḵan diḵayu, nu awad antaddayan da duwa ḵan diḵayu sina'd luta mipanggob si ḵodawonyu ḵan Amaḵ ad langit, maatod ḵan diḵayu da ḵodawonyu.

²⁰ Te taḵon ay abuse duwa baḵon nu ad-adu da madagup gapu'tte pammatida ḵan saḵon, annaaḵ ḵan dida.”

Sa Adipun Amakawan Atta Asintataguna

²¹ Aḵ Peter ḵad, ummoy ḵan Jesus woḵ ḵananae nangimus, “Apu, ngai inona ya bumasubasuḻ asintataguḵ, angampigaoḵ pakawanon? Angampitu ḵamman?”

²² Ḵanan Jesus we summongbat, “Naid! Daḵampun aḵ ḵanaḵe abuse angampitu, nu adi pakawanom aḵ angampitumpuḻu ya pitu.

²³ Te sa ampangatan Apudyus mipani'tte osae ari ye simsimmoḵnae ansingir atta utang da sammiluna ḵan siya.

²⁴ Anna ḵade isaḻadnae ansingir, indatongda ḵan siya osae sammilu we nautangan aḵ adu we millione pilaḵ.

²⁵ Naippun ḵad ambayad ni sadi ye sammilu si utangna, imbilin ni ari ye ḵasapuḻane mingina da losane simbaḻyan ya da losane ḵuḵuwada ta ambayadna'tte utangna.

²⁶ Dingngoḻ ḵad ni sammilu, nanalluḵu si sinagung ni ari woḵ ḵananae nandagdagu, ‘Anusam ḵappos saḵone sana. Bayadaḵ aminon utangḵu nu angdasaḵ aḵ ambayadḵu.’

²⁷ Pun ḵinadaguwan ni ari sadi ye sammilu woḵ pinakawanna da losane utangna ya pinuḵayana.

²⁸ “Ummoyon ḵad sadi ye sammilu, inabotna doganae sammilu we nautangan ḵan siya'ḵ singgasute palata. Pun daguse dinoḵmaana woḵ pinsoḻna, ḵanana, ‘Bayadam sinsadi utangnu.’

²⁹ “Ḵanan ni doganae sammilu we nautangan ḵan siyae nanalluḵu ya nandagdagu, ‘Unniyan ḵappos, asiḵ bayadan nu awad ibayadḵu.’

³⁰ Yaḵon adinapun ḵinadaguwan woḵ impaibaḻudna inggana'ḵ bayadana utangna.

³¹ Innilan ḵad da doganae sammilu naḵwa, amod de alimuunda woḵ ummoyda'tte ari impilit.

³² “Pun impaayag ni ari sammilu woḵ ḵanana, ‘Siḵa ḵaḻawengane sammilu! Pinakawanḵu siḵa'tta losane utangnu si ummam nandagdagu ḵan saḵon.

³³ Ḵinadaguwam oḵyan pos dogame sammilu we isun ni nandadaguḵ ḵan siḵa.’

³⁴ Gapu ta amod de sangan ni ari, impaibaḻudna bos sanae sammilu inggana'ḵ bayadana losan da utangna.”

³⁵ Pun ḵanan Jesus we nangiyanungus, “Siya isun ni ḵoon Amaḵ ad langit ḵan diḵayu nu adiyu pakawanone sipupusu da asintataguyu.”