Mark 2 - Sa Ugud Apudyus

Sa Naparalaese Laḻaḵi

¹ Naḻaḵpus ḵad pigae aḻgaw, nipauli'ḵ Jesus ad Capernaum woḵ dingngoḻ ḵad da tagu we dummatong,

² amoamod da nandatdatong inggana'ḵ naippun ogon maigawan taḵon ay sawang. Iwwaḻagawag ḵad Jesus Ugud Apudyus,

³ dummatong da opate nambulig atte naparalaes.

⁴ Yaḵon naippun paat ayondae umadani ḵan Jesus te nansossodet da tagu. Pun insaḵyatda'tte otop woḵ ummabutda'ḵ singgetbang. Nagangput ḵad, inuyudda nabuligan atte gaggawan da tagu'tte sinagung Jesus.

⁵ Innilan ḵad ay Jesus pammatida, ḵanana'tte naparalaes, “Sunud, napakawan da basuḻnu!”

⁶ Nangwa ḵad da atuḵtuḵdu we mimistulun ni lintog, ḵananda'tta somsomoḵda,

⁷ “Ngaipana ugudon ḵaḵnat? Itaḻayagna long-agnae miyisu ḵan Apudyus! Te ngai ḵallabbonge amakawan atta basuḻ yaḵon abus aḵ Apudyus?”

⁸ Aḵ Jesus ḵad, inigammuna da somsomoḵda woḵ ḵanana, “Ngaipayu somsomḵon ḵaḵnat?

⁹ Ngai ḵad ain naḻaslasu we ibaga ḵan siya, ‘Napakawan da basuḻnu,’ baḵon nu ‘Tumaḵdogḵa, aḻam oboḵnu ya anaddaḻanḵa’?

¹⁰ Yaḵon ta angigammuwanyu we saḵone Abeng Di Tagu we naḻpu'd langite niyanaḵ sina'd luta, anna ḵaḻabbongaḵ sina'd lutae amakawan atta basuḻ da tagu.” Pun ḵanana'tte naparalaes,

¹¹ “Ibagaḵ ḵan siḵa, bumangonḵa, aḻam bulignu ta inḵan si boḻoyyu.”

¹² Pun daguse bummangon si angitotollongan da losane tagu, innaḻana bulignae innumbogana woḵ ummoyon. Pun natataag da tagu sidi woḵ dinaydayawda'ḵ Apudyus, ḵananda, “Atopay! Naippun paat innila taḵu'ḵ ḵaḵna!”

Sa Nangayagan Jesus Ḵan Levi

¹³ Ummoy os ḵasin aḵ Jesus si taḻantag ni baybay. Pun nandatdatong os da amode tagu woḵ nantuttudu ḵan dida.

¹⁴ Lummaus aḵ Jesus woḵ innilana'ḵ Levi ye abeng Alphaeus we tutuḵdu'tte opisinan da andadagup atta bugis. Ḵanana ḵan siya, “Tun-udonaḵ ta ambalinoḵ siḵa'ḵ disipuluḵ.” Pun lummibbat ay aḵ Levi woḵ nitun-ud ḵan siya.

¹⁵ Nanḵaḵaḵan ḵad da Jesus ya da disipuluna'ḵ ḵuwan da Levi, naḵaḵan ḵan dida da adu we andadagup atta bugis ya da udume ḵabasbassuḻan te adu da nituntun-ud.

¹⁶ Innilan ḵad da Pharisee ye mimistulun ni lintoge naḵaḵan aḵ Jesus atta ḵatti ye tagu, ḵananda'tta disipuluna, “Ngaipa'ḵ Jesus maḵaḵan atta andadagup atta bugis ya da udume ḵabasbassuḻan?”

¹⁷ Dingngoḻ ḵad ay Jesus da inimusda, ḵananae nangipani, “Da anḵosdoḻ, adidapun ḵasapuḻan an-aagas. Yaḵon da masaḵit, ḵasapuḻanda. Isuna saḵon, adiyaḵpun ummali ta ayagaḵ da naun-unane tagu yaḵon ummaliyaḵ ta ayagaḵ da ḵabasbassuḻan ta ambabawida'tta basuḻda ta ansinagungda ḵan Apudyus.”

Sa Mipanggob Atte Allaun

¹⁸ Sin-aḻgawan ḵad, nallaun da Pharisee ya da disipulun John ta alluwaḻuda. Inninggaw da udume ummoy ḵan Jesus woḵ ḵananda ḵan siya, “Da disipulun John ya da disipulun da Pharisee, nallaunda ta alluwaḻuda. Da disipulum ḵad, ngaipada adi allaun?”

¹⁹ Ḵanan Jesus we nangipani, “Allaun ḵamman da buḻbuḻun ni angasawae laḻaḵi nu awad ḵan dida? Anganda pos pagay. Sa annaan ni angasawae laḻaḵi ḵan dida, adidapun allaun.

²⁰ Yaḵon sa umali ye aḻgaw nu miyadayu nangasawae laḻaḵi ḵan dida, sadi aḻgawe allaunanda.”

Sa Baru We Tuttudun Jesus

²¹ Ḵanan os Jesus we nangipani, “Naippun tagu'ḵ ituḵupna baru we lupute adipun nisaḵsaḵ si dadaane silup te nu mituḵup si dadaane silup ya isaḵsaḵnu, ḵumson baru we mituḵup ya yatyatona dadaane luput ḵad amo dumaḵoḻ pissayna.

²² Naippun os tagu'ḵ ibilungna inabuyu'tte dadaane geddange bibillungan. Te nu ḵoona ḵaḵna, bumtaḵ sadi ye geddange bibillungan ḵad umabuyang bayas ya madadail geddange bibillungan. Yaḵon ḵasapuḻane ibilung oḵyan inabuyu si ḵaḵḵopyae geddange bibillungan.”

Sa Umillongan Da Judyu

²³ Sa umillongan, nangoy da Jesus ya da disipuluna si pappayawe namuḻ-an si de wheat we isun ni pagoy woḵ ḵummuḻtung da disipuluna'ḵ ḵinutimanda.

²⁴ Inninggaw da udume Pharisee ye innilada ḵingwada. Ḵananda ḵan Jesus, “Ilam ḵad, ngaipada ḵoon ḵaḵnat? Lisalisonda lintog taḵu we Judyu te an-anida si umillongan.”

²⁵ Pun ḵanan Jesus ḵan dida, “Ḵasapuḻane sosomḵonyu binasayu mipanggob atte ḵingwan Ari David ya da buḻunna'tte nauḻatanda.

²⁶ Nillumnoḵ si boḻoy Apudyus woḵ innaḻana tinapaye nidatun ḵan Apudyus we adimpun ni lintog iyunud. Abus da papadi'ḵ miyunude angan si sadi ye tinapay. Yaḵon ḵinanna ya innattana bos da buḻunna. Sana naḵwa si timpun Abiathar we ḵangatuwane padi.”

²⁷ Pun ḵanan Jesus we nangiyanungus, “Daḵampun aḵ ḵingwan Apudyus da tagu gapu'tte umillongan! Ḵingwana sadi ye aḻgaw para'tte umillongan da tagu.

²⁸ Pun Saḵone Abeng Di Tagu, anna ḵaḻabbongaḵ atta maḵwa si umillongan.”